Doctor Ka Zawhna (June 24, 2018)

Zawhna: Ka pu, pasal nei lai, nu kum 44 mi ka ni a, fa pathum kan nei a. Kum 3 vel kal ta atang khan ka hritlang khuh hian ka zun ka cheh thin a, a hreawm takzet. Ka khuh nasat deuhte hian a luang zawih zawih thei a ni. Khawngaihin min pui thei em? Engtia inenkawl chi nge?Zawhna: Ka pu, pasal nei lai, nu kum 44 mi ka ni a, fa pathum kan nei a. Kum 3 vel kal ta atang khan ka hritlang khuh hian ka zun ka cheh thin a, a hreawm takzet. Ka khuh nasat deuhte hian a luang zawih zawih thei a ni. Khawngaihin min pui thei em? Engtia inenkawl chi nge?

Chhanna: I insawiselna hi Urinary Incontinence (UI) tiin an sawi thin a, mipa aiin a letin hmeichhiain an nei duh zawk a ni. Naupai te, nau neih te, thi hul te, nerve injury eng emaw ber vangtein a awm thei a. Nau neih harsat, sang rei lutuk te, forcep-a naute cheh chhuah ngai vangte hian a awm duh lehzual a ni. Chutih rualin nau zai chhuahahte pawh nerve injury risk bakah phing (bladder) tih hliam palh te a awm theih avangin UI hi an nei ve fo bawk. A chhan dangah chuan Zunthlum (Diabetes) vanga nerve tha lo te, Stroke vang te, kawngruh tihpalh vangte pawhin a awm thei bawk. Thau lutukahte hian a awm duh bik bawk.

Kan phing hian zun a khawl khawm a, a lo tam a, kan zun a lo chhuah (urge) a awm khan a pangngaiah chuan kan sang a, kan phing tihrawl a lo tang mar a, kan phing atanga zun rawn chhuahna urethra hualtu tihrawlte an lo inthlah zawi thung a; tichuan, kan zun chu a rawn luang chhuak ta thin a. Mihring hrisel pangngaiah chuan kan zun hi 200 ml vel a lo tlin khawl hnuin zunchhuak kan feel tan a, a tlangpuiin 300-400 ml velte kan khawl hnuah kan zung thin. Zan lamah chuan 800 ml dawn laite pawh kan khawl thei.

Zun chhuak kan feel theih nan hian kan nerve function a pawimawh khawp mai a, stroke emaw, zeng emaw vanga nerve-in hna a thawh loh chuan zun chhuak an feel thei tawh lo va, a tam lutuk hunah amahin a rawn inpaih thawl ta tawp mai thin a ni. Kan zun a chhuah viau pawhin he phing zun khawl dan system, tihrawl tangkawpte hi a function mumal chuan kan insum thei a. Mahse, kan sawi tak chhan hrang hrang vanga he system hi a buai chuan khuh te, tlan lai te, hahchhiau mai maite hian insum hman hmain zun a rawn in-release thut ta thin a ni.

A chhan dang eng emaw awm theite kan sawi bak a la awm a. Chuvangin, i harsatna hi enkawl hmain a chhan hriat phawt nan Ultrasound te, zun kawng infection i neih leh neih loh hriat nan zun test (Urine R/E) te, phing chhung endik (Cystoscopy) te thleng pawhin a tul thei ang. Tin, Bladder stress test te pawh endik theih a tha viau. UI hi chi hrang hrang a awm a, i insawisel dan atang hian Stress Incontinence an tih ang hi a nih hmel ta ber a. Zun zawh vek hnuah zun chambang awm zat (residual urine volume) te pawh Ultrasound hmangin teh a ngai thei ang.

Investigation-te hi i tih chuan a chhan eng emaw ber an hmu thei a, chumi azir chuan enkawlna pek i ngai bawk ang. A chhan mumal tak hmuh chhuah a awm loh erawh chuan pelvic exercise hmang te leh damdawi hmangte pawhin enkawl i mamawh thei bawk ang. A nasa zualah chuan zai (surgery) te pawh an mamawh thei bawk. Engpawh  nise, a hnuaia Kegel Exercise hi lo ti ve hrim hrim la, a result a lang nghal vut vut lo a nih pawhin hma i sawn phah ka beisei.

He Kegel Exercise kan tih hi phing tuamtu tihrawl (bladder muscles) te exercise hmanga control dan a ni a. A awmziaah chuan i serh khan marble hip lut tur angin insuangtuah la, chhuatah i mu thluang ang a, i dul thuar tang tel miah si lovin i kap bawr tihrawl kha han tang ta la, hemi i tih lai hian thaw ip loh tur a ni bawk ang. I ip lai hian zawi muangin vawi thum thleng chhiar la, chutah i thlah leh ang a. Chutiang chuan vawi 10 han ti la. Hetiang hian ni khatah vawi hnih tal tih lo tum ang che. Hei hi Pelvic Floor exercise an ti bawk thin. Sawi angin kar 3 dawn lai hnuahte a result hi a lang chauh thei. Engpawh nise, ka sawi tak angin investigation chu lo ti hrim hrim la, a result hi Surgeon entir leh la, damdawi chawh i ngaih pawhin tha takin ei la, hma i sawn phah ngei ka beisei.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?