Doctor Ka Zawhna (Sept. 24, 2017)

Zawhna: Zunthlum vei kum 72 a upa ka ni a, ka neihna pawh a rei tawh a ni. Tun hnai deuh atang khan chaw ei dawn atang leh zan mut dawn thleng hian ka zung zing lutuk mai a, tih nep deuh dan a awm ang em? Tui pawh ka inhnem a; mahse, hemi a nih avang hian chawhnu lamah chuan ka in that ngam tawh loh phah a ni. – Khualmawia, MSVT

Chhanna: Zunthlum kan tih mai, thisen thlum a ni mah anga, Diabetes Mellitus hian taksa peng hrang hrang a khawih buai duh hle a, chung zingah chuan mit leh kal (kidneys) te hi a tihbuai tamte chu a ni âwm e. He natna vei hi Mizo zingah pawh an thahnem ta hle a, a then chu inthlahchhawn atanga veite an nih rualin tam tak chu inthlahdah vang, ei leh in lam fimkhur tawk loh vang te, exercise lâk ngai loh lutuk vang te ani thung. Mahni inenkawl uluk hi a enkawlna kawngah pawh a pawimawh ber zinga mi a ni reng ani.

Diabetes hi enkawl that leh that loh a zirin kan sawi tak ang taksa peng hrang hrang a khawih hmain a tlai thei a, upa lamah te enkawl uluk a ngai zual hle. A lan chhuah dan kawng hrang hrang zingah i rawn sawi ang zun ngah lutuk, zun chhuak sek te hi a common viau. Mi thiamte sawi danah chuan ni khat chhunga zun zat hi 3 liters aia a tam chuan Polyuria nei anga ngaih a ni a, kal function buai vangin a awm duh hle a; tin, electrolyte imbalance (taksaa sodium, potassium leh calcium awm dan tur dik lo) vangte pawhin a awm thei bawk a ni. I kum zat ngaihtuah hian mipa bikin kum a lo upat hnua an neih thin, prostate lian (phing hnuaia thal chi khat) vang te pawhin a ni thei bawk.

I zunthlum neih hi i control tha em tih i rawn sawi lang lo va, mahnia awlsam taka test mai theihna, accucheck hmang te hian blood sugar hi in-monitor reng theih hi a tha hle. I zun tam chhan hi hriat hmasak a tha hle mai a, chumi tur chuan blood test – blood sugar (fasting leh PP), serum electrolytes, HbA1c an tih mai te lo test tir thei la, tin, ultrasound hmangin i prostate leh kidney te lo enchian tir bawk la, ni khata i zun zat te pawh chu lo teh thei la, chu mai bakah zun test (protein awm zat, pH leh osmolality) te pawh i lo test tel theih chuan a chhan a hriat theih a rinawm. Chung result te nen chuan medicine specialist i lo rawn dawn nia.

Chu bakah chuan prostate fel lo (phing hnuaia thal vung) hi mipa kum upa lamah a awm duh hle a, chu chuan zun chhuak sek a siam duh hle bawk. Zun dawn pawhin san nasat a ngai fo thin. Phing a tivung thei a, ek lama harsatna pawh a siam fo thei bawk. Ultrasound atangin a hriat theih a, i nei a nih chuan Surgeon enkawl i ngai bawk ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?