Congress bân kan entawn ang: Thangtea

Aizawl: MNF Vice President Dr. R.Lalthangliana chuan, “MNF sawrkar laia zirtirtu, police, forest department leh department hrang hranga hnathawktu kan lak, Congress sawrkarin a bantir leh tak zawng zawngte kha dan hnuaiah kan ennawn leh vek ang a, danin a phal chin chu kan lalet leh vek dawn a ni,” a ti.

Nimin Buarpui Information cum Cultural Centre building-a thu a sawinaah Dr. R.Lalthangliana chuan, “Zu zawrh avanga hmeithai leh fahrah lo pung thar ta hluai mai, hrehawm taka mipui kan rumnate hi kan sawrkar hunah kan tibo vek ang a. Ramri buai avanga mipui, zirlai leh chanchinbu mite thlenga an tuarna leh Zoram hmun hrang hranga inkalpawhna kawng chhe em em te hi siamthat vek kan tum a ni,” a ti bawk.

Thu sawitu dang C.Lalrinsanga Ex-Minister pawhin thu sawiin, “MNF hi Mizo Hnam Movement kengtu kan ni a, ‘Pathian leh kan ram tan’ titu kan nih avangin party dang angin ngaihtuahna bal leh fello tak kan neih ve a thiang lo a. Tunah hian Congress party chu NEDP leh MLA fund hmangin campaign beihpui an thlak tan a, Mizo mipui pawh kan fin harh tawh avangin inthlan dawna pawisa sem vak vak hian awmzia a nei tawh lo. Kum 10 rethei taka min siam hnu a, inthlan dawnah sum hmanga kan hlutna lei thintute sum sem hi lo la mah u la, anmahni vote in ba kher lo,” a ti bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?