Doctor Ka Zawhna (May 6, 2018)

Zawhna: Ka pu, mipa kum 56 mi ka ni a, hrisel ang reng tak ka ni thin. Tun hnai kum 2 chho vel atang khan ka khup leh ke phah hnuai hi a na ta fo mai a. Ka khup phei chu a vung leh zauh bawk thin. Ruh doctor ka inentir a, ruhseh i nei ve tan a nih hi a ti a. Taksa indim deuh a ngaih bakah damdawite pawh min chawh a, han ei lai chuan ka zia mai a; mahse, a rawn chhuak leh thin. Kan awmna veng hi chhuk chho a tam a, step kalte a ngai bawk nen, ke a kal a har duh viau mai. Engtia han inenkawl chi nge maw ni dawn le?Zawhna: Ka pu, mipa kum 56 mi ka ni a, hrisel ang reng tak ka ni thin. Tun hnai kum 2 chho vel atang khan ka khup leh ke phah hnuai hi a na ta fo mai a. Ka khup phei chu a vung leh zauh bawk thin. Ruh doctor ka inentir a, ruhseh i nei ve tan a nih hi a ti a. Taksa indim deuh a ngaih bakah damdawite pawh min chawh a, han ei lai chuan ka zia mai a; mahse, a rawn chhuak leh thin. Kan awmna veng hi chhuk chho a tam a, step kalte a ngai bawk nen, ke a kal a har duh viau mai. Engtia han inenkawl chi nge maw ni dawn le?

Chhanna: Ruhseh kan tih hian Arthritis tihna a ni ber a, chi hrang hrang 100 chuang lai mai a awm a. Chung zinga a common zualte chu Ostearthritis, Rheumatoid Arthritis, Gout, Lupus (SLE kan tih angte hi), leh allergy vanga awm Reactive Arthritis te hi ani a. Damdawi thenkhat hian a thlen thei bawk a, chung zingah chuan steroid damdawi te, cancer damdawi thenkhat te leh nachhawkna atana hman aspirin, brufen kan tih ang te hi a common zual an ni bawk. I kum zat ngaihtuah chuan insawiselna dang i neih bawk si loh chuan Osteoarthritis hi i nei ve anih a rinawm viau mai.

Kan ruh chuktuah lai apiang (Joints) ah hian ruh lehlam lehlam hmawr hi ruhno chi (cartilage) in a tuam a, hei hi ruh hlang a innawk nat loh nan leh a khem emaw pem hma loh nana veng tu ani a. Chutah ruh chuktuah lai tuamtu hamda (Synovial membrane) a la awm leh a, hei hian ruh chuktuah lai chu a tuam a, a chhungah tuihnang tlem (Synovial fluid) a siam bawk a. Kan hriat thiam dan tur chuan motor ah shock a nat loh nan shock absorber an hmang a, a ti nal tu atan Grease emaw oil an thun tel ang hi ani ber awm e. Kan ruh chuktuah lai te hi pem emaw intihpalh laka veng turin tha (ligaments) in a tuam chhuak leh a, chutah ruh chuktuah a chet hun a a inthlep emaw mar nasa lutuk tur ven nan tihrawl (muscle) leh tihrawl nem chi (tendon) ten an veng leh bawk a ni.

Kan taksa rihna (weight) hi a lo dawl tu ber te chu hnungzang ruh (spine), khel ruh, khup, leh kan kephah a ruh tereuhte te inzawm te an ni a. Heng ruh chuktuah te hi taksa a lo rih lutuk chuan leh hman rim a lo nih chuan cartilage te hi an lo ral ve tial tial a, synovial membrane hi a lo chhah a, synovial fluid a lo insiam tlem bawk a, chu chuan chet vel a ti khawr a, engemaw chhete intihpalh hlek ah phei chuan awlsam takin a lo vung mai thin a ni. Chutiang ang chhan dang awm lo vanga a lo thlen chuan Osteoarthritis an ti thin a. Kum a lo tam tial tialin hetiang hi a lo awm ta thin a ni.

Osteoarthritis bik hi a enkawl dan tha nia an sawite chu: taksa chet tam ani. Kan ruh chuktuahte hi over tak ni silova kan tihchet tam chuan a lo nal leh thei a, na awm mah se tihluih ve deuhte pawh a ngai thin. Chutih rual chuan chet nasat lutuk te, rit chawi ngai chi te erawh insum hram hram a tha thung. A dang lehah chuan taksa rihna tihhniam a pawimawh khawp mai. Chumi atan chuan regular exercise leh diet control te a tangkai hle. A dang leh ah chuan stretching exercise hi a tangkai hle bawk. Mahni ngam tawka ruh chuktuah lai tih chet a, a tihrawl leh tha te tinem tura tih mar leh thleh fo a tangkai a, Yoga exercise te hi chutiang atan chuan an hmang tangkai hle. Na leh vung te a awm tel anih chuan damdawi hmanga enkawl a ngai thei bawk ang. A nasa zual ah chuan a ruh chuktuah tih nal nan a injection te, joint replacement te hial pawh a ngai thei bawk.

Rheumatoid arthritis te leh Lupus (SLE tiamin) te hi chu kan taksa timur in kan ruh chuktuah a tih buai vanga thleng (auto-immune disease) ani a. Thisen test atang te in an confirm thin. Chumi control nan chuan damdawi hman a ngai a, steroid te, immunosuppressive drugs an tih mai te hman a ngai thin. Gout erawh hi chu kan thisenah Uric Acid a awm tam vanga thleng ani tlangpui a, a enkawl nan zu leh red meat (bawngsa, vawksa) insumte an chawh a, uric acid control tu damdawi leh a vung rehna damdawi te an chawh tel bawk thin.

I thisen an test leh test loh i sawi lova, rheumatoid arthritis i neih leh neih loh hriat nan blood test tih a tha hle (ESR, CRP, Rheumatoid Factor etc). Tin, X-Ray te pawh tih a tha viau mai. Gout i neih leh neih loh hriat nan Serum Uric acid te pawh lo test tel thei ta la. A chhan a zirin damdawi chawh i ngaih hmel. Mahni duhthu a nachhawkna ei chiam chiam hi kum a tam phei chuan a hlauhawm a, doctor rawn hmasak zel a tha khawp mai.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?