Dr. Hrekima titi (April 9, 2017)

Hmasawn duh tan a him china tawm sen reng tur a ni lo..
&&&&

MAHNI BU ZAWL
Eng emaw zir tura kal khawmte hmaah chuan zirtirtupa chuan chalk kengin blackboard chu a pan a. Blackboard-ah chuan an rin bial pawp a, a rin bial chhungah chuan mihring lem hi an rin leh zawt zawt a. Milem bul velah chuan in lem te, thing te, motor te leh milem dang tlem a ziah belh a. Zirlaite lam chu a rawn hawi chhuak a, “Hei hi eng nge ni le?” a ti a.

An ngawi thap mai a. Pakhat huaisen fal deuh chuan, “Khawvel lem a niang!” a rawn ti a. Mahse an zirtirtupa chuan,”Dik teuh khawp mai, hei hi ‘mahni bu zawl’ (comfort zone) a nih hi!”

“Mahni bu zawlah theuh hian kan duh leh mamawh kan nei kim vek a. In leh lo te, chhungkua te, thian te leh kan hna te a awm a. Mahni bu zawl hi nuam kan ti a, kan thla a muang thin. A nih leh hemi pawn lamah hian chhuak ta ila eng nge lo thleng ang le?” tiin zirlaite chu a’n zawt leh a. Atira chhangtu bawk khan, “Kan hlauthawng ang, ” a rawn ti a. Zirlai dang pakhat chuan, “Thil kan tisual ang,” a rawn ti bawk a.

Zirtirtu chuan, “A nih leh thil kan tihsual hian eng nge lo thleng zui thin?” a’n ti leh a. Zirlai pakhat chuan, “Thil kan zir belh thin,” a lo ti var a. Hotupa chuan,” Dik lutuk! Thil kan zir thar thin,” tih pahin rin bial chhunga mihring lem atang chuan rin bial pawn lam pel hrawkin fei lem a rin chhuak ruih a. “In bu zawl atanga in chhuah hian pawn lamah, nuam in tih chiah loh chu inhmachhawn ngei dawn. Mahse thil thar in va zir thung dawn a ni,” tih pahin a rin bial hmasa kual khung vekin bial lian zawk an rin kual leh ruih a. Chumi chhungah chuan in lem dang te, mihring lem dangte a ziah belh leh a.

“Mahni bu zawla kan tawm sen reng hian hmasawnna engmah a awm thei lo. In bu zawl in chhuahsan hian in ngampatna khawvel a lo zau sawt ang a, thian thar in siam belh ang a, thil thar in zir ang a, in bu zawl a lo zau zel ang a, mi ropui zawk, mi chak zawk in lo ni dawn a ni,” a ti ta roh a.

Mahni bu zawlah hi chuan kan huai hlawm kuk kuk viau reng a. Kan ngampatna chinah hi chuan kan zeiin kan thei pap pap hlawm viau. Mahni bu zawl chhuahsan ngam lo, “Ka thei lo, ka thiam lo, ka ngam lo,” ti thin ka hmu nual a. Kei ngei pawh hi mahni bu zawl bak pel hleithei lo ka ni. Hna thar, thil thar, chona thar hmachhawn hi kan hreh fo. Nuam kan tih chin leh kan thlamuanna chin, kan thiam sa leh kan theih sa chin chauhah pawh hian a nun chu a nun ve reng theih ngei mai. Dam ang reng tak leh hlim ve ang reng takin a awm theih. Mahse hmasawnna a awm tam duh lo khawp. Khawvel zau zawk hmachhawn tura pen chhuah a, kan ngam loh zawng tak kan hmachhawn hian hnehna kan chan belh thei chauh dawn a lo ni.

Kan thiam bel sa chauh thawh reng mai hi a chakawm fo. Kan hmelhriat sate nena inkawm reng mai hi a him viau. Kan kalkawng ngai chiah zawh ni tin maite hi a nuam thin. Hna thar leh mawhphurhna thar lakte hi a zamawm ve a. Kan la tih ngai loh tih tur hi a huphurhawm thin. Hmelhriat loh kara han tei luhte hi a ngamawm loh a, khual khuaa han ngampat viaute hi a har fo. Kan tihthan loh zawng han tih ve hian tihsual a awl a, hna thiam ngai loh han thawh tharte hian zei a har khawp. Mualpho viau theih pawh a ni. Kal ngai lohna hmunah hian kan zei lo a, kan ti dui mai a, petek mai palh pawh a awm thei. Mahse hmasawn tur chuan a him chin ngawta chen reng a rem si lo.

Mahni bu zawlah ringawt hian chak belh a har a, ngampatna sa ringawtah hian thiam belh tur a awm tawh lem lo a, a him china tawm sen reng mai hian thil thar pawh kan zir lem lo a, tlangnelna sa ringawtah hian hmasawnna a zuang thei lo. Hmasawn kan duh a, mi chak zawk leh mi ropui zawk nih kan duh a nih chuan mahni bu zawl chhuahsan ve thin a, khawvel dang leh thil thar hmachhawn hi a ngai thin. Chu chuan mihring chak zawk, huai zawk, tuarchhel zawk, ropui zawk a siam dawn a lo nih chu.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?