Dr. Hrekima Titi (July 15, 2018)

Drugs i nghei tan ta mek a, mahse hmabak tam tak a la awm e..Drugs i nghei tan ta mek a, mahse hmabak tam tak a la awm e..
DRUGS NGHEI ZUI ZEL DAN TUR (Part II)

I rilru chhungril kha inbih ngun fo la. I hlim em? I zam em? Drugs i chak em? Drugs nghei hlim nun nguai (Post Withdrawal Depression) hi a awm ve tlat thin. Drugs ngei ta cheng a, hlim viau awm a nih laiin nun nguai, phur lo, thinchhia, ngaihtuah tawi tuk mai hi a awm fo. Nun phung thlakthleng thuta la invuahrem thiam loh thil a ni. A nasat chuan daktawr hmuh vat tur. Hlim lohna te, zamna te leh rilru lam thil engemaw hian drugs tih leh duhna a kaichhuak fo. Nangmaha i hneh dawn a, drugs tih chakna a zual hle chuan i tih hmain puitu zawng thuai ang che.

Vawi khat tih leh zeuh kha a pawi tih hria ang che. “Ka addict kher tawh nang, ka nghei rei tawh, vawi khat chauh a ni mai..” tiin inbum suh. An tizui leh nge nge thin. Over-confidence hi a awm fo. “Ka nghei thei. Hei chen ka nghei tawh. Ka tizui leh awm lo em mai, ka hneh leh awm em mai” tihna rilru hian inven ngai lo riaua inhriatna a siam a. Tih leh zauh chuan luh ngheh leh nghalna a ni deuh mai. Vawi khat pawh ti chhin duh hauh suh.

Nghei thei inti takin mahni in test vel nan pawh hnaih chhin vel duh suh. Mi chak lo kan nih hi. Thlem thlem hi kan dawl zo lo deuh vek. Thlemna hneh dan tha ber chu thlem phak loha awm hi a ni zawk. Mahni han intawktarhte pawh hi a awm ve. Ka hmelhriat pakhat pawh a nghei rei fu tawh a, a inringtawk viau mai a. A zuar thinte inahte a leng vel a. Pek pawh an lo tum hran chuang lo. Zan hnih khat chu ti loin a haw thei mai. “Zan khat chu le, dawhkanah an lo chhung vum thar mai si a, ka insum thei ta thlawt lo alawm maw le,” tiin a lo lang leh nge nge!

Tlanchhiatsan vek theih a ni dawn lo. Hnial ngam a ngai. Nghei dawn lai takte hian tun hmaa min khilai phal reng reng lote hian a thlawnin min pe nawlh fo mai. Mak ve mai mai chu, nghei dawn lai takte hian an chhar nawlh fo nia! Tun hmaa harsa taka pawisa ngaihtuah chawpa neih ngai thin kha a thlawna han hmuh thut mai chuan insum a har fo. A thlawn a nih avang ngawtin la suh. I duh tawh loh, i nun tichhetu, i hmelma a nih kha theihnghilh suh.

Pek che an tum khan, “Aih, ka duh lo,” ti mai thin la,. I hnialin i aw ti nemin hawihawm lutuk vak lo bawk ang che! Rum hret mah la a pawilo. I ngaisang lo hmel kha hmuh hreh suh. An thlem zui rei peih lo ang che. Inti polite taka hlim hmel pu deuh chunga, “Ka duh hrih lo mai,” tihte hi a tha vak lo. ‘Hrih lo’ a nih chauh chuan nakin lawka i duh leh dawn a ang tlat. An ngam zui ngei ngei ang che.

Harsatna engemaw tawh avang leh rilru natna engemaw neih vanga ti leh an awm fo. Harsatna nei lo mihring an awm lo. A chinfel dan zir hi kan thei vek. Ruihtheih thil hian eng harsatna mah a chingfel ngai lo. Buaina kai chhuak belhtu mai a ni tih hre reng ang che. Rui loin I harsatna leh rilru hahna chu chinfel tum la, I theih dawn loh chuan drugs I khawih hmain puitu tur pan ang che.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?