A neih miau loh laia lungawi taka rethei mai, hmasawn thulh si lo..
&&&&

Remsiami Rilru
Asian Games 2018 ah leh Summer Youth Olympic Games 2018, Buenos Aires-a neih zawh taka hmeichhe hockey-a silver medal dawng pha ve ve ngat, Mizo nula Lalremsiami of Kolasib chanchin hi ka hre thui lo hle. Mizo infiammi zinga Asian Games medal la thei hmasa ber hi infiamna lama a hlawhtlinna bakah a rilru puthmang ka hriatchin tawite hi a ropui ka ti hle.

 

Asian Games-a silver medal an dawn hnu, a player pui ten an ram atanga lawmpuina an dawn sup sup laia kan ramin a pek ve tur an la puan hmaa The Aizawl Post in an kawmna, Sept ni 7, 2018 The Aizawl Post chhuaka an rawn ziah kha ka chhiar a. Ka ngaisang zual hle.

 

Lo neitu chhungkua atanga seilian, a nu leh pate pawh an thlai thar zuara eizawng ve mai, India ram Hockey Academy-a 2016 a awm lai pawha pawisa nei ngai lo, academy-a awmpui ten khawi atang emaw hlawh an neia an khawsak a nawm hmel bik riau laia hrehawm a tih leh tih loh an zawhna chu, “Pawisa neih loh hi hrehawm ka ti hran lo, ngaiah a neih ve theih. Hlawh ka nei miau lova, pawisa nei tur ka ni hleinem. Ei leh in engkim min tumsak a, pawisa hmanna tur a awm lo,” a ti hmiah.

 

“Hlawh ka nei miau lo va, pawisa nei tur ka ni hleinem!” tih a sawi hi thlalai hlawh la nei lo, hlawh neite awm dan ang awt ve mawl tawp thin ho hian by-heart a, nunpui ve tlak a ni! Thawh chhuah nei si lo hian thawh chhuah neite awm dan kan awt ve a, hlawh nei hauh lo hian hlawh neite neih ang kan it ve a, rethei hle si hi mi hausate nen kan inkhaikhin ve zel a, kan nun a buai fo thin niin ka hria. Remsiami chuan ‘pawisa nei loa awm hi hrehawm a ti hran lo va, ngaiah a neih thei’ mai nia! Ei leh in tur a neih chuan pawisa hmanna tur dang a ngaihtuah lem lo a, hlim takin a inkhel a, tumruh takin a thawk a, tunah zawng Kolasib mipui mai ni lo, Zoram pumin zawn kan chak tawh mai a nih hi!

 

A nihna a pawm a, an retheih a hria a. Hausa te nun ang a nun kha a tum lo mai. Chu chu a ni, rilru hrisel chu. A nihna phak tawkin lungawi a zir a, hmasawn a tum belh zel a, tunah chuan Kolasib Apex Bank ahte pawh account a hawng ve ta rup mai a ni awm e!

 

A nghahhlelh ber chu club-a khelh huna a chhungte pawisa thawn ve theih zuk nia! Ka va ngaisang tak em! A nu leh pa tanpui let chu a nghahhleh ber a ni. Kei ni ila, “Pawisa i neih veleh engtin nge i hman dawn?” min ti ta se, ka duhzawng lei tur ka sawi zuah zuah mai awm asin! A ni nghahhleh ber chu hei leh chen lo enkawl tawhtu tanpui let zu nia! Entawn tur ka va ngah em, he nula nunah hian!

 

A neih miau loh laia lungawi taka rethei mai, theihtawp chhuaha beitu chuan a nu leh pa chu pawisa a thawn ve thei tawh ngei ang le! A nu leh pate chu a tanpui let ve ngei tawh ang!

 

Mahni tawn ang zela lungawi mai, hmasawn thulh si lo, neih belh ve ni a thlen tika lawm let nachang hre thin nun hi a va ril em! Nu leh pa, chhungkua, khawtlang, kan ram leh kan Pathian hian min enkawl rei ta! Kan rul let ve dawn em le?

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.