Doctor Ka Zawhna (March 3, 2019)

Steroids chungchanga kan hriat tur Tulte:
Kan taksaah hian gland tereuh te, kan kal (kidney) chung lama innghat, pawimawh em em mai a awm a, chu chu Adrenal Gland an ti a. He gland hian kan taksa hnathawhna tur atana pawimawh tak mai hormone chi khat – Cortisol a siam a. Chu hormone chu kan taksa a hah emaw, dinhmun hlauhawm emaw hahthlak lo dawngsawng thei tura kan taksa buatsaihtu a nih avangin “Stress Hormone” ti pawhin an sawi thin. He steroid hormone hi kan taksa tan a pawimawh khawp mai a, kan taksa a blood sugar enkawlna kawngah a pawimawh a, kan taksa khawl hrang hrang chetna tura kan ei leh in semzai kawngah a inrawlh thuk a, eng emaw vanga vung a lo awmin (inflammation) a control-tu ber zinga mi a ni bawk a, kan BP control kawngah a inrawlh thuk hle bawk. Hei mai bakah hian kan taksaa tui leh chi awm zat control kawngah pawh hormones pawimawh em em a ni tel bawk a ni.
Chutiang anga pawimawh tak mai chu a hranpaa siam chhuah a ni a, chutiang chu synthetic steroids tiin kan sawi thin a, kan hriat lar tur zingah chuan Prednisolone, Betamethasone, Triamcinolone, Methylprednisone te hi an ni awm e. Hei baka Synthetic Steroid dang awm leh chu Anabolic Steroids an tih mai, infiammi leh taksa siamna (body building) atana an hmanhote hi a ni leh bawk. Anabolic steroids hi chu Testosterone Hormone atanga siam an ni thung. A dang la awm leh chu hmeichhe hormone bik Estrogen atanga an siam (entirnan – naupai venna damdawi) te hi a ni ve leh thung. Steroids lam chi an nih vek avangin a chunga kan sawi an hnathawh dan hi inanna lai a tam a, chung zingah chuan kan taksaa tui leh chi che velah an inrawlh avangin taksa ah tui leh chi chambang (salt and water retention) a awm phah thei a, chu tak chu steroid ei te an chaw ei a lo tui a, an thau belh nachhan hi a ni.
Steroids, a bikin Corticosteroids te hi a hman tangkaina a tam khawp mai a. Chung zingah chuan Inflammation control nana kan hman hi a pawimawh ber chu a ni ngei ang. Inflammation kan tih hian taksa peng khawi lai emaw a lo pem/pun/vung a, chumi lai chu taksa in control a tum avangin timur (cells) ho khan an bawh vak a, cells chhia an ei ral a, a pun belh tur an veng bawk thin a, chutiang chu anti-inflammatory response an ti thin a ni. Kan intihpem a, a pem lai eng emaw hnuah a lo chhah deuh leh vung ang hi a ni ber. Kan taksa venhim nana hetiang response hi lo awm ni mahse a nasat lutuk erawh chuan harsatna a siam thei a, organ pawimawh mit (eyes) ah te phei chuan mitdel te a thlen hial thei a ni. Chutiang response nasa veng tur chuan steroid hi an hmang thin a ni. Chu lo leh chu auto-immune response an tih mai a awm leh a, hetiangah hian kan taksa vengtu sipai (cells) ho khan kan taksa peng tho kha an bei ta thin a, chutiang natna kan hriat lar tur chu SLE, Rheumatoid Arthritis (Ruhseh pui) kan tih te hi an ni.
Awle, steroids damdawi te chu an pawimawh em em mai a, natna chi hrang hrang – vun, mit, chuap natna tam tak (asthma te), kal tha lo te leh kal thlakah te, SLE leh Arthritis ang te, thisen cancer thenkhatah te, thluak vung leh infection atante hman a lo ni thin a ni. Chuap lam tha lo inhaler hman ngai chihoah phei chuan steroid hi an chawh fo bawk. An pawimawha an tangkai rual rual hian a tha lo zawngin hna an thawk ve thei viau (side effect). Chung zingah chuan thau vak te, zunthlum neih phah te, fa neih theih loh te, thi neih buai te (mipa ah chuan chi chak lo te), lung lam natna leh thluak lam hnathawh buaite pawh a thlen thei a ni. Damdawi atana chawh anih pawhin an mamawh loh huna tawp thut chi ani ve lova, zawi muanga a dose tihhniam tial tial phawt a ngai a ni. Kan rawn tarlan ang khan thenkhat chuan chaw ei tui nan leh intihthauna damdawi atante an lo hmang thin. A bik takin khawchhak lam damdawi, a hming leh a damdawi content pawh hriat hleih theih loh a tawng danga inziakte hi an duh dan angin an lo ei tawp mai thin a, hetiang hi a tha lo hle mai a, damdawi lam chi reng reng, a bik takin steroid lam chi phei chu doctor chawh anih loh chuan ei loh a him ber. Steroid hi damdawi tangkai tak ni mah se hman fimkhur a tul hle a ni.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?