DEEP VEIN THROMBOSIS (DVT)

Thrombosis awmzia chu thikhar insiam (thrombus) vanga thisen zam harsatna tihna a ni ber mai a. Hetiang thi khar hi thisen zam (Vein) pawnlang leh chhungrilah te a insiam thei a, pawnlang vein-ah a insiam hian Thrombophlebitis kan ti a, drip khai vanga vein vung hi a ni ber a, heng ang hi chuan harsatna lian tham a thlen meuh lo (infection nasa zawk a thlen te a nih loh chuan). Vein chhungril zawkah a insiam anih erawh chuan a serious a, enkawl ngei ngei a ngai thung a ni. DVT kan tih hi chawn leh malpui chhungril vein-ah te a insiam deuh ber a, chu chuan ke/mal te a tivung a, na a siam thin bawk.

DVT hi a hlauhawm nachhan chu thi khar insiam (blood clot) kha thisen zam banga a bet lai a bal palh chuan thisen zam zel zawh chhoin chuapah te, lungah te, thluak lama thisen zamah te a kal chho a, a block ta thin a, chu chuan thihpui tham natna Pulmonary Embolism te, Heart attack tia kan hriat lar Myocardial Infarction te, thluaka thisen zam block vanga thisen leak (cerebrovascular accident-stroke) te a thlen thei a ni. Vein chhungril a thi khar a insiam hian thenkhatah chuan hriat mai a harsa a, hriat chhuah hma hauhin thihpui tham harsatna a thlen thei bawk a ni.

DVT lo insiam chhan hi chi hrang hrang a awm thei a, chung a chhan zinga inang tak chu taksa/ke a chet tlem hi ani. Chutiang avang chuan damlo khumbet rei te, zeng te, thlawhna a rei tak tak chuang thinteah hian a awm duh zual hle. Hei bakah hian inzai (surgery) vanga vein tihpalh te, Cancer vang te, thisen lam fel lohna avang te, inflammatory bowel disease (ril lam natna) nei te, lung lam natna Atherosclerosis te, Cholesterol sang Hypercholesterolemia thenkhat vangtein DVT hi a insiam thei bawk ani.

A lan chhuah dan tlangpui chu ke/chawn/malpui na emaw nuam lo vung vung te, kal zawnga na te, vung leh vun rawng duk deuh te angin ani ber a. A confirm na ber chu Ultrasound ani a, he khawl hmang hian thisen zam enchian ani a, block-tu a awm leh awm loh te, thisen luan dan a dik leh dik loh te an endik thin a ni. A enkawl dan erawh a buaithlak phian a, thi khar tihtet emaw a than loh nan thisen tikhal thei lo tur damdawi (anticoagulants) hmangin an enkawl deuh ber a. Amaherawhchu heng damdawi te hian thisen khal mai tur an ven avangin intihpem palh te, internal bleeding engemaw berah te thisen chhuak a reh mai thei lo thin a ni. Thi khar hi taksa chuan eng emaw chen hnuah chuan a tiral ve mai thei a, mahse vein hi a tichhe ve thei a; chuvangin, zai emaw catheter vein a thunluh hmanga thi khar tihsawm (Catheter-directed thrombolysis) hman te pawh an ti bawk thin.

DVT hi a lo awm tawh a nih chuan bed rest te, ke a kal tlem te a ngai thin a. A nei hma thei dinhmun a ding damlo khumbet rei, zeng, cancer damlote hi an ke, chawn, malpui leh ban te massage fo a pawimawh a, physiotherapy hi a enkawl nan a tangkai em em bawk a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?