Dr. Hrekima titi (Nov. 13, 2016)

Nun dan tur kawng tam tak a awm ang, awm dan dik leh tih tur dik pawh a tam ang..
&&&&&&

Ka hriat hnu vek!
Nula pakhat hian a thiannu Depression nei nasa tak chanchin min hrilh a. Psychiatrist pan tura a hrilh tuma a chhanna chu, “Ka peih lo. Ka hriat hnu vek thu tha, ka tihpeih si loh kha min lo hrilh ringawt dawn a!” zuk ti mauh a.
Kan hriat hnu vek thu tha kan zawm peih loh si hi a va tam dawn tak em! Hriseltlak lo, hlimtlak lo, malsawmna dawngtlak lo, vanram kai phu lo hi kan tam awm mang e tih te ka ngaihtuah zui mai mai a. Mizote aia thu tha hre hnem hi chu kan vang ngawt tak ang a. Kohhran tinin kartluanin thu tha kan inhrilh a, zan awlah thahnemngai pawlin min kokhawmin min hrilh bawk a. Nu leh pain thu tha min hrilh ringawt pawh hi dampui tham chu a ni vek hlawm ta ve ang! A dawn thleng lam hi kan nawi em a, kan heti ta tehnuaih a nih dawn hi a!
“Mi mangang, thih châk khawpa rilru hahten in inthihlum hmain min rawn be mai teh u,” tia inthlahrung taka ka whatsapp number leh phone number dang ka tarlan khan mi eng emaw zatin min rawn be hlawm a. Thu ropui tak sawi tur pawh ka hriat loh lai a, “Ka pu, ka lawm e, i thu min hrilh chu ka lo zawm ang e,”an tih thluam theih chuan thla a muang viau thin a.
Mi pakhat nena kan inbe ve thung chu a har talh mai. A harsatna a tam si! Thu tha sawi tur ka hriat tlem em avangin thu tha ber nia ka hriat Pathian thu ka va hrilh ve a. “Hengte chu Pathian thu a nia, ka hre tawh. Pathian thu ni lo thu tha dang min hrilh tur i hre lo em ni?” min rawn ti tlatpek a!
Pathian thu aia thu tha dang han beisei mauh mai chu! A aia tha thu dang ka hre der si lo. Ka rilruah zawhna a lut zut zut a. Pathian thu hi kan hre hnem lutuk a, ngaiah kan nei a, kan thinlung hi a khawih tawh miah lo tihna a ni ang em? Pathian thu chu thu thiltitheiah kan ngai tawh lo tihna zawk nge? Pathian aia mihringa beiseina neih san zawkna nun hian khawinge maw min thlen dawn ni? Pathian thu tak ni chiah lo, a sira thu ngaihnawm dang uma tlan hum humte hi kan tam viau dawn a lo nih hi a!
Daktawr hnena inentirte hian damdawi ringawt an mamawh lo a, eng natna pawh dam fel tur chuan damloin ‘nun dan thlak’ an mamawh tel vek. Sim tur sim a, chin dan thar tha zawk neih hi natna hneh nan a pawimawh. Rilru lam natna hrang hrang neite pawh hian nun dan dik zawk zawm tur an nei thin. Kan hriselna leh kan damna atan hian tih tur kan nei ve a, a titha peih apiang an dam ang.
“Ka peih lo” kan tih tlat chuan dam te, hmasawnte hi har tak a ni. Peih miau lo inpeihtir dan hi a vang khawp. Thu tha hriaa zawm peih si lo chu lo depressed zel phawt mai se la, lo rui zel mai se la, lo buai zel phawt mai teh se kan ti tawh mai dawn em ni? Damloh leh mangana hrehawm ti hle si, a hnehna tura tuar tur tuar peih si lo leh tih tur tih peih miau si loh chuan dam hi kan phu vak chuang em ni? Kan Lalpa meuh pawh khan thu tha zawm duh lo khua chu kea vaivut thing thla a kalsan nal nal mai tur a ti em kha?
“Kan hriat hnu vek, kan peih loh kha a ni a” kan tih vek chuan vanramte hi a hla du dawn a nih hi! Kan hriat chin tal hi ti peih ila, zawm ila, han nunpui chhin hlawm ila kan buaina tam tak hi chu a fel duak duak ngei ang maw le! ‘Ka hriat hnu vek’ ti mawl mai lo hian!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?