Doctor Ka zawhna (August 13, 2017)

Zawhna: Ka Pu, khawngaihtakin Alprasil hi eng damdawi nge, engtin nge a thawh dan tihte min hrilh theih chuan ka lawm hle ang. A chhan chu kan nau mipa kum 18 mi lukham hnuaiah hian vawi hnih ka chhar tawh a, ruih nan an hmang a nih ka ring tlat mai a, ka ngaih a tha thei thlawt lo a ni. Damdawi leh a kaihhnawih hlauhawmzia te hi khawngaihin Zalen-ah hian min lo ziahsak leh teh a, amah hi thawhah te a nei thin a.

Chhanna: Alprasil hika rin danin Alprazolam damdawi hi a nih ka ring a, trade name hrang hrang a awm a, a common pawl chu Anxit tih te hi a ni. Alprazolam hi damdawi group chi khat, Benzodiazepines zinga mi a ni a, Diazepam te, Clonazepam tihte hi a unau dangte chu an ni. Heng damdawi an hmanna deuh ber chu Anxiety Disorder (Rilru hah, vei neih deuh reng vanga taksa hahna ang chi) te leh Panic Disorder (Rilru mangan thut thut vanga buaina) ani a. Kaih ah te, a then chu mu thei lo enkawl nan te, zu ngawlvei enkawl nan te an hmang lar hle bawk.

Heng damdawi te hi thluak leh thazam (Central Nervous System) a hnathawk an ni a, taksa tihahdam/hahchawl zawngin an thawk thin a ni. A bikin Alprazolam hi tunlai hian an hmang sual nasa khawp mai a, a ngawlvei pawh a awl hle. Damdawi ruih theih dang nena chawhpawlh an ching viau mai a, Zu nen pawh tihpawlh an ching viau bawk. Controlled drugs kan tih zinga mi an ni a, doctor prescription tel lo chuan lei mai mai loh tur a ni. Chuti chung chuan tunlai hian kan ramah an hmang sual nasa hle. I nau mipa pawh chuan ruih sual nan a hmang anih a rinawm khawp mai a, ruihtheih dang Heroin ang chi te nen a hman pawlh a rinawm viau bawk.

Damdawi reng reng hi duhthusamah chuan Doctor-te chawh a nih loh chuan ei mai mai loh a tha ber a, a bikin hetiang lam damdawi chi phei chu fimkhur a ngai hle. Doctor-ten an chawh chin bak lo chu ei mai mai loh tur ani. Kum naupang leh upa lamah hman loh a him ber a, mipa tar lamah phei chuan zun harsatna a thlen thei ani. Tin, nu naupai lai tan a him lova, mit lam fel lo (pressure sang-Glaucoma) ang chi ah te phei chuan a hlauhawm thei ani. Thawhah (asthma) lam chi nei ah pawh hman loh a tha a, a tizual duh hle.

Heroin hmang sual emaw ngawlvei te hian an chawhpawlh in an nunphung a buai zual nasa hle a, pawi khawih mai mai an ching bawk. A lawnga rui sual te pawh hian hre mang lovin mi pawi an sawi fo mai bawk. A ngawlvei laklawh hi an tang nghet duh phian mai a, chiri (withdrawal) an nei nasa a, a bikin taksa na ang zawng ai mahin rilru lamah a thawk na (psychological dependence). Alprazolam leh Khuh damdawi hmang sual hi tleirawl te zingah an awm fo mai a, natna dang vanga an damlohin enkawl an har a, zai ngai hnimhlum pek ngai angah te phei chuan a hlauhawm hle.

Tunlai hian kum naupang tete ruihhlo ngawlvei tan an tam sawt riau mai a, heng ang rual ho hi an inthlahdah zual a, drugs an inchiu pawhin an thiante nena syringe intawm mai mai an ching hle. Chutiang avang chuan kum naupang te te a HIV positive an awm fo ta mai; Hepatitis C pawh hi drugs inchiu thin zingah hian a tam hle. Ka thawhna SHALOM in drugs inchiu thin thisen kan test (800 chuang) ah pawh 87.7% lai mai chu Hepatitis C kai an lo ni reng. Drugs inchiu thin hi an tih tanna tam tak chu Trip zuk te, damdawi mum (Alprazolam ang te) leh a tuiril (Khuh damdawi) te a ni a; chuvangin, kan fate emaw nau te hetiang ang damdawi an lo khawih thin anih chuan a hnu lamah inchiu ah an tang leh nge nge thin tih hriat a pawimawh. Natna hrik hlauhawm a tam tawh a, ruihhlo laka kan fate, tleirawl leh thalaite an tan loh nan hian chhungkaw tin i fimkhur zual deuh deuh ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?