Dr. Hrekima titi (Jan. 21, 2018)

Pu Modia’n ‘Swachh Bharat’ a puan ang deuhin ‘Sikulpuikawn Fai’ kan puang ve a nia aw!Pu Modia’n ‘Swachh Bharat’ a puan ang deuhin ‘Sikulpuikawn Fai’ kan puang ve a nia aw!

SIKULPUIKAWN-AH RAWN PAIH NGAWT LO LA! Kolkata-ah ka zin ve a. Airport chhung kan han lut chu a lo fai hun mai a. Ka kuhva eina panhnah them chu paih mai kan tum a, ka paih ngam ta lo a. Bawlhhlawh bawm ka pan ve ta hnu hnu a. Kei mi mawl, bawlhhlawh paih mai mai thin, eng ilo eina kawr kal paha theh mai mai thin pawh khan mi tih dan entawn chu ka lo thiam ve khawp. Miin bawlhhlawh an paih mai mai tawh lo a, hmunhma an vawngfai thin tih ka hmuh khan min tiharh ve mai! Ka lo haw hnuah pawh keimaha ze nawi bet sa, bawlhlawh paih mai mai thin ‘sual’ kha hneh fo a ngai! Bawlhhlawh paih mai mai ka hmuh hian “A Kolkatta thlen loh thlak mang e,!”ka ti rilru ve khang khang thin!

A aia hlaah ka zin veleh a. Bangkok khawpui kan fan ni chuan min hruaitupa khan, “Bangkok khawpuiah hian bawlhhlawh paih mai mai phal a ni lo a, a bawmah chauh paih tur a ni. In paih mai mai an hmuh chuan an man che u ang a, pawisa in chawi ang a, in passport an la ang a, in buai zek ang a, in haw tum niah pawh in haw thei lo mai ang. Bangkok khawpui hi min vawnfaipui dawn nia,“ a ti a. Buai hrep chu kan lo hlau khawp mai. Paihna remchang kan hmuh loh chuan kan bawlhhlawh neih ang ang pawh kan ak tha a, kan fun a, kan khai zel mai. Kei, thingtlang naupang, a remna lam apianga eng ilo thehthang mai mai thin pawh hian bawlhlawh paih mai mai loh hi ka lo thiam ve thei reng tho mai. Bangkok thleng ve miau tawh hek i!

Biate khua a fai an ti. An khaw mipuite rilrua changkangawm hle mai. Aizawl-a Zotlang vengpawh a fai an ti bawk. Bangkok an thleng ve tawh vek emaw dawn ni!! Heng khua leh vengte hi entawntlak an ni. Hawh u, changkan hi zirveang u. Biate khua an fai theih a, Zotlang veng an fai theih chuan kan khua hian kan tlin ve hrim hrim ang.

Hlauhna hian mihring hi min tifel thei viau! Hremhmun tlak hlauh vanga piangthar thin, HIV kai hlauh avanga insum ve mai mai, mualpho hlauh avang chauha felte pawh kan nih ve bawk hi! Bawlhlawh paih mai mai hremna hi siam hial teh ang u.
Bawlhhlawh paih mai mai hi a mawlthlak tih hre lem lo; mahse, pawisachawi dawn avanga paih lo thei ve mai kan tam ang!! Motor atanga paih chhuak mai thin te, kal paha theh thla ngawt thin te, din khawmna hmun apianga sikret bung thlauh ngawt zel khawpa changkang loho hi hlauhna avang talin kan changkang ve mial mahna! Kei pawhin hlauhna avangin Bangkok-ah bawlhlawh ka paih ngam lo!

2014-ah Pu Modi-a’n Swachh Bharat a puan ang deuh khan Sikulpuikawn hi bawlhhlawh awmlohna hmun atan hmanni deuh khan an puang a. Aurinna hmangin nilengin inzirtirnate neih zui a ni. A sawt viau laiin bawlhhlawh la theh darh mai mai tawkkan la awm nual.

Unaute u, in khuaah bawlhhlawh in paih hnawk mai mai a nih pawhin Sikulpuikawn-a paih hnawk ve ngawt a rem tawh lo. In vengah chuan sikret bung te, sehrep kawrte in theh darh mai mai a nih pawhin Mission Vengah chuan a tih chi ve tawh lo a nia!

‘I va mawl ve’ ti ta ngat ila insual peih nghal ut duh khawpa mawl nih duh loho hi bawlhhlawh paih mai mai khawpa changkang si lo kan awm nual lo’ng maw? Thil neih changkang, mize changkang, pawn lam changkang, chhungril changkang kan ni vek thei e. I fai ang u hmiang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?