Doctor ka zawhna (June 17, 2018)

Zawhna: Ka pu, mipa kum 23 ka ni a, ka serh hi a hmawr, a lian lai tak hi a chhung a na a, ka serh atangin hnai tlem tetein a chhuak reng a, a rimchhe em em bawk a. Engtia enkawl tur nge min hrilh thei em? Min puih theih chuan ka lawm hle ang.Zawhna: Ka pu, mipa kum 23 ka ni a, ka serh hi a hmawr, a lian lai tak hi a chhung a na a, ka serh atangin hnai tlem tetein a chhuak reng a, a rimchhe em em bawk a. Engtia enkawl tur nge min hrilh thei em? Min puih theih chuan ka lawm hle ang.

Chhanna: I zawhna rual hian nupui i neih leh neih loh te, invenna tel lovin sex i hman leh hman loh te han ziak tel ta la, chhan a awlsam zual deuh awm e. A chhan pawh i insawiselna hi serh lam harsatna a ni a, mipa, nangmah ang rualah chuan a chhan common ber pawl tur chu sex hman atanga inkaichhawn natna “Sexually Transmitted Infection (STI)” eng emaw ber a nih duh hmel vang a ni. STI hi chi hrang tam tak a awm a, a hrik thlen theitu pawh eng emaw zah a awm a, chung zingah chuan HIV pawh a tel a ni.

Issue hmasa lama kan rawn ziah tawh, a lem kan rawn lantir tawh ang khan mipa sazua insawiselna awm hi a chhan awm theite chu zun kawng lam fel lo te, chi rawn insiamna leh a rawn chhuahna kawng fel lo vang te a ni ber a. STI thlen thei hrik i lo kai a nih chuan a vai hian a tibuai thei a, a thenah chuan zun kawng lam chauhte an insawisel a, thenkhat thung chu tilmu vung ringawtte a thlen thei bawk. Tuna i rawn insawisel dan han en hian i serh hmawr (lik) a tivung a nih hmel a, chubakah chuan zun chhuahna kawng urethra a tivung a nih hmel bawk. Zun kawng chhak lam thleng pawhin a effect tel a rinawm.

STI natna hi kan sawi tak angin invenna hmang lova sex hman atanga kai a ni a. Mipa aiin hmeichhiaah a lang har a, a then phei chu insawiselna nei mang lovin rei tak an awm thei a ni. Chutiang avang chuan mipa tam tak hi an ngaihtha ngawt thin a. Hmelah te, pawn lam lan danah hriat ngaihna a awm si loh avang hian nupa kar a nih loh chuan sex hman loh theih tluka him a awm lo. MSACS lamin mipui zirtir nan bus leh taxi, maxicab nen lam an hnungah invenna hman pawimawhzia leh HIV laka him kan duh a, sex kan hman duh tho si chuan invenna hman ngei ngei tur tih te an tartir a, kan la fimkhur thei chuang reng reng hlawm lo. Chutiang avang chuan Mizoram pawh India ram state-a mipui tam dan teha HIV kai tamna ber kan ni der chu a nih hi.

Doctor i inentir hreh a nih ngei a rinawm a; chuvangin, damdawi chawh nghal che a thain ka hria a. Chumi hma chuan VDRL test hi lo ti hmasa phawt la, Laboratory-ah chuan an ti thei deuh vek ang. Hei hian Syphilis i vei ngei vei lo a en dawn a. He test hi a positive a nih chuan a treatment a dang leh dawn a; chuvangin, doctor i inentir ngei a ngai tawh ang. Sex i hmang miah lo emaw i la virgin a nih chuan thuhran nise, VDRL test pawh hi a tul kher lo ang a, damdawi inchiu i tih bawk loh chuan HIV test pawh a tul kher lo thei. Eng emaw zawng bera exposure i nei a nih chuan – invenna tel lova sex hman emaw, drugs a inchiu i ching emaw a nih erawh chuan thla thum hnuah HIV test lo ti ngei ngei ang che. Chuan, sex i hman vanga insawisel i nih chuan i sexual partner (bialnu emaw kawppui) khan damdawite hi a ei ve ngei a tha bawk ang. I zun test (Urine R/E) pawh lo ti ngei ang che.

I damdawi ei tur leh ei dan tur te chu hetiang hi nise.

1. Tab. Pancef (200 mg): mum 1 ni tin vawi hnih ni 5 chhung ei tur.

2. Tab. Azithral (500 mg): mum 2 a rualin vawi khatah ei nghal tur; a bak a ngai lo vang.

3. Tab. Urispas/Flavoxate: mum 1 ni tin vawi 3 ni 5 chhung ei tur.

4. Tab. Zerodol-SP: mum 1 ni tin vawi 2 x ni 5.

Hei bakah hian tui in tam hle tur a ni a, i ni khat in thin let 3 emaw lai i lo in dawn nia. I zun a siam tam ang a, chu chuan i zun kawng a thuah fai hma bawk ang. He zawhna ka chhan atanga ka ngaih pawimawh em em chu – a lo chhiartu, a bik takin thalai sex lama inhmang rual tawh te chuan tunlai chhan ah hian mi tumah, kan ngaihzawng te ani hlei hlei hi sex kan hman pui dawn anih chuan invenna hman nachang kan hre ngei ngei tur a ni tih hi. HIV an lo kai palh hian a pawi thei em mai. Lo hmang tawh kan nih phei chuan mahni dinhmun hriat chian a, HIV in test nachang hriat hi a changkang ani tih i hria ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?