Dr. Hrekima Titi

Inneih rei hi zir a ngai a, inngaihsak rei hi kan lo mamawh dawn khawp mai!
%%%%

WHEN I AM 64
Min rawn pantu nupa chu an tar dun reuh viau tawh a. An hmel erawh a la tha dun hle. Pitar chu kum 72 a ni. A pasal chu kum 73. A pitar zawk rilru na avanga lo kal an ni. Khawngaihthlak reuh lutuk. A lungawi lohna leh a rilru hahna ber chu, “Ka pasal hian min ngaihsak lo,” tih hi zuk ni ve tlat a! A pasal erawh chuan a pha ve niah niah a. Mahse a nupui lungawina tham chuan a ngaihsak tawk lo a ni ngei ang le!

Inngaihzawn laia inrim thluk nghei tuma kan han inngaihsak vanglai kha a nuam khawp mai. Inneih hlima kan han inkai det det a, kan inmitmei relh relh thinte kha a hlimawm hle. Kum a lo tam a, kan inneih rei tak viau hnu hian, ngaia kan inneih vang nge, kan zah tak vang nge, tul kan tih tak loh vang ni dawn, kan romantic hleithei ta lo mai dawn em ni? Innei reng chung siin hman lai ngaiin khua a har thei dawn tlat a nih hi!

Kan intehna ber pawh ‘min ngaihsak, a caring’ tih a nih thin kha! Ngaihsak nih hi a nuam em! Min ngaihsaktu chu kan ngaina ve mai bawk. Inneih tirha kan inngaihsakna ang tho kha kan tar hunah pawh kan hlimpui tur a lo ni tho dawn a nih hi. Tar nupa hmuhnawm, inchhaih leh infiam ching tak ka hria a, an lawmawm asin! An hlim bawk a, an bula mite an tihlim bawk.

Inneih kan awlsam leh kan phur ang tho hian inneih rei hi tum tur a ni a. Inneih rei hian inngaihsak rei a keng tel tur a ni. Inthen si lo, inngaihsak leh induat tawk si lo hian nupa nun khawhar a siam thei tlat.

Kan lo tar tak hnu hian min ngaihsak loin min thlalhleh tawh lo mai ang tihte hi a lo hlauhawm ve thei dawn a ni mai thei. When I am 64 tih hla behchhan hian nakin hun atana thlaphan rukna in luanliam pui teh ang.

Nakinah, rei tak hnuah chuan ka lo tar ve tawhang a, ka samte pawh a lo tlakawlh ve tawh dawn a. Chutih hunah chuan tun hmaa i tihdan ang khan, “Happy Valentine’s Day,” tiin Nghilhloh Par min thliahsakin chhawn min la tawntir duh zel ang maw? Tar kun khup bihin dam dun ve ta zel ila, ka pianchamphaphakah thilpek min pein, ka biangah min la chuk zeuh duh zel tak tak ang maw?

Ka chhuah vah rei tumin zing dar 3 ahte lo haw ta ila, thinrimin kawng min lo kalh hnan tlat lo tak tak ang maw? Ka thawm hriain phun chiar miah lo leh hlim hmel takin kawngka min lo hawnsakin, thingpui min la lumsak duh ang tiraw?

Nang pawh tar i lo ni ve tawh ngei ang a. I phala, i duh phawt chuan i bulah ka tawlh reng duh dawn asin! Sekrek khawiha ka buai laiin nangin thuk bulah meilum ai pahin kawrlumte i lo phiar mai mai ang a tiraw? Kan duh leh chawlhni zingah kan ‘ride’ daih ang a. Hun awlah huanahte kan lut dun leh mai thin ang a, eng dang nge kan mamawh ang le?Nipui a lo thawt hunin Hmuifang tlanga cabin-ah kan va riak chhuak dun daih ang a. Ngawpui khawk rum rumin kan au thler dun lehang chu! Kan aw erawh a tham chhe viau tawh mai thei a!

Kum 64 ka nih hun chuan min la duhin min la thlalhlel ve zel tak tak ang maw? Min ngaihsakin min la duat zel peih tak tak ang maw? Min la mamawh tak tak ang maw?

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?