Dr. Hrekima titi (Jan 15, 2017)

Chawimawi leh lar nihte hi a nuam ngawt ang a, mahse kan thatpui ber lo fo mai thei.
%%%%%

“IN ROPUI MIAH LO”
Ni 12.1.2017 khan MFA chuan Germany-a football zirtur Mizorawlthar 17 thlahna hun an hmang a niawm e. Chumi tuma khuallian Home Minister R. Lalzirliana thusawi chu chanchinbuah ka lo chhiar a. A va tha fawkfawk em!

Heng an thlahturte hi mi tam tak zinga thiam zual, zirtir belh zel tlak, te hna hrang hrang hmanga uluk fea an thlanchhuahte an nih ka ring a. Ka fapa tel se kachhuang ru hle ang a, kan veng naupang tel se kan chawimawi duh hial ang! Heng rawlthar rualte hian an phu ve bawk alawm. Tualchhung chanchinbuah an thlalaknen lam a rawnlang a, anmahnipawhin nuam an ti ngei ang a, an inchhuang ru ve deuh maithei a, ropuive deuha inhriatna pawh an nei maithei! Chapo deuh te pawh a awl dawn hian ka hria. Chu mumang ram atanga beng harh ngam Home Minister pa takkan nei kha a fuh ka va ti em!

Pu Zira chuan, “Training tur chauh in ni a, in ropui miah lo tih inhriat a tha,” tiin ropuiin tihna lehchapona avanga an tlukchhiatna tur laka venhim nan thudik tak a hrilh fawk mai a. Eizawnna tlak leh ram tihmingtha tura theihna zawng zawng chhuaha training turin a fuihzui a ni.

Germany ramah football zirtura thlan nih hi a nep hauh lo na a, an la ropui hauh lo reng a ni. Hmabak kawngthim thui tak an dai dawn tan chiah. Ropui intih leh inchhuanna rilru chapo-in a awih tlei hmaa ben harh theih an ni em ang chu maw! Mahniawmna mual theuh a enge maw nive tan deuh a in hria zawng zawng hi min beng harh thei se ka va ti em!

Mizote hi inchawimawi kan thiam lo an ti thin a. Chawimawi nih pawh hi kan thiam chuang lo niin ka hria. Hlawhtlinna vawihnih khat chang a, ropui intihna tawlhpanala tlu a tho leh hleithei ta lo kan awm nual lo maw? Larte, hlawhtlinte, chawimawi nihte hi nuam hle mah se chapo phah khawpa kan rilru a nawi a nih chuan kan tlukchhiatna tur a ni dawn.

Tha ve tawk, thei ve, ropui ve tih inhriat hi thilsual chu a ni vek hauh lo. Hmasawnna tur nei tawh lo ang maia inthlahdah hi a pawi thin zawk chu a ni. Eng dinhmun emaw kan thlen vetak avangte, miin min fak ve fo avangte a ropui ta bera inngaih maite hi a hlauhawmkhawp. Tha ber emaw intihtlat a, inbuatsaih vak lo pawha hnehna chan kan la inringreng a nih chuan kan ti fuh lo fo ang.

January ni 9-14, 2017 chhung khan Mission Veng Open Badminton Tournament kan buatsaih a. Mizoram pum huap ranking tournament a ni bawk a, infiammi pawh an tam e! Chak lo tur zawka ngaih chak an awm nual mai! Kulikawn naupang Jojo-a chuan a aia upa, tunhmaa a inzirna leh a idol thinte hneh nualin category pahnihah a champion tlat a. Mens’ Single ah Unseeded player, Kolasib tlangval Abela’n seeded players ho hnehin final a lut bawk. He mite pahnih hi kumtluanin inthlahdah hauh loin an lo inbuatsaih ru char char alawm maw le! Mi dang an mut laiin an tlan a, khawharthlak leh peihloh sawi loin kawr huh vekin exercise an la a. An la ropui lo tih an inhria a, theihtawp chhuahin an bei a, hma an sawn ta a ni.

Ni tina hmasawnna tur nei vek kan ni a, kumtina hmalampana thang zel tur kan ni. Faknaah tlu lo turinfimkhur ila, chawimawina zo lo khawpin nep lo ila. Inzir mek, la ropui hauh lo kan ni tih inhriain mahni te in a mualah theuh theihtawp chhuah reng ila, kan la ropui ve mahna!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?