Dr. Hrekima Titi (Feb 12, 2017)

Kan thiannu pakhat hian, “Valentine’s Day leh Childrens’ Day inkar hi thla kua chiah zuk ni a!” tiin fiamthu a thawh a. Min tihlauthawng ta riau a nih chu!
&&&&

V-DAY AH HLOH KHER LO TEH
Hun eng emaw ti lai atang khan Valentines day hi kan buaipui ta viau a. Hmangaihna inhlanna ni a ni e an tih avangin nula tlangval tan chuan a nghahhlelhawm phian ta ve ang. V-Day kan hriat hma daih khan U Zawma leh UPCa ten nula hnena chocolate pek nachang hi min zirtir hman roh a. Hmangaihna tihlannahmanraw pui berah kan neih chho ta deuh kha a ni a. A him tawk roh viau mai.
Tunlaikan thalaihoin hmangaihna tihlanna atana an infuihpawrh dan hian ka mang a tiang tlat. “Inngaihzawn laia sex hman hi hmangaihna lantirna a ni e.. hmangaihna leh inngaihzawnna a tinghet sawt alawm,” tihte hi an thu inrawlrukte a ni awm asin! Tleirawl rilru thianghlimin a dik leh dik loh min rawn zawt nawlh nawlh tlat.
Hmangaihna tihlan dan hi a inang lo thei ta fu mai. Mi hriat hlau tak chunga a ruk tea inmelh relh relh duhtawk an awm laiin a then chu kalkawngah an lo inkai det det a. Mi hmuh loh lama kutzungte insualtir neuh neuha thenkhat an lawm tawk viau laiin a then chuan kawngpui lunlaiah kan ngaihzawngte tana thuchah kan tar chhuak kulh duh bawk a. Fanghma inchhawlthuai hunlai kha chocolate leh rose par inpekin a luahlan ve ta bawk alawm! A zavai hian a tawngtu leh a inngaizawngte tan chuan a hlimawm vel vek ngei ang a. “Be my Valentine forever” tia chatuan hlawlh pha hmangaihna an hlimpui theihna tur kawng a nih dawn phawtte chuan maw le!
Hmangaihna kan tihlan dan hian tawk chin a neih a ngai thung. Chatuan hlimna aia kumkhaw lungngaihna thlen zawnga inphalrai lutuk a hlauhawm a nia! V-Day a lo thleng dawn ta si ale! Kan ngaihzawngte nen engtin emaw taka hriatreng tlaka hman ve duhna thinlung helhhawlh hian min kam deuh roh a. Zalen lehzuala han inkawmfal deuh a, han titi ril deuh theihna tura fianrial han pante pawh a chakawm deuh a ni thei e. Nun phung pangngai tlansana khawilaiah emaw han teichhuah hahdam ve kan duh a nih pawhin kan demawm bik lutuk dawn em ni?
He hmangaihna niah hian zalen zawka biathu di inhlan kan duh a nih pawhin kal fal hla lutuk duh hauh thung suh u. Ram pilril leh hmun fal nazawng hian hmangaihna a tipung lem lo. A pilril zawh poh leh mihring rilru tenawm hi a chhuak duh a, hmangaihna aiin tisa thil a thawk chak tawh zawk fo. Valentine’s Day hi kan tahna niah a chang hlauh dah ang e!
Hmangaihna chen viau tuma tisa leh thinlung lam inbuatsaihna hian thianghlimna ramri a pelh hlauh chuan V-Day hi ‘V loh day’ in a zui hlauh ang a, hlim taka fehchhuak kha mittui tla chungin kan haw hlauh palh ang tih ka hlau deuh!
V-Day ah hian sex hmanga hmangaihna tihlan tum lo hram teh u. V-Day ah hian i thianghlimna i hloh a nih chuan chatuanin i virgin leh ngai tawh dawn lo.Thil chhe tawh tam tak hi a siam that leh theih mai thei e. Thianghlimna chhe tawh erawh zawng a siamthat ngaihna a awm ngang lo a nia.“Condom tel loin sex hmang suh,” tih zirtirna hian tithlamuang che suh se. Condom chuan AIDS leh naupai lakah a veng che a nih pawhin i thianghlimna venghim tur erawh chuan a chhah tawk lo!
“Inngaihzawn laia Sex hman hi hmangaihna lantirtu, inngaihzawnna tinghettu a ni an ti a, a dik em?” tia min zawttute kha a ruh langin kan chhang ang che u. Inngaihzawn laia sex hman hian hmangaihna a tinghet lo chang a ni lo a, a tiderthawngtu a ni fo. Sex-a riltamin a duh hmuh theih nana rilru no zawkte a thlem thluk theihna tura mahni hmasialna tawngkam tenawm mai a ni e. Sex hmanga hmangaihna lantir kher tumtu chuan hmangaihna hming a tibawlhhlawh a ni. V-Day hmanpui tlak a ni lo. Tlansan daih rawh.
V-Day ah hian hloh then kher lo teh. Thianghlim takin inhmangaih mai teh u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?