Zawhna: Tleirawl laia cher mi hrim hrim hi engtia tih chi nge? Mi aia chaw ei tlem chuang lo, mu tha tho si, hrisel lohna em em nei hranpa chuang lo; mahse, cher mah mah, thau thei tlat loah hian. Mi thenkhat hian, “Thau ai chuan a tha daih zawk,” an ti a; mahse, cher dan hian tleirawlah chuan a mawi lo ve deuh a; chuvangin, a mawi tawk vel a thau turin engtia tih chi nge ni ang? Damdawi ei chi te awm em?

Chhanna: Mihring hi kan han inang lo nasa khawp a, unau piang hmun rau rau, ei leh in inang pawh hi an than dan leh rih dan hi a in ang lo thei hle. A then chu thau hma em em mai an awm lain thenkhat erawhchu thau thei reng reng lo, fip fang reng mai chi an awm leh bawk. I zawhna laimu pawimawh tak mai chu thau aiin cher a tha daih zawk tih ngaihdan hi a ni. Hetia ngaihtuah mai chuan cher chu an inthazo zawk ang a, an hah har anga tih ang zawng te pawh a ngaihtuah theih ang a; mahse, hriselna kawngah hian lutuk reng reng hi a tha lo va, Ideal Weight (an kum leh san zawng mila an rih) hi a tha ber a ni. Chumi atan chuan Body Mass Index (BMI) hi the nan an hman common ber chu a ni.

Naupang hi kum 10 an lo pelh chhoh hian mipa aiin hmeichhia an thang chak zawk tlangpui a, an thi neihte a lo intan chhoh phei chuan mipa hi an lehpel thuai thin. Mahse kum 14 chhoah chuan mipa than dan hi a rawn chak ve ta thut a (growth spurt), an ei leh in lakluh a lo tam a, an taksa a lo chet tam phei chuan an lak luh aiin an taksain calorie a ei ral a tam ta zawk thin a, an cher mah mah thei a ni. Kum 16 an lo pelh chhoh phei chuan hmeichhia hi an than a muan tan tawh laiin mipa erawh an la than belh zawk fo thung.

Kan taksa rih dan hi kan ei leh inah te, taksa chet (physical activity)-ah te, mut tam leh tlem ah te a innghat khawp mai a, hmeichhia bikah chuan an thi neih hi a pawimawh em avangin an than dan leh rih dan hi a innghat thui hle bawk. BMI hi an then hran danah chuan a normal chin hi 19-24 a ngaih a ni a, 25-29 hi thau mah mah (overweight) leh 30 leh chung lam hi thau dan tha lo leh hlauhawm chin (Obese) a ngaih a ni a, 18 leh a hnuai lam hi cher lutuk anga ngaih a ni. BMI chhut nan hian sawi tak angin san zawng leh rih zawng an hmang a, A formula an hman dan chu – Weight (in Kg) divided by Height (in meter), chumi chhuak chu Heigh bawkin divide leh tur a ni.

Kan taksa rih dan hi kan ei leh in lak luh leh kan hman ral ah a innghat a. Puitling mipa awm mai mai hian ni khatah 2000-2200 calories vel kan hmang ral a, hmeichhiaah chuan 1800 calories vel an hmang ral nia chhut a ni. Taksa chet a tam poh leh hman ral a tam ting mai a ni. Kan ei leh in atanga calorie kan lak luh hi kan taksa hmanral aia a tam chuan kan lo thau mai a, kan hmanral a tam zawk erawh chuan kan cher thung. Chutiang deuh chuan tleirawl hun laiah pawh hian, a bikin mipaah phei chuan an lo harh a, an che nasa a, infiamna lam an tih nasat phei chuan an taksain calorie a hmanral kha a tam lutuk ta thin a, ei leh in lam an lakluh in a pha ta lo thin a, an cher mah mah thin a ni.

Damdawi hmanga intihthauna chi hi a awm hranpa em em lo va, damdawi eng nge hriat chian mang loh lo ei mai duh tawk te hi an awm thin a, tih loh tawp tur a ni. Thauna damdawi tia an zawrh thenkhat phei hi chu Steroids damdawi niin a lang a, heng hi a hlauhawm hle a ni. Pawimawh berah chuan ei leh in lam uluk sela, taksa chet tam dan azirin ei tih that a pawimawh a, zan mut that a pawimawh hle bawk. A puitu atan multivitamins te ei tel se, la thang lai an nih phei chuan calcium tamna chaw emaw bawnghnute te la lut tam se, calcium supplements te pawh ei tel ngei thei se, chaw ei pawhin a hunbi mumal takin ei thei se, chu chuan a pui thei ngei ang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.