Doctor Ka Zawhna (July 8, 2018)

Zawhna: Ka pu, tlangval ka ni a, zu in ve zeuh zeuh hi ka ching a; mahse, ka in tam lem lo; chuan mei ka zu nasa bawk. Tunlai hian ka lu a na a, ka luak bawk, ka lu nat hian ka mit kote hi a na vek zel a, chuan ka thawte hi a hah leh zel bawk nen, Pantop DSR chu ka ei mek a, ka pum that loh vang a ni thei ang em? Ka hlauthawng ru deuh khawp mai, min pui thuai la ka lawm ngawt ang.

Chhanna: I habit han en chuan a hrisel hran lem lo hle mai. Pum lamah pawh fel lo i nei ngei chuan a rinawm. Meizuk hian pumpui acid a titam duh khawp mai a, riltam laia zuk te, zing thawh hlima zukte hi pumin a haw zual hle. Zu in zeuh zeuh i chin avangin i chaw ei hunbi pawh a mumal loh phahin a rinawm a. Engpawh nise, lu na i sawi avang hian i Blood Pressure check hmasak a pawimawh hle mai. Meizuk hian thisen zam a tizim thin a, chu chuan BP a tisang thei a ni. I BP a san chuan damdawi i ei ngei a tha bawk ang. I meizuk phei chu i sim a tul hle. A dang lehah chuan i mit check-tir a pawimawh viau. Mit power dik lo hian lu na a siam duh a, i luak chhuakte pawh hi i mit fel loh vang a ni thei bawk. Tarmit bun lai i neih phei chuan i mit power check nawntir a ngai tihna a ni thei bawk. Pum lam harsatna pawh chu i nei tel ngeiin a rinawm a, chumi vangin Endoscopy hmangin i pum lo enchiantir thei la, damdawi ei thawr ngawt ai chuan a tha ang.
&&&&

 

Zawhna: Ka pu, ka taksaah hian bawk te reuh tete hi a awm a, a bawk hi a lian lem lo. Ka malah te, ka dulah te hian a awm a, han khawih hian a na deuh a tih a ni mai, tih lohvah chuan a na lem lo. Engtia enkawl chi nge? A hlauhawm em? Min puih theih chuan ka lawm viau ang.

 

Chhanna: I kum zat, mipa nge hmeichhia i nih tih te i rawn sawi tel lo va, han sawi tel la chuan a chhan ni thei turte pawh kan sawr zim thei deuh tur a nia. Engpawh nise, a hlauhawm lo turah kan ngai phawt ang. Tleirawl emaw nula/tlangval la naupang deuhah chuan arngeng hi a common khawp mai a. Hmai chauhah awm lovin dul thuarah te, zakhnuai, kaihza, kap bawr leh ban leh malpuiah te pawh a awm fo thei a ni. Khawihin a na deuh nia i sawi avangin arngeng hi a rinawm viau. A dang lehah chuan Lipoma kan tih mai, vun hnuaia thau hlawm a awm thei bawk. Bawk chu vun hnuai deuh nge a awm a vun pawn lamah a rawn thang tih i sawi tel lo va. Vun pawna rawn bawk chhuak a nih chuan singsihlit kan tih maite a ni thei a, hetiang hi virus chi khatin a thlen avangin a darh duh phian bawk. Sex hman atangin a inkai theih a ni. Vun bawk hi chi hrang hrang a awm thei a, kan hriat tur pawimawh chu – a thang em? A rawng a danglam em? Hnai ang deuhte a insiam ngai em? Na/tur a awm em? A phuhlip em? tih te a ni. Heng hi lo chik deuh thei la. Duhthusamah chuan a taka enchian a tha hle mai. Chuvangin, Skin Doctor lo inentir thei la, an pui thei ngei chein ka ring. A chhan a zira enkawl ngai a nih a rinawm a, a thenah phei chuan damdawi ngai lovin a enkawl dam theih bawk. Hlauhawm lo turah ngai phawt mai ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?