Dr Hrekima titi

Class X leh XII zirlai exam tur mekte tan A HO TLAT bua thupui pakhat hi ka’n khilai ang e.
&&&&&&&&

I THEIH TAWP A TAWK
Zirlai thenkhat ka hnenah an lo kal thin a. “Chhungte leh zirtirtute min beiseina a sang si a, ka tlin dawnin ka hre lo. Ka mangang a, ka thla a phang a, ka buai zo vek, lehkha pawh ka zir tha thei lo,” an rawn ti thin. Exam hlaua mangang, tih that loh hlaua phili, hlawhchham hlaua khur, mi dang beiseina phak loh hlauh avanga rilru chep zo tate an ni. Chutiang mi thenkhat hnenah chuan Football-a thil thleng pakhat chanchin hi ka lo hrilh thin.
Kum 2008 UEFA Champions League Final-ah khan Manchester United leh Chelsea an inkhel a. Inkhelh pangngaia an inhneh tawk avangin a tawpah chuan Penalty shootout-a a chak zawk zawn a ngai ta a. Manchester United Goal vengtu, Edwin Van der Sar-a chuan Nicholas Anelka pet chu dangin Manchester United chu an champion ta anih kha. Chanchinbu miin Van der Sar-a hnenah chuan, “ Penalty Shootout ah khan i hahdam hmel hle mai a,” an ti a. Ani chuan, “ Ka theihtawp bak hi tuman min beisei chuang lo tih ka hria a. Theihtawp chhuah tur ka ni tih ka inhre bawk a. Theihtawp ka chhuah thei tih ka inhre bawk a, hahna tur ka nei lo alawm,” tiin a chhang a.
Rilru hahdam tak chunga kan theihtawp chhuaha beih vak mai hi engkimah a tawk khawp mai. Tuman ka theih tawp bak min beisei thiang lo a, min beisei thei hek lo. Kan theihtawp erawh kan chhuah a ngai. Kan theihtawp kan chhuah chunga thil thleng zui hi hahdam taka pawm thiam a tul tawh thung.
Mahni theihtawp chhuah si lo, hlawhchhama rilru na leh si nihte hi a zahthlak. Hlawhtlinna hi pakhatna nih leh nih loh lama teh tur a ni lo ang. Theihtawp chhuah chunga kan thlen chin hi ‘pakhatna’ kan nihna theuh a ni. Mi min beiseina hi sang hlein hre thin mah ila, tlin chin, theih chin kan neih theuh avangin mi min beiseina sang hi hahpui ngawt tur a ni lo.
Miin an sawisel che pawhin hei hi hre reng rawh. Engkimah, i thiamna zawng zawng hmangin, dik nia i hriat hlen chhuak turin i theihtawp chhuah thin la. Sawiselna ruahpuiin a chiah zawp loh nan che nihliap kap parha khum chungin i tum lam panin kal hmiah hmiah rawh.
I theihtawp i chhuah duh si loh chuan i hlawhchhamin tumah dem suh. Chiau chiau duh suh. “Ka theihtawp ka chhuah lo miau reng a ni,” tiin i rilru siam la, i tih leh hunah i theihtawp i chhuah tawh dawn nia.
I ekzam dawn emaw, tih tur pawimawh tak i nei emaw, i hmaah mawhphurhna lian tak a inchhawp emaw a nih pawhin lungngaiin indawm kun mai lo la. A tha thei ang bera i tih theih nan i theihtawp chhuah phawt mai la. A dawta thil thleng leh tur emaw, miin an sawi zui dan tur emaw che ngaihtuah hrih suh. Mi min beiseina engemaw mai mai hi rilru hah nana hman a, innawrbehtir tur a ni lo. Min nawr kaltua hman thiam erawh a tha.
I theihtawpin rah duhawm a chhuah chuan i thawhrah a ni a, miin fak kher lo che mahse i hlim tho ang. I theihtawp i chhuah chunga i hlawhchham a nih pawhin lungawi mai rawh. I theih tawp kha hlawhtlinpui leh fak tlak a ni zo lo a ni mai. “Ka theih tawp hi a tawk zo lo a ni e,” ti mai teh. Tih theih engmah i nei tawh chuang hlei nem! Mahni tih theih piah lam beisei tlat zel nun hi a hahthlak mai mai.
A mawl zawngin ekzam hmachhawn mekte tan sawi belh lawk ang. I exam dawn a. Pakhatna nih tum suh. Distinction nih tum suh. First division nih tum suh. Tu emaw aia san kher tum suh. Mi beiseina che kha ‘tension’ neih nan hmang suh. I theihtawp chhuahin zir la, ekzam hall-ah rilru hahdam takin i thiam sa va ziak mai rawh. Chuta i nihna apiang chu lawm takin pawm ang che ka ti a nih chu!

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?