Cyber policing kan lak thutak a hun ta hle!

Mizoram police chuan cyber crime buaipui tur cyber police station din a nih tur thu IGP chuan a sawichhuak a. Hemi hma hian police lam pawhin cyber crime buaipui tur bik cyber police din thuai a nih tur thu an sawi tawh bawk a ni. Heng bakah hian cyber forensic laboratory leh cyber training centre te din turin hmalak mek a ni bawk a ni.

Cyber crime hian ram changkang zawka kan ngaih khawthlang ram te nasa takin a tibuai tawh a, thiamna a thang zel a, thiam thil thar a chhuah zel vang a ni ber e. India ramah pawh  a kum telin a let tak meuhin a punlun chho mek chu a ni a, kum 6 kalta khan case 13,000 vel aluh laiin nikum hmasa lam khan case 150,000 chuang a lut tawh a, nikum khan a let 100% a a pungin 300,000 chuang ziahluh a ni tawh a ni.

Central Sawrkar policy en chuan demonitization atang khan e-transaction hi a pung lo thei lova chumi venhim kawngah chuan hma kan sawn chak loh avangin keini ang ram kilkhawr, technology a sang vak lo phei hi chu kan dinhmun ennawn a tul fo dawn tih a lang reng a ni. Mizoram pawhin hei hi kan buaipui mek chu a ni a, thuneitute lamin fimkhur turin thuchah an siam fo thin a chutichung chuan internet leh a kaihhnawih hmanrua hmanga inbumna sawi tur kan nei ta fo mai a, nunna chan te pawh an awm phah tawh a ni. Phone kaltlanga suma inbumna te, email hmanga inbumna te hi tuna kan buaipui chu a ni a. Pawikhawih tute hian thiam thil chhuak thar an hmang ve zel bawk a, hemi atana hmanraw thar ber chu social media hi a ni , hemi hmanga dawta inpuhnate, intih hmingchhiatte, mi dang rilru tihnat tumna te, thu dik lo emaw huatna chawk tho thei thehdarh te, naupang leh hmeichhe za hawmna tihbawrhbannaah te pawh thubuai a awm ta fo mai .

Heng kan sawi takte hi dan hmanga thunun (control) a nih theih nana thil pawimawh ber pahnih chu cyber police te nasa taka thuamchaka chumi piah lama mipui hnena awareness inpek niin a lang rih a ni.  Technology tharin sualna thar a hring a, chumi do letna tura dan siam thar te chu mipui lamin kan la hre tam lo hle a. Tun hmaa thiang emaw kan tihte, kan society ngei pawhin a pawmzam theih ang te chu tunah chuan mi pawisawi theihna te a a ni tih kan hrechhuak ve tan chauh a ni a, tan lak a la ngai nasa hle mai.

Cyber policing lama hma kan sawnna police lamin an rawn sawichhuah hi a lawmawm khawp mai a, hmasawn zel turin theihtawp chhuah sela.  Hetihrual hian legislator lam pawh intuaihriamin tih tak zetin sualna thar lo chhuak mek hi do thei turin inpuahchah sela a tha ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?