Dan zam, zah & zawm

Dan zam hi khua leh tuite tih tur pawimawh ber pakhat a ni a, dan siam hi ram hruaitute hna pawimawh ber pakhat a ni a, tha taka dan lekkawh hi sorkar tha ziarang pawimawh tak a ni. Dan hi mipui himna tur leh ram hmasawnna tur atana siam a nih avangin mi tin hian dan hi zawm tha vek ta ila chuan kan hlim tlang anga, kan him tlang bawk ang. Chutihlaiin, kan buaina ber ni thin chu dan pawisa lo kan tam lutuk a, dan siamtute leh mi lianho zingah dan chunga leng anga inngai an awm fo bawk thin hi a ni.

‘Dan chu bawhchhiat tura siam alawm’ (Laws/rules were made to be broken) tih chungchang hian hman atangin sawi zui a hlawh a, inhnialna a la thlen reng. Mihring siam dante hi a famkim tak tak thei lo a, a hun leh a hmun azirin a hmantlakin a hmantlak loh thei bawk tih ngaihdan a awm thin. A dikna lai pawh a awm awm e. Dan thenkhat chu kum tam tak daih a nih laiin a then chu kum hnih khat leka thlak leh ngai te pawh a ni bawk. Engpawhnise, dan reng reng hi bawhchhiat theih loh khawp a tha a awm lo tih hi thu dik ni mah se, dan pawisak leh dan zawm that hi hnam ropuite zia a ni thung. Kan pipute pawh kha khawtlang dan pawisa tak an ni thin a, keini pawh hian kan thlahtute zia kha kan chawinun leh a hun khawp mai.

Chutihlaiin, tunlaiah chuan dan leh hrai tha tak tak nei mah ila a lekkawhtuten an mawhphurhna an hlen that tawk loh chuan awmzia a awm lo; thuneitute leh sorkara thiltithei deuhten dan an pawisak loh a, langsar taka an bawhchhe fo a nih phei chuan hnam a him lo ru hle tihna a ni thei. Good governance chungchang kan sawi thin a, tunlai huna ram changkang leh sorkar inrelbawlna fel tak neiten ziarang inang tlang an neih pakhat chu ‘dan a lal a, mi tinin dan an zawm tha a, dan chunga leng an awm lo.’ Keini nen chuan kan inhlat khawp mai, kan ramah hi chuan dan ngai lo tak tak leh dan lekkawhtute pawisa lem lo an tam lutuk hi kan harsatna a ni mek a, dik tak chuan dan chunga leng anga inngai tawkte pawh an awm hial thin a nih hi. Russian thuziaktu lar Leo Tolstoy-a’n, “Dan zam mai hi chu a awlsam a; mahse, dan lekkawh tak hi chu a har,” a tih ang deuh kha kan ni.

Kan khawpui chhung kawngpuiah te hian dan chunga leng a inngai leh lal bik hi an awm deuh chu a ang thin. Lirthei inhnawh tawt tak karah car chung eng thei vuah, traffic rules kalh a tlan tlang par par thin an awm fo mai a. Dan lekkawhtute tan dan buai ngam chi an ni si lo a. Bati sen/pawl chhit vanga dan bawhchhiate hian mipui an hmusit tihna a kawk tel. Rikrum thila che vel thin – ambulance, police duty motor-te an nih ngawt loh chuan dan bawhchhe tur bik hi an awm lo maw le.

Khawpui chhunga insak dan te, in hmun tur lai dan te, kawngpui nek a lungrem dan te hi dan mumal a awm miah lo emaw tih a awl thin. Kum tin fur laiin lei a min thin a, tun hnaiah (thal lai a ni chungin) leimin leh lei khi, mihring chenna atana hlauhawm thei khawpa nasa hriat tur a awm leh thin. Dan leh dun mumal tak awm sa hi zawm tlang ila chuan kan buaina tam tak hi chu kan pumpelh ngei ang maw le.

Kum 2005 khan parliament-in dan ropui deuh mai a siam a, chuta tang chuan India khua leh tuite hian hian chanvo ropui deuh mai kan nei thar a, chu chu kan hriat lar em em, ‘Right to information’ hi a ni. Mi tin hian sorkar laka kan hriat duh awlsam taka hriat theihna chanvo kan nei tih hi kan la inhre tawk lo maithei. Chu chanvo chu sorkar/thuneituten min palzut sak ngawt thei lo a, danin a phal chin chu an zepin an thup tur a ni lo.

Tlem lai deuh khan mi thenkhatin MLPC Act hman a nih hnu a zu permit nei te leh zu atanga sum hmuh chungchang RTI Act hmangin sorkarah an zawt a. Mahse, sorkar (Excise department) lam chuan an duh ang chhanna an pe phal lo a ni awm e. Right to Information Act hian a tum ber chu langtlang sorkar neih a ni a, puanhnuai thil leh thil thup an la ching a nih chuan a sorkar ber hian dan a pal zut tihna a ni a, khua leh tuite chanvo a ngai pawimawh lo tihna pawh a ni ang. Hetiang thil hi kan ram inrelbawlnaah hian a la tam khawp mai. RTI Act (2005) sawi takah chuan he dan Section 4 phei hi chu sorkar hian a la tihhlawhtling lo hul hual a ni.

Tun hnai maia Medical Council of India-in dan thar a siamah chuan doctor-ten damdawi siamtu company hnen atangin therhlo an dawng a nih chuan na taka hrem tur an ni. Thilpek an pek thin bakah ram pawna zinna te an tum sak thin hial a. Mizorama doctor tam tak pawh hian damdawi siamtu/zuartute hnen atangin sum leh therhlo an dawng thin a sawi a ni a, inentir lai velin medical representative ho an lo ther huang huang thin a nih hi. Mahse, dan hi a ruka bawhchhiat theih a ni a, a vengtu leh a lekkawhtute an inthlahdah leh zel a nih phei chuan dan neih loh nen a inang reng awm e.

Dan zawm hi khua leh tuite tih tur a ni a, mitin himna tur a ni kan ti thin a, a dik chiah. Mahse, kan vaia kan zawm tlan loh chuan mi thenkhat tan tawrhna a thlen thei. Kawngpui siamtuten dan ang thlapin siam se, ko pang lungremtuten dan ang thlapin rem se, in satuten dan zawm tha bawk se kan vaiin nuam kan ti ang. Mahse, kawngpui siamnaah eirukna a lo tel chuan kawng a chhe hma a, khuar a lo awm a, a bumboh a, lirthei chetsualna hial a thleng thei. Kawngpui nek rana insak avangin lirthei tlanna tur a zim phah a, dan pawisa lo a lirthei khalh thinte vangin mipui an him lo thin. Kan buaina tam tak hi kan pumpelh theih a ni reng si tih hi i hre thar ang u

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?