Dr. Hreki8ma titi (Jan. 14, 2018)

Ka thenawmah hian dawr changkang tak, mi hausaho hlir kalkhawmna a awm a. A dawr neitute leh a thawkte pawh an fel a, a kal thinte pawh an changkangin an fel hlawm khawp mai. Mahse, chu dawra rawn kal thin ‘mi changkang’ zingah chuan mi chi hnih ka hmu. Ka thenawmah hian dawr changkang tak, mi hausaho hlir kalkhawmna a awm a. A dawr neitute leh a thawkte pawh an fel a, a kal thinte pawh an changkangin an fel hlawm khawp mai. Mahse, chu dawra rawn kal thin ‘mi changkang’ zingah chuan mi chi hnih ka hmu.

Tum khat chu, kan kawt kawngthla a chhiat vanglai, MLA, YMA leh mi thahnemngai ten an siam that hma khan kan tui pipe kan phum tha a, kan pafain kan chhilh a, kan timam a, kan chhu bel vel a. Chumi ni chuan ka thenawm dawr chuan inleng an ngah khawp a. An tih tur chu a indawta tih ngai a nih avangin an nghak thup mai a. Tlangval sek pui puite chuan kan hnathawk chu min thlir mai mai a. Pa upa lam tawh pahnih, chudawra an hun nghak ve thote chuan kan kawng siam chu min rawn pui ringawt a nih chu!

Chu pa pahnih chu nalh pangngai taka inchei an ni a, hnathawh kawr pawh an ha lo. Min puih chu an hna a ni lo. Kan tihchhiat siam that chu kan hna a ni. An thil nghah lai, tih tur hranpa an neih lem loh lai chuan an bula tute emaw hnathawk chu an pui ringawt mai a ni! Anmahni pawhin an zawh ve fo vanga min pui an ni ngawt lo ang. An rilru a changkang a ni! ‘An nihna leh an thil neih leh an rilru hi a changkang kim vek a nih hi a,’ ka ti rilru vawng vawng mai a ni.

Kan ramah hian chutiang mi chu tam tak an awm. Thil neih pawh changkang, rilru pawh changkang, Mizo tlawmngaihna dik tak la vawng nungtu, mi dangte tanpui tura inpeih, mi ropui tam tak hian kan ram hi an la tinuam a, chen zelna tlakah an la siam a ni. Chung zingah chuan he dawra leng thinte hi ‘Charity Ride’ neia vak chhuak tam ber an ni hial ang! Chutiang mi zawng zawng chu kumtharah hian zahna chibai ka bukvek e.

Tum khat dang lehah chuan ka kawt kawngthlaa luikawr chu hlawhfa ruaiin ka plaster tha e ka ti a. Bawlhhlawh a tlinkhawm duh em avangin timam deuh ila, a phiah fai leh tlen fai a awlsam deuh ang ka ti a ni. Ka ram chhunga ni bik lem lo na a, kan kawt a nih avangin tha se ka duh a, ka intifel ve deuh a ni. Chutia kan phiah fai a, tuia kan leih a, kan plaster mam heuh heuh lai chuan chu dawr changkang chhung atang chuan meizial bung an rawn paih chhuak pek a. Chu dawr changkanga thil nei changkang tak leng mek zinga mi chu a lo ni. Ka pa te thinin a tuar ta lo a, kan intihfelna khan min tichapo deuh bawk a ni mai thei, ka ngawi thei ta lo tlat a, kan hau ta hram a! (Thil titha riaua inhriatna avanga chapo deuhna rilru sualte hi hneh a va har thin em!) A hnu lawkah chu dawra kal mek tho mi dang chuan kan plaster thar faisarah chuan kuhva eina a rawn chhak sen leh ta tlawrh pek a. A thawk mekte chu kan pa tê bawk a, min hmu lo pawh a ni mahna! Mahse ka ngawi ta zawk a.

Kawng phiah fai mek laia bawlhlawh paih hram thinte hi kan tam khawp. Phiah fai lai ema paih hreh; mahse, a phiattu awm loh hnuah chuan paih hreh lo kan tam. A phiat faitu kan runluih a ni bik lo. He rilru hian a phak ngang lo a ni. He hnam thang mek, thil tha ber ber nei ve tawh zingah hian bawlhlawh paih mai mai duh rilru changkang si lo hi kan la kut nuk zawng a nih hi!

Chu dawr chu sawi leh thin ila, a nghaktuten zing tin an phiat fai a. Bawlhlawh bawm an chhawp a, “Sikret bung paih chhuak suh” tihte an tar vek. Mahse an inleng chi hnihnaho khan kalkawngah meizial bung an paih hnawk ni tin ziah. Inleng chi khatnate erawh chu mi dang tanpuiturin “Charity Thunders Ride” an nei thin thung! Dawr khata leng theuh theuh, thil neih inang theuh theuh hi kan lo inchangkan hleih thei khawp dawn a nih hi tihte ka ngaihtuah vung vung zel!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?