District ramri sawi chiang turin MNF phut

Aizawl: Congress Legislature Party Treasurer leh PHE Minister ni bawk, Zodintluanga chuan, “MNF party-in district pathum pek an tum ramri ‘boundary’ hi sawi chiang rawh se,” a ti.

Nimina Vaivakawn Unit ten mithar lawmluhna hun an buatsaihah thu sawiin Zodintluanga chuan, “District pathum Headquarters atan Saitual, Khawzawl leh Hnahthialte hi MNF hian pek an tum a nih chuan kal paha vote zawn nana mipui buma sawrkarna siam tuma sawi liam mai mai lovin ramri puang ngam rawh se, chuti a nih loh chuan kal paha puang mai maia mipui buma sawrkar tum an ni ang,” a ti.

Congress hotu thenkhatin Congress an chhuahsan chungchang sawiin, “Tun hnaia Congress chhuahsantu hotu thenkhatte chhuahchhan chu Congress sawrkar a that loh vang emaw, Congress hotute an that loh vang emaw, sawrkar a ‘corrupt’ vang ni lovin rampum huap ni lo bial bil emaw, khaw bil emaw an buaipui vang a ni,” a ti a, Congress chu khawbil leh bial bil ni lovin ram pum huap hmasawnna politics buaipuitu a nih thu a sawi.

Zodintluanga chuan tuna eptu MLA ni lai mekte chu kum 2018 inthlanah tling nawn tur an awm tawh loh thu a sawi bawk. Zodintluanga chuan Congress party chu ram pumah nasa takin hma sawn chho zelin MNF hun laia tihchhiat tawh development project siam that leh tam tak chuan mipui rilru a hneh ngei a beisei thu a sawi a. “Falkawn Referral Hospital te pawh MIMER dinin Doctor zir theihna hiala puitlin a ni tawh a, Tuirial HEP pawh Prime Minister-in a rawn hawng hial a ni,” a ti bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?