Doctor Ka Zawhna (March 25, 2018)

Zawhna: Ka zawhna chu, pum puar ul, kawpuar ang maia awm, vawih vak vak mai te, ek pawh tlem tê-a ek, ei leh in inmil lo lutuk a ek tlem si hi enge awmzia?Zawhna: Ka zawhna chu, pum puar ul, kawpuar ang maia awm, vawih vak vak mai te, ek pawh tlem tê-a ek, ei leh in inmil lo lutuk a ek tlem si hi enge awmzia?

Chhanna: A hmasain kan chaw kalkawng, ek insiamna thlenga a awm dan hi lo sawifiah hmasa dawn ila. Heng organs te hi Gastro-intestinal system (GIS) kan ti a. Chawkawng (esophagus), Pumpui (Stomach), Rilte (Small Intestine) leh Rilpui (Large Intestine) te an ni a. Kan pumpui atang hian kan chaw inthial sawm hi a intan deuh ber a. Rilte-ah a tlak thlak lai hian kan taksa mamawh tam tak chu lo hip chhuakin thin (liver)-ah a lut a. Chumi digest-na atan chuan mit tui (bile) te, pancreas siam chhuah pancreatic enzymes te hi an pawimawh hle. Kan chaw ei rilpuiah a luh tawh hi chuan kan mamawh tawh loh te ek atan a siam deuh ber tawh a ni.

He chawkawng thui tak maiah hian a chet dan mumal tak a awm a, chu chu kan nervous system hian a enkawl a, a eng lai mai pawh hi buai awm se, chu chuan ril chet a tibuai a, boruak chhia a insiam tam bawk a. Chu mai bakah chuan thin function buai te, pancreas function fel lo te a awmin he system hi a tibuai tel vek thei bawk a ni. Kan GIS chet dan leh hnathawh dan te hi kan ei leh in dan phung te, kan khawsazia te, zuk leh hmuam lam chi te hian a tibuai fo thei a. Ei leh inah pawh uar fal bik kan neih te hian kan chaw lakluh a in-balance loh avangin ho tete-ah insawiselna a awm thei bawk a ni.

Hei bakah hian mihring kan inan loh avangin ei leh in inang, khawsak phung inang rau rauah pawh danglamna a awm fo mai bawk. Pumpui chak lo kan tih maite hi chu a lan danah chuan digestion lam fel tawk lo a nih duh hmel ber. Pum chhungah chaw thial dan a dik tawk loh chuan gas a insiam hma a, chu chuan pum a tipuar a, vawih a siam tam a, a thenah kawthalo mai mai te a thlen laiin thenkhat thung chu ek khal emaw ek mumal lo (constipation) te a thlen thung. Entirna tha ang reng tak mai chu kuhva ei nasaah hian a ni. Kuhva rei tak chhung ni tin eng emaw zah an lo ei tawh chuan an taksa kha kuhva tel a function turin a lo in-adjust tawh thin a, kuhva an nghei veleh hian pum nuam lo, puar el ul, kawthalo thut thut angte an insawisel fo mai a ni.

Kan ei leh in mumal taka kan taksain a digest theih nan hian kan tih tur pawimawh tak tak a awm a. Chungte chu zan mut hunbi mumal tak neih a, kan taksa mamawh zat mut te, ei leh in hunbi mumal tak insiam te, taksa mamawh zat tui in te, zuk leh hmuam ti nasa kan nih pawhin riltam lai/kaw ruah laia tih loh hram hram te, taksa chet leh sawizawi tam te, zu in mi ah phei chuan zing zu leh riltam laia zu in loh te, hengte hi a pawimawh em em a ni. Khumbeta nate hian ek khal an neih duh bik nachhan pawh an taksa a che tlem a, chu chuan an ril chet a tibuai a, ek a khawl khawm a, ek khal a insiam ta mai thin a ni. Thin function buaiahte pawh a awm duh hle. Chutiang avang chuan taksa chet tam hram hram a pawimawh hle.

GIS lama insawiselna, tuna i rawn sawi tiamin common zualte chu – pumpui lawng (gastritis), pumpui acid irh let (gastro-esophageal reflux disease), peptic ulcer syndrome, leh thin function buai te an ni a, a dang lehah chuan Irritable Bowel Syndrome kan tih hi a ni bawk. Engpawh nise, Endoscopy lo ti thei la chu a tha khawp mai a, hemi hmang hian i pum lam fel loh chhan a hriat theih anga, a lo fel a nih pawhin a chhan dang ni awm a hriat theih bawk ang. Kan sawi tak nunphung/khawsazia, ei leh in te, zan mut tam/that leh ei leh in uluk te pawh lo tum la, hma i sawn theih ka beisei.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?