Doctor Ka Zawhna (June 3, 2018)

Zawhna: Ka pu, hmeichhia kum 38 mi ka ni a, hun rei tak atang tawh khan pum damdawi ka ei tawh a, ka pum chu a dam thei bawk si lo va, a chang chuan a sa hum hum a, ka thin te a na a, damdawi ka ei loh chuan ni khat pawh a tawrh theih loh. Tunah phei chuan ka ei reng chung pawhin a ziaawm thei lo va, a hrehawm khawp mai. endoscopy pawh ka ti nasa tawh a, damdawi ka ei nasa tawh bawk si, a pawi thei em? A la dam thei ang em? Khawngaihin min lo pui teh.

Chhanna: I habit (thil chin, a bikin zuk leh hmuam) te i sawi hran lo va, ruihhlo (zu tiamin) lam leh zuk leh hmuam i fihlim angah lo ngai ta ila. I khawsak phung han hriat belh a châkawm hle mai. Nu valai, fa la naupang deuh enkawl, buai tak, zan lam pawh mu tha lem lo, mut harsatte pawh i ni thei ang. I hnathawhna lam i sawi tel lo bawk a. Hengte hi a pawimawh nachhan chu ka rawn ziah fo tawh angin kan ni tin khawsak phung hian kan hriselna a nghawng lian em em a. Natna kan neih tam tak hi Lifestyle Disease zinga an sawi a ni fur tawh a ni.

Engpawh nise, BP sang leh/emaw zunthlum (Diabetes) i nei em? Thyroid lam harsatna i nei tel em tihte hriat a tha hle. Heng natna te hian taksaah stress a siam fo a, chu chuan pum lam harsatna hi dam hlei thei lovin a siam fo mai a ni. I BP, blood sugar leh Thyroid function test te lo ti thei la a tha hle mai. Rilru vei neih runte hian rilru lam natna Anxiety Disorder a thlen fo mai a. Chutiang nei laklawh chu an stress level a sang a, stress a tam chuan pumpui acid insiam a nasa zual a, pum lawng te hi a dam mawh bik hle.

A dang lehah chuan Irritable Bowel Syndrome hi ril lam fel lo a ni a. He natna neite hian pumpui lam insawiselna dam hlei thei lo hi an nei tel duh hle. Nachhawkna ei nasat vangte hian pumpui hi a buai duh khawp mai bawk a. Damdawi thenkhat pum tilawng duh chi pawh a awm bawk. Chutih rualin pumpui lawng damdawi antacid ei nasat lutuk hian pum chet a tibuai fo bawk.

Duhthusamah chuan Gastroenterologist te inentir thei la a tha hle. Medicine speciailist te pawhin i harsatna hi chu an puih theih ngei che ka beisei. Psychiatrist (rilru lam doctor) te hi pan nachang kan hre lo fo thin a, kan zah vang te pawh a ni thei bawk a. Anxiety Disorder vang te i lo nih phei chuan anmahni enkawl chi ngei i ni ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?