Domestic gas chung changa mipui chanvo

Legal Metrology enforcement staff-te chuan, Hunthar Veng  leh Edenthar Veng inkarah eirawngbawlna gas bûk tling lo bûr thahnem tham tak an man a.  Tha taka hna an thawh avangin an fakawm hle mai. Mipui lamin dan leh hrai an hriat tawk loh vang leh mamawhna a nasat avangin gas buk tlinglo te chu hralh an ni leh mai thin niin a man tute chuan an sawi bawk a ni.
Tun tuma an man hi a thahnem thawkhat hle a; bur 3000 chuang awrhah bur 1145 chu buk tlinglo an ni a, a tlinlohna hi kg 1.5-2 inkar a ni tlangpui a; hemi atang ringawt pawh hian gas bur za chuang a thun khah theih daih a. Suma chan tir phei chuan tam tham tak a ni. Hemi atanga lang chu a bur atanga gas lakruk hi thil  hlawk tak a ni a, a ti laklawh te chuan an sim mawh khawp anga, man tur vaia vir deuh chhen a tul reng dawn tihna a ni.
Tun tum thil thleng atang hian thil ngaihmawhawm 2 a lang a. Legal Metrology a hnathawkte hi an indaih lo hle nia sawi a ni thin a, hemi hi a nih chuan gas buk tlinglo leh thil dangah a khingbaiin hna an thawk tihna a ni a. Hnehsawh zawka hna a kal theihna turin tun aia hian Sawrkar lam leh thuneitute pawhin hma an lak a pawimawh hle dawn a ni.
Hetih lai hian Legal Metrology lam pawh  mipui dan hrilh hriat kawngah hma an la tha tawk lo niin a lang thei a. Tun tuma an sawi chhuah IOC Marketing Guidelines chuan gas agency-te’n gas bûk tling lo reng reng consumer hnena pek chhuah a khap tlat a. Buk tling lo bur te gas agency te’n thun khah turin an thawn let tur tihte sawi chhuah a ni bawk a.  Buk tling lo hi sem a ni fova, agent lam pawhin Bottling plant lamah an thawn let lo fo tih chu a chiang a ni. Agent te’n Consumer hnena gas an pek hmain bûkna keng tur an nih thute hi dan ni mahse mipui lamah a thleng tamin a rinawm loh hle.
Thawktu indaih lo chunga hnathawh chu a hahthlak a rinawm rualin indaih lo chung pawha mipui kaihza tihchak dan a awm a, chu chu an chanvo leh thil nihphung hrilhhriat mawlh mawlh a ni a. Mipuite huaisenna pe tur chuan fuih an ngai a; dan hi an mahni tana siam a ni tih hrilh nawn fo a ngai thin reng a ni. Domestic Gas chungchangah pawh hian helamah hian tan lak a tul hle a, thu thehdarh kawngah sum sen awm thin mahse a thlawn dawn lo tih hriat a tha a; chumi a hnekin Sawrkar tan hnathawh a awlsam zawk  dawn a ni. Dan leh hrai mipui hriat awm hriattur hi mipui chanvo a ni bawk a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?