Doctor Ka Zawhna (March 19, 2017)

Zawhna: Ka pu, mipa kum 35 mi ka ni a, ka zun kawngah lungte awm vangin ka buai fo thin a, vawi hnih min chhut kehsak tawh a; mahse, a awm leh thin. Lung nawi ang hi ka zung chhuak leh zeuh thin a, ka zun erawh a thi ngai lem lo. Zun kawnga lung awm hi a tihdam emaw, a reh thei tak tak lo emni? A ninawm khawp mai a, engtia inenkawl chi nge ni ang? Min puih theih chuan ka lawm hle ang.

Chhanna: Zun kawnga lung awm i tih chuan i kal (kidney)-a insiam hmasa, chuta tanga rawn tal chhuak leh rawn tla thla chu a nih hmel a. Vawi khat a awm tawh chuan a awm nawn leh theihna chance hi 60-80% vel lai a ni an ti a; chuvangin, i nei fo mai pawh chu a hriatthiamawm viau. A ninawm duh khawpin a rinawm a, a chang chuan na hre mang lova an zun chhuah chang a awm a, a thenah erawh chuan na azawnga na ber chi a thlen fo. Patling meuh pawh hi an thlan a tla zawih zawih thei reng a ni.
Zun kawnga lung insiam hi eng vang nge han tih mai tur ber a hriat theih loh a, fel lohna awm miah lo pawhin an nei fo tho mai a, chuvang chuan in vanduai a ni ti ang zawngin han sawi phawt mai ila. A tihreh dan, enkawl dan chungchangah pawh hian ngaihdan hrang tam tak a awm bawk. Kan taksaa insiam chemical hrang hrangte hi kan paih chhuahna kawng lian ber chu kan kal hi a ni a. Kan kal hian lo filter-in taksa mamawh loh apiang chu zunah a paih chhuak mai thin a. Mi thenkhat chu an kalah heng chemical te hi a inkhawlkhawm a, chuta tang chuan lungte hi a lo insiam mai ta thin a ni. Lungte a insiam kawngah hian zun insiam tam leh tam lohah a innghat lian viau mai thung a, chuvang tak chuan a inven nan pawh hian zun tam hi an chawh ber chu a ni a, tui in tam a pawimawh hle tihna a ni.

Kidney atanga zun rawn insiamna leh a chhuahna collecting system hi chhan hrang hrang vangin a buai ve thei a, pianken eng emaw tak vanga buaite pawh a awm thei bawk. Kidney hi hrik vanga infection a awm hian zun insiam leh paih chhuah hi a tibuai fo va, chu chuan lung a siam thei bawk. Tin, kidney atanga zun rawn chhuahna dawt, pelvis tia kan sawi leh a zunkawng ureter te hi eng emaw vanga a kawih/inthlep vangte pawhin lung insiam hi a awm thei bawk a ni. Ruhseh chi khat, Gout neite hi an taksaa Uric Acid insiam a tam bik vangin uric acid stone an nei duh viau a, taksain calcium a paih chhuah nasat lutuk vangin lung insiamte pawh a awm fo bawk a ni.

Engpawhnise, i kidney ni lo, i zunkawngah zawk a rawn chhuak a nih chuan a lawmawm lam a ni phawt mai a, a chhan chu kidney-ah a tan palh chuan leh, a than belh zel chuan hriat mang lohin kidney a tichhe ve thei a ni. Tin, kidney stone thenkhat chu insawiselna nei miah lovin thenkhat chuan an pai fo bawk a, routine exam an tiha an hmuhchhuah nawlh nawlh a awm fo mai. I kidney leh zunkawng lam fel lo a awm leh awm loh hriat nan X-Ray chi khat, IVU an tihtir tawh ngei chein a rinawm a. Chu bakah chuan Ultrasound pawh i ti fo tawhin a rinawm. Hetiang harsatna i neih avang hian routine ang deuhin kum khatah vawi 2 vel tal chu ultrasound scanning lo ti thei la a tha viau mai.

A enkawl dan kawngah chuan kan sawi tak tui in tam hi a pawimawh khawp mai a. Ni khatah 4-5 liter vel tak in thei la, chu chuan eng emaw chen chu a puiin a veng ngei ang che. Taksa chet tam a pawimawh viau mai bawk a; chuvangin, kea kal tamte ching thei la a tha viau mai bawk. Zun kawng infection laka inven a pawimawh vangin serh silfai ngunte pawh a pawimawh ang. I zun test-ah eng crystal nge tamte pawh hriat a tha viau a, chumi azir chuan ei leh in lama insum ngai a awm thei a, Dietician i lo rawn bawk dawn nia.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?