Dr. Hrekima Titi (Feb 22, 2015)

Kar hmasa titi kha a nawi fu! A chhan a awm. Sawi fiah ve a ngai tlat.
%%%%%%%%%

VAWI KHAT ‘CLICK’ SUAL!
Chhiar tlaka thu ziak tur hian hun a hek khawp mai. Rilrua lo awm apiang ka’n ziak thla pawr pawr a. Vawi tam tak ennawn a ngai. A bul atangin ka’n en tha leh a, paih ngai paihin belh ngai ka’n belh a. Rilru a kal fuh tum chuan duh aiin a lo sei a. Paih tur lai ka hriat mang loh pawh hian Pu Tuna’n, “I thuziak hi ka chhiar peih tawk vel a ni,” a tih kha ka hre chhuak leh thin a. Chhiartu pakhat hloh ai chuan chhiar peih tur tawk vela tihtawi ka duh a.

Zarkawt pa ropui, Dr. Zorammawia’n, “I thuziakte hi hmeichhe pawnfen an sawi ang, ‘Mit la tawk vela chhing, a pawimawh chin fun kim sia sei’ a ni e,” min rawn tihte kha thinlungah hian a cham a. Thu ziah mawlh mawlh laite hian tleirawl pawnfente hi mitthla an ngai leh rih a!!

Zirtawp zan hi chuan engthawl lo zetin rilru a ‘zalen’ a ngai si a. Kar hmasa pawh khan ka inpeih meuh chuan zan dar 1 a lo ni vung tawh mai a. Internet ka’n thlunzawm a, ka thuziak dahkhawmna phek chu kan en thla zar zar a, thupui hrang hrang intlar thla duatah chuan ka thawn tur nia ka hriat chu kan ‘click’ ta zauh a, a inthawn fel a, ka indah fel a, ka mu ta a.

Pathianni tukah rilru zalen takin Zalen chu ka’n bih ta ale! Biang a sa phut phut mai a, ka bing deuh chuk chuk a. Thu awmze nei lutuk lo, hawrawp chhut dik lo nasa tak, a kar leh atana ka ‘draft’ zawk, la ennawn miah loh, ka theihnghilh ka hlauh avanga ka lo chhinchhiah lawk mai mai rih, dah that dawna thupui pek ngai ve si, ka thawn tur zawk nena thupui inang tak mai zawk kha a lo chhuak ta mai a! Ka thawn dawn khan ka lo ‘click’ sual a nih kha!

“I titi ka lo chhiar ve thin,” “Ka chep thla a ka dah tha zel,” “Min chawmtu a ni,” “Ka hlawkpui thin khawp,” tia min han fuih phur thiam thinho kha mitthlaah an lo lang a! Sawi fiah nghal vek theih nise ka va ti tak em!

Thil tihsual tawh chu tihdik theih a ni tawh lo. A sual ang ang khan a liam zo tawh. Zan khaw tairek thlenga ka hahpui zawng zawng kha vawikhat ‘click’ sual khan a chawk chhe vek a. Chawlhni tukah a sang tel hnenah duh loh zawk a darh ta vak mai a nih kha.
Tichuan hengte hi ka ngaihtuahzui phah ta a. Hun leh tha tam tak senga kan neih tawh sa hi vawi khat tihsual hian a tikhawlo vek thei. Mahni phak tawkin nun hi uluk ve hram hram mah ila, vawi khat ‘click’ sual zauh hian min tichhe thei dawn a lo ni. Piangthar hlim pawh hi vawi khat ‘click’ sualin a tida leh fo. Vawi khat ‘click’ sual zauh hian hri tha lo a kai theih a, kum 30 pelh thlenga ruihtheih thil khawih hauh lo, vawi khat ‘click’ chhin avanga ngawl vei ta te pawh ka hria.

Lal ropui Davida chanchin sawi apiangin a tlai khat ‘click’ sual zauh kha kan sawi tel lo thei lo zel chu a nih hi. Pa chak Samsona pawhin a vawi khat ‘click’ sual chu thihpui zui ta a nih kha.

Ka thu thawn tur ka en lai khan a hnuai kha lo zuk en thleng zauh ila, ka tisual hauh lo ang. Hmuh hmasak apiang mai ‘click’ ngawt zel mai hi a finthlak loh khawp mai. Duhthlanna siam dawn hian kil tin en kim a tha fo reng a ni. Han thlir zau deuh ila, han en kual deuh ila, kan tihsual tur tam tak hi chu kan tisual lo ang maw le!
Uluk deuhin nun hi hman tur a lo nih hi. Vawi khat ‘click’ sual hi a pawi thui thei thin si a.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?