Dr Hrekima titi *June 17, 2018) Drugs chu i tan a tha lo a, i hmelma a ni tih i hre ta a…Drugs chu i tan a tha lo a, i hmelma a ni tih i hre ta a…

I NGHEI DUH TA A NIH CHUAN Nangma tan ngei aw! Mi dang tana nghei a tlo ngai lo. “Ka nu rilru a hah tawh si a…, ka nupuiin a duh lo a..,” tih velte hi nghei chhan tha awm tak a ni ve. Mahse tu tan emaw thil titha riaua inngaih chuan min tih thinrim leh hunah te, kan beisei ang a thlen leh si lohte hian runluih leh an awl! Chuvang chuan drugs i nghei dawn chuan, tu vang mah ni loin, tu tan mah ni loin, nangma tan, i nunna atan khan nghei mai rawh.

Drugs nghei chu i mawhphurhna a ni.  Tuman an ngheisak dawn lo che. Nangman, nangma tan nghei ang che. Drugs I tih chhan te, I nghei theih loh chhanahte hian dem tur leh mawhpuh tur zawng chiam duh suh.

Tih takzet a ngai. Thil hi tih ve mai mai a awm a, tih takzet a awm bawk. Drugs nghei hi ‘tum satliah, kal paha pal liam mai mai chi’ a ni lo. Drugs nghei tum tam tak hian ofis kal pahin, hnathawk pahin, nun phung dang tibuai loa ‘kal pah’ an tum fo. Hlawhtlin a har. Inkhung hran a, phone switch off a, damlo anga awm law law mai tur. Damdawi inah te, centre-ah te, huanah te, thingtlangah te awm bo mai a tha. Mahni in luma tawm bo hmak pawh a sawt. Len pah, nula rim pah, inkhel en pah tih vel mai mai hian hlawhtlin a har khawp. Tih takzet a ngai.

Tawrh inhuam rawh. Tuarna tel loin hlawkna a awm thei lo. Nat ve deuh te, mut theih loh ve deuh te a awm dawn tih pawm la, inhuam rawh. Na chhawkna awm tha viau mah se i ruih thin ang khan a tinuam dawn lo che. Na chhe tê pawh tuar peih lo, hrehawm nep tak pawh paltlang huam lo tan hlawhtlinna a awm lo. Nu nau vei hian nunna thar lo chhuak tur hlutzia thlirin na chhawkna pawh an lam ngai lo. Nunna thar i neih tur kha tawrhnaa hlawhchhuah ve a ngai.

Mahni inkhawngaihna nen a theih ngai loh. Mahni inkhawngaih rilru no, duat hliau hliau bik nih duhna rilru hmasial, eng emaw hleka ter at mai leh tau ngut zel duh thinlung nawi, thihpui tur pawh ni hlei lo paltlang ngam lo tuarzuau rilru hian thil tha engmah a phu lo e! Rilru paukhauhna nen tuar mai la, a awl ber.

Drugs ruih chhan i neih chuan chu chu chinfel tum phawt bawk la. A nih loh chuan chhuanlam ah i hmang leh reu reu ang e!

Muangchang  suh. Hun remchang i la neih lai hian nghei thuai rawh. Hun remchang hi a awm reng ngai lo. Tlai luat a awm lo tak na a, tlai luat hian pawina a nei chawk.

Camping dawna ruih luh tum tlat, sim dawna, “last” la titalh hian an nghei mawh khawp. An la ui a, an la duh a, an la ngai tihna a ni. Thil kan ui tak thlah hlen hi a har khawp. I tan tha lo a nih avangin i neihsa pawh paih ta zawk che! I nghei duh tak tak ta a nih chuan ui hlek suh.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?