Doctor ka zawhna (Sept. 10, 2017)

Zawhna: Ka pu, kum 19 ka ni a, ka period tam thei lutuk a, eng nge a chhan min hrilh thei em? Khawngaihin min puih chuan ka lawm hle ang.

Chhanna: Hmeichhiain thi an neih hi Pathian siam dan a ni a, nau pai thei tura chhul a buatsaihna a ni. Chumi atan chuan tleirawl chhoh tan tirhah hian hmeichhe taksa hi Hormones chi hnih – Estrogen leh Progesterone-in a buatsaih a. Chhul a lo thang a, a bang a lo chhah tan a, chi bawm a chi awm chu thla bia chi pe chhuak turin a insangmar bawk a, chibawmin chi a pek chhuah chiah khan Progesterone hi lo tamin chhul bang a tichhah zual a; tichuan, mipa chi a luh loh chuan chhul bang naupai thei tura inbuatsaiha insiam chhah chu a lo chah ta huk a, hmeichhe thi neih hi a lo awm tan ta thin a ni.

Thi neih dan hi mihring azirin a inang lo thei viau mai. A thenin ni 2-3 lekte an neih laiin thenkhat chu ni 10 dawn lai neite (a aia rei pawh an awm) an awm bawk. Insawiselna dang em em nei lo pawhin thi nei rei tak tak hi an awm thei a ni.

Engpawhnise, a chhan eng nge tih hriat phawt kha a pawimawh lai tak chu a ni. Kan sawi tak angin chhul leh chi bawm fel lo vangin thi nei tam lutuk (Menorrhagia tiin an sawi) hi a awm thei a. Chu mai bakah chuan taksa peng dang fel lo emaw function buai avangtein hetiang insawiselna hi a thleng thei bawk; a bikin Thyroid gland function buai te, thau lutuk vang te, kal (kidney) leh emaw thin (liver) function buai vang te, damdawi thenkhat (nachhawkna, emergency pills emaw oral pills vang te in he harsatna hi a thleng thei a ni.

A chhan common ber zinga mi chu Hormonal imbalance an tih, estrogen leh progesterone buai avanga thleng hi a ni. Chumi chu chhan hrang hrang vangin a awm thei a, i kum zat angah chuan chibawm natna chi khat – Polycystic Ovary/Polycystic Ovarian Disease an tih hi a common pawl tak a ni. Chibawmah chi insiam tam lutuk leh insiam dik lo vanga thleng a ni a, chibawmin hormones a siam dan a buai a, thi neih buai bakah hian tai na te, taksa a hmul rawn tam zual te a thlen tel bawk thin.

A chhan dang ni leh thei te chu thau lutuk emaw, zunthlum nei emaw thyroid lam harsatna avangte a ni. Chuti a nih chuan Ultrasound, Thyroid Function Test leh Blood sugar te check a tha hle mai.

A dang lehah chuan chibawmin a hunah chi a pe chhuak thei lo va (Anovulation), progesterone hormone insiam a tlem a, imbalance a lo awm leh a, thi neih a buai (a tam) ta thin a ni. Chhul lam fel lo – bawk (fibroid emaw polyp), nau tihtlak nana chhul ziah vanga chhul bang felfai lo te, chhul bang rualrem lo leh tihrawl chhah lutuk vang (adenomyosis) te, chhul emaw chhul hmawr cancer vangtein a awm thei bawk. Hetiang a nih leh nih loh hre tur chuan Ultrasound bawk hi tih ngei a tul ang.

Kan sawi tak ang khan hormones buai vanga awm a ni thei a, thisen test-in Hormonal Assay te an ti thin a, bakah Hb hniam vanga awm ve thei te a nih vangin Complete Hemogram te pawh tih a tul a rinawm. Hormones buai a nih chuan damdawi hmanga enkawl ngai a ni a, chutiang atan chuan Gynecologist lo inentir thei la a tha hle mai. Pap smear te pawh tih tel a tul thei ang. A chhan ber hriat phawt hi a pawimawh hmasa ber a, investigation tih ngai ka rawn sawite hi lo ti phawt la, chumi result azir chuan doctor hnenah lo inentir leh thei la, i harsatna hi an puih theih ngei che ka beisei.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?