Doctor ka zawhna (June 10, 2018)

Zawhna: Ka pu, mipa tleirawl kum 19 ka ni a, ruih theih thil, zuk leh hmuam, zu engmah ka ti lo. Chhunah labour hna thawkin ka inhlawh thin a, kar hnih vel chu ka inhlawh tawh. Kan hnathawh tlangpui chu cement chawh te, lei laih te, rod phuar te a ni a, kan ding reng thin vang nge zanah te ka mu tha thei ngai lo a, ka ke te hi a kham thei thin hle. Eng ka tlakchham vang nge ni ang? Min puih theih chuan ka lawm hle ang.

Chhanna: Mipa tleirawl thalai awm awl mai mai lova rim taka hna thawka i inhlawh hi a hmasain i chhuanawm hle mai ka’n ti ang e. Hnathawh hi a zahawm a, eng hna pawh thawk hreh lo tura kan infuih sauh sauh hi a tha a ni, a bikin mipa phei chu. I hnathawh dan erawh a hahthlak hret tih a hriat a, rei tak din ngai chi a nih vangin i ke enkawl dan hi a pawimawh viau.

Pakhatnaah chuan kan din rei lutuk hian kan ke atanga thisen let tur hi a let chak thei lo va, keah a tling thei a, chu chuan thisen zam puar (varicose vein) te a siam duh viau. Kan dinna lei hi a rualrem loh chuan kephah hian a tuar duh viau bawk. Pheikhawk hi uluk a tha hle. A man tlawm tê pawh bun nuam ni thei se, tawt lutuk bun loh a tha khawp bawk. I hnathawh ang chi atan phei chuan a hnuai dup lam chi ni thei se, chu bakah chuan kephah hnuai kual (arch) mil tak pheikhawk ni thei se, chutiang chuan kan rihna a sem rual a, ke tan a hahdam thlak bik a ni.

A dang lehah chuan ke char a awm rei lutuk khan tihrawl a chau duh a, a kar lakah thut hahchawlh te, khup thlep leh taksa han stretch te a pawimawh bawk. Chawlh hunawl neih apiang hman tangkai tum la, rualrem taka thut hahchawlh te, ke phah hnuai ball dup-a hrual te, kephah tuia han chiah daih te, zan mutna ah min15-20 vel lukhama ke kam kân te han ti la, chu chuan a pui thei bawk ang che. Eng tlakchham vang chu a ni kher lovin a rinawm. Taksa a hah lutuk erawh chuan tuiril lam in tam a pawimawh a, ORS te hi in fo la, tha kham chu a chhawk duh viau bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?