Doctor Ka Zawhna (April 2, 2017)

Zawhna: Ka pu, kum 18 ka ni a, ka bialpa nen sex kan hmang a, mahse ka rai miah lo. Mi chu a vawikhatna ah pawh an rai nghal si a, ti nge ka rai miah loh le?

Chhanna: He zawhna hi SMS-a ka dawn a ni a, tunlai hian ka hriat loh number hrang hrang atang hian hetiang lam hawi zawhna hi ka dawng ngun ta viau mai a, a bikin tleirawl lam an ni deuh ber a. Sex hman chungchang te, naupai chungchang te hi kan tleirawl, thalaite hian pawnlang taka hre si hian a phena a ken tel harsatna hrang hrang hi an hre lo khawp mai tih a ti lang a. Tun kar khan Aizawl hmarchhak lam veng panga atangin tleirawl kum 14-19 inkar kan sawm khawm te tan Residential Camping kan buatsaih a, chutah chuan ruihhlo leh sex hmansual lam hi kan zirtir nasa a. Zawhna an neih ang te kan chhang bawk a. Chung te nen chuan he ka zawhna dawn hi a inkungkaih em avangin leh, helam chungchang hi chiang zawka kan hriat a tul hle nia ka hriat avangin a zawhna chhan pah hian chipchiar zawkin helam kaihhnawih hi tarlan ka han tum ange.

Kan khawvel a changkang zel a, information kan dawnna te pawh a changkang zel a, tunhmaa rual u zawk te atanga thu leh hla kan hriat te ang kha tunah chuan mobile leh internet lam atangin duh hun hunah kan en in kan hmu thei zel tawh a. Mipat hmeichhiatna chungchang phei chu kan hre leh lutuk mah mah emawni tih tur a ni. Mahse information kan dawn tam zawk hian hriatna zau leh tangkai, kan nun venghim thei hriatna min pe mawh viau niin a lang. Internet lama kan en peih te hi a nuam chin, a awlsam chin mai niin a lang. Chhungkuaah nu leh pa te pawhin hrilh tul ni a kan hriat lem loh emaw, kan hrilh ngam chiah loh te hi tuna kan thalaite mamawh information chu ani lawi si a. Heng social media leh thianteatanga an hriat tam zawk hi an nun kaihruai thei a tlem khawp ani tih a lang. Zawhna min zawt tu hian sex hman chuan a rai theih tih a hria a, an rai vek kher lo tih erawh a hre lo; chu mai ni lovin ka chhanna a rawn zawh let na atang leh kan camping buatsaih atanga chiang ta chu sex hman hian an rilru ah naupai bak an ngaihtuah thleng pha lo tih hi a ni. Invenna tel lova sex hman hian natna inkai theih Sexually transmitted disease (HIV&AIDS leh Hepatitis B/C tiamin) a thlen thei tih te hi an rilru ah a awm pha mang lo nia. An duh tak an bialnu bialpa te sex an hmanpui hian chutiang ang natna chu vei thei turah an ngai pha lo/ngai phal lo tlat mai hi kan derthawnna lai chu ani.

Sex hman avanga nau an lo pai te hian chhungkaw din tura an rilru lo la inbuatsaih loh si zia te kan hriat belh a, hmeichhe mal, hnathawh emaw eizawnna nei mumal lo pawh nise pasal nei lova nau pawm mai an inhuam ngawt mai te hi kan society tan a him lo hle a ni. Nau hnuchham enkawlna hmuna enkawl tur kan pung zel te pawh hi a tih ziaawm dan kan ngaihtuah a ngai ta hle. A mipa lam lah nise an bialnu an mutpui hian invenna hman an ngaihtuah thleng pha lo va, lo rai palh pawh nise tih tlaktir duhtu zawkah an tang deuh ziah mai lehnghal a. Heng kawngah hian mipa tleirawl/tlangval te pawh hma kan sawn a ngai hle mai. Nu leh pa lam chu thuhran nise, khawtlang leh kohhran lam pawhin kan mawhphurhna anga kan ngaih a tul hle. Thahnemngaih thu hla ah ka han ziah belh ta nual a ni.
Awle, a zawhna lamah lo lut leh ta ila. Hmeichhe hrisel pangngai, mumal taka thi nei hian invenna tel lovin sex hmang ta se nau an pai theihna chance chu 20-40% chauh ani hrim hrim a ni. Nau la pai miah lo hmeichhia in regular taka kum khat tal invenna tel lova sex an hman hnu pawh a nau an la pai loh chuan naupai thei lo (Primary Infertility) anga ngaih an ni chauh a ni. Chuvangin nau pai leh pai loh hi vanneih leh vanduai thil ani; duh vang ngawta nau pai theih ani lova, duh lo chung pawhin nau an pai thei tho ani tih hi hriat a tha hle. Mipa leh hmeichhia insawiselna nei miah lo, mipa chi tha tho bawk si pawh hi chi inmil lo vanga rai thei lo an awm fo. Hmeichhe rai theih loh chhanah hian chhul lam fel lo te, chibawm a chi insiam tha lo te, chi kawng ping te, hormones lam fel loh vang te a ni thei a. Chu bakah chuan hmeichhia hian an thi neih cycle (menstrual cycle) chhung hian nau pai theih loh hun lai ‘Safe Period’ an nei hrim hrim bawk. Mipa lam fel lohna thungah chuan chi tlem lutuk (oligospermia) emaw chi nung tha tawk lo (decreased sperm motility) te ani thei bawk.

Hemi kaihhnawihah hian sex hman hnua naupai lohna damdawi tia an sawi, Emergency Pill chungchang hi han sawi tel ta ila. Heng pills te hi hormones Levonorgestrel an ni deuh tlangpui a, sex hman atanga darkar 72 hmaa hman tur ani; duhthusam ah chuan darkar 12 chhungin ei theih nise, a thawk tha ber bawk. Engati tehreng emawni, tunlai hian na chhawkna hian a ven an ring ani ber ang chu, na chhawkna lo ei mai te hi an awm fo mai a, a veng lo nasa ani tih hrilh hriat a tha hle. Zawhna ka dawng ta fo mai. Damdawi ei hi duhtawk mai lovin an rai lo ani tih confirm nan thla khat hmain Pregnancy Test (zun test) hi ti thei se, chu bakah chuan ultrasound te pawhin confirm se a him ber. A dang leh ah chuan naupai tih tlakna chungchang hi ani a, hei pawh hi hriat fuh loh a awm fo mai. Damdawi hmanga nau tih tlakna hi chi hnih an hmang ber a, Mifepristone hi an pe hmasa a, chumi hnu darkar 24-48 hnuah damdawi dang Misoprostol an pe leh thin a ni. A pakhat chauh ei mai hian a veng kim lo va, nau insiam kim chiah si lo, tla fel lovin a awm thei a ni. Chu bakah chuan heng damdawi te hi naupai kar 8-9 hnu lamah chuan a hlauhawm thei tawh a, chuvangin engtia rei nge an pai tawh hriat nan Ultrasound hmangin confirm hmasak phawt tur a ni. Kar 10 hnu lamah phei chuan tla si lo, nau insiam tawh siin a awm thei a, naupai chhunzawm tho si, piangsual te a awm phah thei a ni. Heng damdawi te hi doctor rawn hmasa lo chuan ei loh hram ni se a him ber.

Heng kan thu ziah te hi tleirawl leh thalai te hriat atan a pawimawh ka ti khawp mai a. Heng an hriat avang hian sex lamah an inthlahdah phah a rinawm lova, mahse vanduai palh vanga an chunga lo thleng palh anih pawhin heng information hi an hriat lawk chuan harsatna lian zawk lakah a ven theih beiseiin ka han ziak a ni. Sex hmang rual an nih tawh chuan invenna chungchang te, STD leh HIV&AIDS te pawh an hriat chian a pawimawh hle. Nu leh pa lam pawhin fa tleirawl kan neih chuan hrilh hre thei ila, kan hrilh hreh anih pawhin chhiar tir ngei thei ila tiin thahnemngai deuhin ka han sawi leh hram a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?