Dr Hrekima titi (Feb 24, 2019)

Pathian hian nu leh pate hi a dah pawimawh teh a nia..
&&&&&

A MAK A NA
Fate’n an nu, anmahni hringtu ngei, hnute tuia chawm lian a, hmangaihnaa enkawl a, an tana a nun hlan huamtu hnenah,
“I hmangaihna hi engah mah kan ti lo,” “I Pathian hi engah mah kan ti lo,” “I malsawmna engah mah kan ti lo,” tia zak map lova an an khum bawrh bawrhna chhungkua hi a awm theih ka ring ngai lo a. Mahse a awm an tih chu!! A mak a na ka ti! Tum khat thil mai pawh a ni lo awm e, ni tam tak, vawi tam tak chutiang chuan nu ber chuan hmuhsit leh sawi chhiat, zah loh leh diriam a tawk thin an ti. A mak a na!!
Chu chu sap chhungkuaa thil thleng a ni lo a, hindu chhungkuaa thil thleng pawh a ni lo. Mizo chhungkua, kristian inti chhungkua, rawngbawltu awmna in chhunga thil thleng a ni an tih leh zel chu!! A mak a na!!
An titi ka ngaihthlak chhunzawm zela mak ka la tih cheu chu, chutia nu ber an an khum lai chuan pa ber pawh a awm reng a, nu ber thlavang chu tawngkam khat pawhin a hauh lo a, a fate chu mitmei tak ngial paw’n zuk khap lo va! An sawi dan phei chuan nu ber hmusit turin pa ber chuan a fate chu a fuih ru hial thin an tih chu maw le!! A mak a na a ni tawp mai.
An titi chu ka ngaihthla ve zel a. Mak leh na ka la tih leh cheu chu, pa ber, a nupui tihzahawm nachang hre hauh lo leh a fate laka chhan miah lotu, a fate fuihpawrh thintu chu rawngbawltu, pulpit tlanga Pathian thu sawi thin a ni e an la tih lehnghal chu!!
Naupangte hian nu leh pate an zah tur a ni tawp mai. Chu chu siamtu thupek khauh tak a ni. Ka titi hriatte unau chungah hian vanduaina a thlen ka ring. Chu chu Pathian thu a ni si. “Pathianin. ‘I nu leh pa chawimawi rawh,’ ‘Tupawh a nu emaw a pa emaw sawichhia apiang chu thi mawlh rawh se’ a ti si a,” tih thu hi Kristain chhungkaw campaigner lar tak, Pastor sawi a ni lo a, revival speaker-in aw tithuma tawngrinna hnaih thei ang ber kun hniama, a awki hlauhawm thei ang ber tipawr chunga a sawi pawh a ni lo. Lal Isua, amah Lal Isua sawi ngei a ni. (Mathaia 15:4 ) A sawitu hi a rintlak a, he thu hi thudik, thuril, thu hlauhawm a ni.
“Tu pawh a nu emaw a pa emaw anchhe lawhtu chu thimtham lai berah a khawnvar tihmih sak a ni ang,” (Thufingte 20:20) tih a ni bawk. A huphurhawm asin! Thim deuha khawnvar eng tha mang lo nena chet vel pawh a hrehawm laiin, thimtham lai berah khawnvar tihmihsak tur an nih chu! Ai mit thlawn ang mai, chet ngaihna awm tawh lo, manganthlak lutuk tur, kal ngaihna awm tawh lo, zum leh hriam kara tlu nawk nawk tur, pen khat pena boralna khuarkhuruma tla vang vang tur an ni.
Ka titi hriat hi mi titi a ni. Dawt a nih ka ring hial. Mahse a sawitu chuan hrechiang a inti hle si. He mite unau chunga thihna thleng lo tur leh an khawnvar tihmih a nih loh nan hian kohhranho hi tawngtai rual chiam ila a sawt pawh ka ring lo! Anmahni ngei hian an sim a, thupha chawia Pathian hnena ngaihdam an dil erawh chuan, thikthu chhia leh a thutiam tawha ding nghet tlat thin Pathian mah ni se, inchhira simte ngaidam thei khawpa hmangaihna leh khawngaihnaa khat a nih miau avangin a ngaidam thei chauh ang. Simna thinlung an put theih nana tawngtaipui erawh a sawt ka ring.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?