Harh thar hi engtik hunah pawh a tha reng mai, mahse a tlai lu hret a awm thei..
&&&&

“FUTURE AWM LO”

 

Kum 22 mi a ni. Pasal a nei a, kum khat hnu lekah, fapa pakhat an neih hnuah an inthen leh ta mai a. A pasalin a chhuahsan zawk avanga inthen an ni awm nghe nghe e. A rilru pawh a na hran lo. “Ka tuar lo, ka na lo, engahmah ka ngai lo, a tha zawk,” a ti mai a. Engvanga tha zawk nge tih zawhna chu, “A ni nen khan future a awm lo, hmalam hunah engmah beisei tur a awm lo, inthen kha ka duh zawk,” a ti hmiah. Inthen a la na lo hi an inthen tak rau rau si-ah chuan a tha ve reuh viau.

 

A pasal chu engmah thawk lo a ni. a thatchhe bawk si. A la rui thin zui lehnghal! A ni nena chhungkaw tak tak din chhoh tur kha huphurhawm tak a ni reng a. Nupui fanau turte tan han innghahna tlak, hmalam kawl eng han thlir tur a awm ngang lo tih a hre chhuak thar a ni.

 

Pasal then a la lap lutuk chu a ngeiawm deuh a, a la na lo tlat erawh chu a pawi lutuk lem lo bawk si. Nupa inlaichinna kawnga hmasawn tum si lo, inkawmngeih leh chenho dan zir tum bawk lo, inthen ve leha la na leh em em, hrui hrual melh leh ruaite ai chuan a nun a hahdam zawk ve hrim hrim. Pasal a then hi a tha a ni lo a, fahrah an siam pawh hi pawmzam a har viau. ‘Future awm lo tur’ a ngaihtuah chhuak tlai lutuk hi a demawmna ber niin ka hria!

 

Hmangaihna nia kan hriat hi kan la na hlawm viau mai si a. Zing atanga zan khaw tairek thlengin kan inngaizawng a. Eng dang mah thlir lo lek hian kan inthlek a, hna thawh dang thawh tum loin kan inkhal a, thurawn engmah ngaichang duh hauh loin hmangaihna kan chhuanlam a. Nu leh pate remti lo chung chung pawh kan inzui dawr dawr a. Inneih mai nachangte hi kan hre khawp mai si a.

 

“Hmangaihna lipuia han chen veng veng hi chu mumang nuam tak neih ang a ni a, inneihna erawh hi chu zing tian ar khuang ang mai, a tak rama min kaiharhtu a ni’ an lo tih ang deuhin, inngaihzawnna mumang ram chiang lo riai atang chuan inneihna nun tak ngak maiah kan han harh ta phut mai a. Inneihna thutiam phawkphawhraw zet mai chham hnuah mumang ram leh a tak ram chu a lo inan lohzia kan han chiang thar ta a. Dam dun chhung atana kan tiam chuan kum khat pawh a awh lo ta fo mai!

 

Kan harh tlai deuh thin a ni. “Hmangaihna chu a mit a del alawm” tia han inhnem tlaikhawhnu a tul hma hian inngaihzawn lai hian men kar tur a ni zawk! Inngaihzawnna lipuia chen dun lai hian maimitchhin vung vung tur a ni lo. Livir leh suarah pawh lut thut dawn ila, inhambeina tur rintlak a awm hnai em tih hi melh ruk reng zawk tur a ni. A hmaa engmah ngaihtuah chiang duh hauh si loh, inneih hnu leh fate pawh an pian hnua, ‘a ni nen chuan future awm lo’ tia nui awr awr chunga inthen leh si hi a dik lo a ni.

 

Inthen hi a pawi asin! A inthente nun a buai a, an hmalam a hnawk fo. Kara fanau lo awm hman tawhte rilru a keh chhe fo a, fahrah nun hrehawm an tawng thei. Hlim taka chhungkuaa insiam chhungkaw pahnihte khawvel pawh a danglam dawrh thin.

 

Inthen tam takte inthen chhan hi an inngaihzawn laia an inhriat chian loh vang a ni fo. Inngaihzawn lai hian uluk takin inchik ila, nun inthup leh biru zawng zawng pawh inhriatsak tum ila, zep nei hauh lo hian inngaizawng bawk ila a tha. Engkim hisap kim vek chunga dam dun chhung, a nuamah pawh, a hrehawmah pawh kan neih peih dawnte chuan tu sawi phak a awm lo ang. Inneih hnua harh thar tlai khawhnu hian thil a tipawi khawlo zo thin thung.

 

Harh thar hi engtik hunah pawh a tha reng mai, mahse a tlai lu hret a awm thei. ‘Tiam tlat e’ tih hmain ‘future awm lo’ tur chu thliar fel hman thei turin inngaihzawn lai hian men kar tur a ni e.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.