Congress chhungkaw buai (Tunhma atangin)

Kum 1961 khan Mizo Union laka lungawi lo a chhuak Pu A.Thanglura (Assam MLA ni lai) khan Indian National Congress a zawm a, chumi hnu lawk August 10,1961 ah Mizo District Congress Committee din a ni a. Nehru-a’n hmarchhak bial a bik deuha zalenna zau zawk pea awp a rawtna (EITU-in thlawp zui tak Nehru pattern an tih mai kha) an policy atan an hmang a; mahse, EITU party lo sawi mawi tawh sa a nih avangin ‘Scottish Pattern’ an ti thung a ni. Mahse, inthlan an chuh hmasak ber February 2, 1962-a MDC inthlanah chuan an tla vek thung.

Mizoram a party lian pahnih Congress leh MNF hi an din kum a inrual a, an hun laia party dangte an tlakhniam a, an zuih ral leh mai thin laiin tun thlengin an la nghet viau a. An din chhan, an thupui leh an kalphung a inang lo hle a, langsar taka an inbeih bakah inkher neuh neuh leh (zep nak emaw) kua hreuh a, inhawlh phel zawnga inphiarruk an ching ve ve fo bawk. Dik tak chuan Mizoram political history-ah hian a tir te atangin inphiarrukna, hruaitute paihthlakna, lalna leh thuneihna inchuhna, zahpah nei lek lo a mahni sahmim tihpuar, ram leh hnam ngaihtuah chang lo a mahni (party) dinhmun insawhngheh tumna hmuh tur a tam hle. Hengah hian party ziding pahnih pawh hi an bang bik lo.

Mizo district congress khan hma an sawn chak hleithei lo viau a. National party niin an hmunpui vai ram lam pawhin an ngaihsak viau mah se, an hruaitu Pu A.Thanglura te khan mipui an hip vak lo a nih hmel. A hmingah pawh ‘vai pawl’ tia sawi lar a ni mah zawk a, tun thleng pawhin a la nih hi. Mizo Union-in policy atan ‘state’ nih an sawi mawi a, MNF in ‘independence’ an tuipui thung a. Mautam tampui a lo thleng a, politics a inlumlet a, MNF an lo lian chho a, rambuaiin a zui a, Congress an pil deuh vang vang a. Mahse, kum 1967 tawp lamah khan Pu Hrangchhuana leh Pu Dengthuama te hoin an din thar leh a, rambuai kara palai hna thawk tura indin thar leh an ni ber. An policy atan Remna leh Muanna an hmang nghe nghe.

Party te tak ni mahse, vai ram lama zawmpui nei, national party a nih avangin an rawn ngaihsak viau a. Mizoram congress party history-ah hian inphiarrukna, lam tang leh lam tang – pawl leh pawl inhruipawhna hmuh tur a tam hle. An tuaithar leh hnu rei lo te, kum khat em pawh a vei hmain an phir nghal a, president (R.Dengthuama) pawl leh treasurer (Hrangchhuana) pawl – group hnihin an inthen phawk mai a. Hei hi Mizoram congress party phel vawi khatna a ni awm e. Chumi hnuah zai khata luang lehin Mizo District Congress Committee an din thar leh a. Hmeichhe lam leh thalai pawlte an indin zui a. April 1970 a District Council Inthlannaah chuan hma an sawn hle a, bial tinah Mizo Union nen an inmal beih a ni ber a. Bial 12 ah chakin sorkar an siam a. Mahse, sorkar an siam dawn atangin inhruipawhna a awm a, a ngai tein Hrangchhuana pawl leh R. Dengthuama pawl an awm leh ta der a. Hun rei a liam hmain January 1971-ah District Council session an neih tumin an party thoin no-confidence motion an pu lut a, R.Dengthuama lamtang sorkar paih thlain Hrangchhuana hruai congress party lamin sorkar an siam a. Lehlam pawlin hma an la reng a, thla hnih an kal hman tihin Mizo Union nen tangdunin R.Dengthuama lam tangte chuan sorkar an paih thla leh tho a ni.

Kum 1971 chhoah khan politics a chiri nasa hle a, Mizo Union la lian viau mah se an hruaitu inhruipawhna avangin an zuih ve tial tial a, political party piang pawh a awm nual. U.T kan nih hnu lawk atangin Congress party phir pawh zai khatah an luang leh ta a. U.T sorkar hmasa ber kha Union kaihhruai sorkar a ni a; mahse, Indira Gandhi khan Union hruaitute chu Congress-a lut mai turin a thlem hneh ta hlauh a. Tichuan, an inchhunfin ta a. Chu chu Mizoram political history-ah chuan Union-congress merger ti a hriat a ni a. Party tê zawk congress chu Delhi tlanga zawmpui nei an nih miau avangin a dawlhtu zawkah a tang a, union chu Congress a lo ni ta.

Pu Lalthanhawla hi president a ni zui a, ani hian an party chhunga a dinhmun sawh ngheh dan a thiam a, a lam tang lote a ching hneh viau a, hneh takin an party mi leh sate a hruai thei a. Tlak hniam zual lai nei mahse an ding chhuak thin a, inphirrukna leh inhruipawhna thleng fo mah se, Pu Hawla bawk hi an party chhungah chuan a ding chang leh thin. U.T hun laiin P.C sorkarah an MLA 8 an party an chhuah san a, hei hi party chhung buai ruk vang piah lamah pawn lam atangin thiam taka an mawng hiattu an awm vang niin a lang.

Remna leh Muanna campaign auhla atan Congress-in an hmang thiam bawk a, mipuiah an tla na tial tial a. 1984 inthlanah chuan a vawi khatna atan Pu Lalthanhawla hruai congress party an sorkar ta a. Remna leh Muanna behbawm politics vir vel karah hian congrss party chhung buai neuh neuh sawi tur a awm nual. Mahse, Pu Lalthanhawla bawk a ding chang leh a, IPS hna ban sana politics a zuang lut a congress zawmtu Pu Lalduhawma ten party an kian san thung. State nih hnua inthlan hmasak berah MNF sorkar Pu Laldenga hruai a lo piang a.

Mahse, kum khat leh a chanve awrh a kal chauh tihah MNF MLA 8 an hel thut a, party chhuah sanin MNF-D an din a. Pawn lam atanga lo hiattu an awm ni ngeiin a lang a, Congress nen inzawmin sorkar an siam ta reng a ni kha.

State nih hnua kan politics chanchin ngaihnawm lo tak mai ni a ngaih theih chu 1994 a congress leh MJD intawm sorkar laia naupuak mawng sawh dawt a inpaihthlak vel kha a ni. MJD MLA 5 leh MNF MLA 5 ten Pu Hawla ministry an thlawp thut mai khan tun thlengin maktih a la hlawh a, vai ram politics te pawh a ang dawn dawn alawm. Kum 1997 khan MNF party chhungah hruaitu (president) inchuhna na tak mai a awm a, an phel ta phawk a, MNF a lo piang a. Chumi hnuah MNF (Unity) te pawh a ding ve leh a nih kha.

Kum 1998 atangin MNF hruai sorkar a lo ding a, congress party chhungah neuh neuh a lo awm ta a, 2005 August thla khan congress party chu a phel ta a. Hruaitu hlun tak takten an chhuahsan a, Mizoram Congress Party an din ta a ni. MLA pahnih Pu Liansuama leh Pu Saikapthianga ten banna am theh lut a, hei hi Mizoram political history a MLA ten banna an theh luh hmasak ber a ni nghe nghe. Mahse, kum rei a vei hmain MCP chu an darh a, a hlawm lian berin Congress an zawm leh ta a ni.

Mizorama party lian ber ni mek, Congress party history hi zir chiana chhui tham a ni. An hun tawn chhohah hian mi langsar ta ber chu tuna president ni lai Pu Lalthanhawla hi a ni a. Ani aia hruaitu ropui leh thiltithei an la nei rih lo. Tunhnaiah an vice president an inkar boruak a tha lo hle tih a lo lang chhuak ta a. Hetianga an kal chho zel a nih chuan vice president nge tuar zawk anga an party? Tum dang ang bawk khan Pu Lalthanhawla hi a insawhnghetin an party mipuiah a chungnung zual phah leh sawt ang em? Inthlan dawna ruaia party chhung buaina lian tak awm hi an tawrh phah viau ang em? State dangah chuan congress party an buai chuan BJP-in an hlawkpui thin a, keiniah hian MNF hian a hlawkna an tel thei ang em? Engpawhnise, tuna congres party dinhmun hi chu rin dan bak sawi  theih a ni lo a, thleng thleng thar a awm thut thei reng a. Chuvangin, an hun kal tawh lam atangin an hmabak tur hi i thlir phawt ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?