Doctor Ka Zawhna (Sept. 17, 2017)

Zawhna: Ka pu, kum 20 mi ka ni a, ka period mumal lo thei lutuk a, thla hnihte ka awl thin a. Ka inentir a, damdawi min lo chawh a, thla tam vak lo chu a han ziaawm a, a hnuah ka period lo leh char char a, serh thakte ka nei zeuh zeuh a; mahse, a reh veleh mai thin. A chhan khawngaih taka min hrilh theih chuan ka lawm hle ang.

Chhanna: Thineih chungchang hi issue hmasa lamahte kan rawn ziak tawh thin a. Nula tan chuan thi neih mumal loh hi a hrehawm ngawtin a rinawm. Thi neih hrim hrim hi a ninawm tawh dawn naka laia a la mumal lo lehnghal phei hi chu nunphung a tibuai ngawtin a rinawm. Engpawh nise, nangmah ang thovin mi dang tam tak hetiang harsatna hi nei ve an ni tih kha lo hre phawt la; chuvangin, rilru tihhrehawm phah lo la, i buai chhan hi hriat chhuah tumin enkawl dante pawhi lo ngaihtuah dawn teh ang.
Kan ziah tawh thin angin thi neih hi Pathianin hmeichhiate nau pai thei tura an chhul a buatsaihna hmanrua pawimawh tak a ni a. Thi in neih phawt loh chuan nau in pai thei tlat lo a ni. Chuvangin, thi in neih hrim hrim chuan lawmawm lamah ngai phawt ila, hmeichhia kum 16 tlin tawh hnu pawha thi a la neih loh chuan amahah fel lohna a awm a ni thei a; chuvangin, inentir ngei tur a ni.
Thi neih hi hunbi (menstrual cycle) mumal taka duan a ni a, mihring an inan loh avangin a then a rei a, a then chu ni 2-3 lekahte a zo mai bawk.
Menstrual cycle kan tih hian thi neih tan tirh atanga a lehpeka a neih hun inkar chhung zawng hi a ni mai a. Hmeichhe taksaa hormones pawimawh tak pahnih Estrogen leh Progesterone te hian thi neih hunbi leh a neih dan hi an control a ni ber. Heng bakah hian thluak lam atanga insiam leh thyroid hormones te pawh he thi neih chungchangah hian an pawimawh viau bawk. Chhul bang hi chhawng thum niin a pawnlang ber Perimetrium hnuaiah chhul tihrawl awmna lai Myometrium a awm leh a, chumi hnuai lehah chuan Endometrium a awm leh bawk. Endometrium lai hi thi neih dawn hnaihah hormones te hian an tichhah vak a, a tawpah an hnathawh an chawl thut a; tichuan, hemi bang hi a lo insah thla ta huk a, chu chuan thi neih kha a rawn siam ta thin a ni.
Thi an neih hnu hian chibawm (ovary) chuan hmeichhe chi a rawn siam puitling a, cycle khatah hian a tlangpuiin hmeichhe chi (ovum) pakhat a rawn pe chhuak ta a. Chuvang tak chuan cycle laihawl ni 7-14 inkar chhung hi naupai chance a san lai tak a ni a, taksa temperature te pawh chhe têin a rawn sang thin. Chu ovum chu mipa chi (sperm) nen an intawh fuh chuan naute a insiam tan a, chi kawng rawn zawh pheiin chhulbangah a rawn bet ta a. Chumi hnu chuan thi neih siamtu hormones te hi an hnathawh dan a rawn hrang a, naute insiam tir rawn than chhoh nan endometrium hi an buatsaih ta thin a ni. Nau a insiam loh erawh chuan a ngai têin endometrium hi tichhah tial tialin a tawpah thi neih bawk kha a rawn thleng leh ta thin a ni.
I thi neih mumal loh vangai inentir hian investigation i tih leh tih loh i sawi lo va, a chhan tam tak a awm theih avangin Ultrasound hmangin i chhul leh chi bawmte en chian hmasak ni ta se. Chhulin thlep emawchhul bang dik lo te, chhul bang chhung a awm lohna tura awm (Endometriosis) vangte, chi bawm lamah chi insiam dik lo tam vangte (Polycystic Ovaries) a lo nih chuan Ultrasound hian a hmu thei a. Hormones lam fel loh vang (thyroid function buaitethlengin) a nih erawh chuan Hormonal Assessment te tih a ngai ngei bawk ang a. Chung investigation te chu lo ti leh thei ta la. A result a zirin i dik lohna lai a hmuh chhuah theih ngei ka beisei a ni.
Hetiang kan sawi rual hian chhan mumal awm miah si lovin hmeichhe thi neih hi a buai ve fo mai bawk a. Chung te chu damdawi hmangte pawhin an enkawl dam fo bawk. Engpawh nise, hmeichhe doctor bik (Gynecologist) te bawk lo inentir leh ta la, investigation kan sawi takte kha i tih bawk chuan i harsatna hi an chin fel theih ngei ka beisei.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?