Dr. Hrekima Titi (March 18, 2018)

Chu tlangau ri chuan thil thleng tur chiang sa awm chhun min ngaihtuahtir ta a..Chu tlangau ri chuan thil thleng tur chiang sa awm chhun min ngaihtuahtir ta a..&&&&

THIL CHIANG SA AWM CHHUN
Zalen titi ziah tumin ka thu a. Han titipui tur thupui reng reng ka ngaihtuah chhuak thei lo. Eng emaw han sawi ka tum a, a tawp tlat zel mai a. ‘Sawi tur hriat loh chuan titi loh mai tur a nih hi’ ka ti ta a.

Chutih lai tak chuan kan veng chhunga vantlang aurinna ‘tlangau’-in, ‘khaih khaih khaih’ a tih vena ri, ‘ting ting ting ting’ tih chu a rawn ti ta a. Hetia a rawn rik tawh hi chuan kan beng kan tun hra thin. Thil pawimawh, mi tinin kan hriat tur a awm tihna a ni a, ngaihchan thap tur a ni reng a. Hlauhthawn ruk ang ngeiin chhiat thawh thu a lo ni ngei a. Nat lawkna pawh nei lem lo, veng chhungin ‘engtik nge ni ang?’ tia kan nghah ruk deuh thap pawh ni lo, sar thi thut chungchang a ni lehnghal.

Ka dawhkanah, khawl hmaah chuan ka la thu reng a. Ka nupui chuan, “Vantlang aurinna ri a lo rik a, ‘ting ting’ a rawn tih hian ka ngaihtuah thin chu, engtik niah emaw chuan kan thih thu sawi tur hian a ‘ting ting’ a la rawn inti ve dawn sia,” a rawn ti a.

A dik ngawt ang. Engtik niah emaw chuan kan thih thu hian veng chhung chu a la fan ve ngei ang. Kan thurin buah hian ‘engkim in ta a ni si a, nunna te, thihna te pawh..’ tih a awm. Mahse engkim hi kan neih vek hman dawn leh dawn loh chu ka hre lo. Chiang sa erawh chu – nunna kan nei mek a, thihna pawh kan ta tur tih hi!

Thil hi kan va han sawi lawk thui thei lo tehlul em! Darkar khat hmalam pawh kan duang fuh hleithei lo. Ka thianpa Rinzuala nen thil pawimawh em em mai tih tur kan ruahman a. Kan thil tih tur atana pawimawh hmanrua kan inchhawp kim a, thuam famkim kan inbel tawh. Darkar chanve hnu leka chhuah tawh tur a ni. A hunbi pawh sawi fel sa. Thil chiang sa anga ngaih a ni tawh.  Mahse, tlangau a lo au a, chhiat tawh thu a nih miau avangin loh theih lohin kan tum chu thulh a ngai tlat!

Kan va han thu lo tehlul em! Nakin lawka thleng turah te, naktukami turah te, nakuma mi turah te hian ‘thil chiang sa a awm lo’ a ni ber e! Kan hmalam hunah hian sawi chian theih loh kan va ngah tak em!

Mahse, chiang sa pakhat a awm! Kan la thi vek dawn tih hi. A hun erawh kan hre hauh lo. Kan pianni turah duh kan thlang lo ang chiah hian kan thih ni tur hi kan hre hauh lo.

Nufa an lo kal a, a fanu chuan, “Ka nu hi a ninawm lutuk, a hlau reng a, ‘ka thi dawn em?’ tiin min zawt reng a, ‘Thi dawn lo,’ kan ti tuk tin mai a,” a ti a. Keia fiamthu thawh chak deuh bawk chuan, “E, dawt hrilh tawh reng reng su, a thi dawn alawm, a hun kan hre lo mai a ni,” ka ti pek a. Kan bula thu ve reng a nu pawh chu a nui ve ta mai mai a.

Kan la thi dawn khawp. Thihna hihlauhawm zawng leh tuihnai lo zawnga ngaihtuah tur pawh a ni lo. Pathian remruata bet a ni tlat. Hlauh viau tur pawh a ni lo. Dam hi a nawm avangin dam tumin theihtawp kan chhuah zel ang a, tlin loh chinah chuan kan tawp mai dawn a ni. Peihawm lo tak chu a ni. Chakawm lo tak a ni. Mahse pawm thiam a tul dawn si. Thihna chungchang ngaihtuah thiam tak tak ho phei chuan chatuana nunna tur kawngka an ti zawk asin! Thlamuanthlak tak tur a ni.

Engtik niah emaw chuan tlangau a rawn au ang a, kan hming an la puang ngei ang. Chutih hunah chuan tih theih kan nei dawn hauh lo. Chumi hun a lo thlen hmaa kan nun danah erawh tih theih kan nei thui hle. Duhthlanna zalen min petu hian min tithu ve khop. Thihna chungah thu kan nei lo, kan nun dan erawh kan thu thu a ni thui hle!

Thil chiang sa pawh ni hlei lo buaipui nan hian kan hun kan hmang hnem. Thil sual a ni lo. Buaipui tur a tam a, buaipui a tul ve bawk. Thil chiang sa awm chhun ‘thihna’ leh ‘thih hnu piah nun’ atan hian inbuatsaih tam ve bawk ila, he raltitna hmun ‘Bairabi dai’ lei hringnunah hian a thlamuanthlak ber zawk ta awm asin!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?