CWC-in 1055, JJB-in 335 case chingfel; Naupang thubuaiah hursualna leh rukruk case a sang filawr

Aizawl: Mizoram State Child Protection Society (MSCPS) chuan kum kalta April, 2017 atanga March, 2018 inkar chhung khan case 1375 an chingfel a. CWC case-ah hursualna rawngkaia naupang khawih a tam hle a, JJB case-ah hi rukruk case a sang hle bawk.

Zalen palaiin Mizoram State Child Protection Society thawktute hnen atanga thu a dawn danin April, 2017 atanga March, 2018 inkar chhung khan Child Welfare Committee hian case thar 1055 dawngin kum hmasa lama case pending 68 awm nen case 1123 ngaihtuahin case 1043 an chingfel a, case 80 chu kumina ngaihtuah chhunzawm turin an dah. Juvenile Justice Board (JJB) hian case thar 335 dawngin kum hmasa lama case pending 92 nen case 427 an ngaihtuah a, case 332 chingfelin a dang 95 hi kumin a ngaihtuah chhunzawm turin an dah leh a ni.

Child Welfare Committee (CWC) case ah hian hursualna rawng kaia naupang khawih (sexually abuse) chu a sang hle a, naupang ngaihthah (neglected) case chuan a dawt a ni. MSCPS thawktute chuan hursualna rawng kaia naupang khawihtu tam ber hi an chhungkhat hnai leh hmelhriatte an ni tih an sawi. Juvenile Justice Board (JJB) case neih zingah hian rukruk case chu a sang fal hle a, case an dawn 335 zinga 190 chu rukruk thubuai a ni a. Rukruk bakah hian ruihhlo hmansual chu a hluar hle a, JJB case zingah hian tualthah leh pawngsual case pawh a awm bawk.

Zalen zawhna chhangin Mizoram State Child Protection Society thawktute chuan Mizoramin case a ngah chhan chu report a luh that vang nia an hriat thu an sawi a. State lian, mipui chen tamna nen khaikhin chuan case an ngah hle nia sawiin state thenkhatah chuan report a luh that loh avangin case ngaihtuah hi a hniam nia an hriat thu an sawi a. Case an ngaihtuah zinga tam ber chu nu leh pa kar lova mi niin an sawi bawk.

April, 2017 atanga March, 2018 inkar chhunga Child Welfare Committee-in case thar an dawn 1055 zinga 467 hi mipa an ni a, 588 hi hmeichhia an ni. Hemi hun chhung veka Juvenile Justice Board case dawn thar 335 zinga 309 hi mipa an ni a, a dang 26 hi hmeichhia an ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?