Doctor Ka Zawhna (Jan 20, 2019)

Zawhna: Interstitial Lung desease (ILD) & Rheumatoid Arthritis (RA) natna hi ka nei a. CMC Vellore-ah hian vawi thum ka kal tawh a, Calcium (Macalvit 500), Hydroxychhroquine Tablets IP, HCQS-300 Hyfroxychhroquine Tablets IPHCQS-400 ni khatah vawi 2, Saaz-DS, Esomeprazole, Mycophenolate Mofetil Tablets USP 500mg (MMF) ka ei thin a, heng hi min chawh a ni tlangpui a, 2017, Sept khan TB natna ka lo kai a, TB damdawi chu ka ei mek a, Thyroid ka lo nei bawk nen, ILD damdawi hi ka ei reng mai dawn em ni? Vellore a kal ngai hlir min chawh si a, heng laiah hian ILD & RA damdawi hi a awm ve tho em? Khawngaihin min pui thei em?

Chhanna: Natna khirh deuh deuh i ngah hle mai a, chuti chung chuan vanduai bik angah inngai lo la. Nang aia natna khirh tak tak an la tam a ni tih zawngin han ngai phawt mai la, a êng zawnga hringnun i thlir phawt chuan hmasawnna pakhat chu a ni hrim hrim. I kum zat i sawi lo va, heng i natna hian i hnathawh a ti buai viau ang em tihte pawh ngaihtuahna ah chuan a awm thei ang. A mal tete-in sawi fiah kan tum dawn ang e.

 

Rheumatoid Arthritis (RA) hi ruhseh pui chi kan tih mai a ni a, Autoimmune Disease an tih zinga mi a ni a, chumi awmzia ber chu kan taksa vengtute khan kan taksa peng a bei let tihna a ni ber. Chu kan taksa vengtu immune system chuan ruh chuktuah (joints) a bei a, RA bikah chuan taksa lehlam lehlam (both sides) a joints te (entir nan banrek-wrists, khup emaw kutphah a ruh chuktuah) a khawih tlangpui thin. Interstitial Lung Disease (ILD) te pawh hi Autoimmune Disease (AID) neite hian an nei duh viau; mi pangngaiah pawh a awm thei tho nachungin. ILD-ah hi chuan chuap a boruak lo khawltu air sacs tuamtu kha a lo chhah ta thin a, chu chuan kan oxygen hip luh thisena in-transfer tur kha a tibuai ta thin a ni. ILD neite chu thawk an kham lo thin a, boruak an tlachham a ni ber ang chu. Chutiang chuan zawi muangin thaw kham lo chu a lo nasa tial tial thin a ni. Autoimmune Disease dang kan hriat tur common tak chu SLE (Systemic Lupus Erythematosus) natna hi a ni awm e.

 

RA leh ILD i neih avang hian Mycophenolate Mofetil hi an chawh che a nih hmel a. He damdawi hi Kidney Transplant patient te an chawh thin a ni a, kan immune system-in mi dang kidney a lo dawn kha a bei thin a, chumi venna atan chuan an pe thin a ni. RA leh ILD hi natna benvawn (chronic diseases) an ni a; chuvangin, an damdawi chawh angho hi ei reng a ngai thin. Hydroxychloroquine pawh hi Malaria damdawi atana an hman thin; mahse, AID natna atana an hman lar tak a ni a, damdawi tangkai tak a ni. Chutiangin Saaz-DS pawh hi RA atana an chawh thin zinga mi a ni. Esomeprazole hi chu pumpui lawng laka invenna atana an chawh thin damdawi a ni thung.

 

TB natna i nei tel a, a damdawi i ei zingah Rifampicin a tel chuan he damdawi hi kan taksa a chemical awm thiat darhtu liver enzyme cytochromep450 thawh nattirtu a ni a (Cytochromep450 inducer an ti), damdawi kan ei thin tam zawk hi kan thin (liver) ah a in thet darh (metabolize) thin a, kan taksain a hman tangkai hmain a lo in-metabolize hman chuan a thawh tur angin a thawk thei lo thin a ni. Hei hi drug interaction common tak mai a ni a, i damdawi ei thenkhatte pawh hi chutiang chuan a hnathawh a tinep thei ang. Duhthusamah chuan Medicine Specialist-te rawn chiang deuh ta la, i damdawi eihote hi ei kawp rem lote a awm leh awm loh an hrilh chiang thei ang che. Chuan i damdawi ei lai te hi Aizawlah a awm leh awm loh ka hre chiah bik lo va, i zawn chuan nei an awm mai chu ka ring deuh a, an neih loh pawhin dawr thenkhat hi chuan an chahsak thei a ni. Internet i khawih thin a nih chuan netmeds.com emaw medplusmart.com-ah te hian online-in damdawi chi hrang hrang a chah theih bawk. Medplusmart ah hian i damdawi rawn sawi ho hi chu a awm ngei mai.

Thyroid problem i neih tel thu i rawn sawi a. A hniam nge sang chi (Hypo or Hyperthyroidism) tih i sawi hran lo va. Thyroid gland hi Autoimmune Disease-in a khawih duh viau mai bawk. Engpawh nise, Hypo anih chuan Eltroxin lam chi an chawh che kan ring deuh a, Hyper a nih erawh chuan radioactive iodine te an chawh thin bawk. I BP te pawh a khawih buai thei a, i in-monitor fo a ngai ang. Autoimmune disease hian mit te leh kal te a khawih buai duh a; chuvangin, eye check-up bakah kidney function test te pawh hunbi neiin in monitor thin la a tha hle.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?