Doctor Ka Zawhna (July 22, 2018)

Zawhna: Tlangval kum 28 mi ka ni a. Kum khat leh a chanve vel chu mitkham leh lu nain mi tibuai tawh a, Food allergy leh Sinusitis neiin ka inhria a, ka hnar a pin thin bakah nisa a ka chhuah chiah hian ka mit kham hi a zual a, ka lu a na chhunzawm thin. ENT ka rawn nual tawh a, ka lu na hi a la reh thei chuang lo. Khawngaiha min puih theih chuan ka lawm hle ang.Zawhna: Tlangval kum 28 mi ka ni a. Kum khat leh a chanve vel chu mitkham leh lu nain mi tibuai tawh a, Food allergy leh Sinusitis neiin ka inhria a, ka hnar a pin thin bakah nisa a ka chhuah chiah hian ka mit kham hi a zual a, ka lu a na chhunzawm thin. ENT ka rawn nual tawh a, ka lu na hi a la reh thei chuang lo. Khawngaiha min puih theih chuan ka lawm hle ang.

Chhanna: I insawiselna hmasa pahnih mitkham leh lu na hi lo sawi hmasa ta ila. Mit i hmang rim lutuk a ni thei ang em? Zan men rei, TV emaw, Computer emaw, Mobile emaw en nasa thin i ni em? Tunlai khawvelah chuan heng lifestyle (nunphung) hi a common tawh khawp mai a, Computer Vision Syndrome (Digital Eye Strain) tiin an sawi a, chutiang natna nei leh enkawl ngai chu an tam khawp mai. Naupangah pawh a common hle. Chuvangin, mit doctor (Ophthalmologist)-ah i mit entir a pawimawh hle ang. Tarmit vuah lai i ni emaw vuah tul i nih pawhin anti-glare awm ngei hmang thei la, hetiang hian computer, mobile leh TV atanga eng chhuak nasa a lo reflect thei a, chu chuan mit a eng lut nasa lutuk tur a veng a ni. A dang lehah chuan i BP an check tawh em? Tunlai hian kum la naupang zingah pawh nunphung kaihhnawih vanga BP sang an awm fo tawh. BP a lo san chuan lu na hi a lanchhuah dan common tak zinga mi a ni. Meizu miah phei chuan a awm duh lehzual.

Sinusitis hi kan hnar bawr, hmai ruh vela aircells kan tih maite a in-block thin vanga lo awm a ni a. Heng air cells (sinus) te hi kaw zim tetein a inremkhawm a, kan hnar leh hrawk/dang chhung lama boruak circulate tha thei tura puitu an ni. A chhung lining hi infection emaw, allergy vang hian a lo vung a, chu chuan air movement a block a, a chhungah tuihnang a tling ta thin a. Chu chuan hnar ping bakah ri hriatnate a tibuai thei a, a nasaah phei chuan hnai insiamte a awm hial thin. ENT Doctor i inentir nual tawh niin i sawi a, Sinus X-Ray emaw CT Scan-te an tihtir tawh che ka ring a, damdawite pawh an chawh tawh ngei che a rinawm. Allergy vanga awm thin a nih chuan damdawi hi ei rei deuh te a ngai thin a. I lu na ber a la reh thei lo hi i sawisel ber a nih si chuan thil dang chu a rinhlelhawm ta ber a ni. Engpawh nise, BP check leh Eye check-up te chu lo ti ta phawt la, chumi azir chuan enkawl i ngaih a rinawm.

Zawhna: Ka pu, ka zawhna min chhansak thin avangin ka lawm e. Hmannia taksaa bawk rawn zawttu che kha ka ni a, ka sawi chiang lo deuh nge ni arngeng ang deuh khan min ngaihsak a; mahse, a ni hauh lo. Ka taksaah hian bawk mum ruh deuh, a len lam chu marble 1/3 ang vel a ni ang, hi a awm a, a rawn pawng chhuak chuang lo, khawih hian a ruh tel mai a, khawih zawngin a na deuh bawk. Engtia lo awm nge ni ang? Hlauhawm a ni em?

Chhanna: I harsatnate i rawn thlen nawn leh a, kei pawhin lawmthu kan hrilh ve ang che. Hemi ruala chhiartute tana ka hnutchhiah duh chu doctor kan rawn a, an treatment min chawh kan ngeih nghal lo a nih pawhin mi dang pan nghal mai lovin kan doctor ngaite kha rawn hmasa leh thei ila a tha hle. Mi dang inentir emaw, second opinion lak emaw hi damlote thu thu a ni a, keini doctor lam pawhin kan hrethiam a, damlote rilru dam thlapa enkawlna an dawn hi kan duh ber chu a ni.

Chuan, arngeng a ni e ti ang zawngin i lo dawngsawng a nih hmel a, i kum zat atang khan a ni thei zinga mi leh a common pawl a ni e ka ti zawk a. Engpawh nise, tuna i rawn sawi hmang atang hian thlan inkhawl vun chhungrila awm Sebaceous Cyst emaw thau hlawm Lipoma a nih duh hmel ta ber a. Heng pahnihte hi thil hlauhhawm an ni lo va, han khawih vak pawh a tul hran lo. Mahse, an thang emaw, infection a awm vang emawa a vung a nih emaw chuan zai chhuah pawh a ngai thin. |ha berah chuan Skin Doctor lo inentir thei la, a nihna dik (Correct Diagnosis) te pawh an hre thei ngei ang a, an enkawl dam theih che ka beisei a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?