Dr. Hrekima titi (Sept. 10, 2017)

Tunlaia ramhuai common ber chu ramah aiin inah an tam zawk..
&&&&

ZU ‘RAMHUAI’
Zu in nasat lai leh zu nghei thut avanga a leh buai hi ka hmu teuh tawh mai a. Zu avanga ‘ramhuai tihbuai’ kan tih mai thin hi zu in vak leh ruih mek laiin a awm thei a, zu nghei thutin a awm tam zawk thung. Zu nghei thut atanga darkar 8-12 inkar velah an thil hriatna a buai tan fo. Thil hmuhsual te, hriatsualte a awm thin.
Betu awm hauh si loin tawngri an hria a, kotu leh vautute an nei a. Chhungten, “Ramhuai aw a hria” an ti a, anmahni pawhin “Ramhuaiin min tibuai,” an ti fo. Vantlang mike atanga an chungchang au tlata hria te, mi zawng zawngin an dem luai luai ri te, anmahni vaua thah ngei ngei tur anga rawn sawi ri te, amah a thih loh chuan an chhungte an thah vek tur thute, nupuite leh pa dang ‘inchai’ thawm ri hriat tlatte an nei fo.
Chung aw chu tak tak emaw an tihtlat avangin thil pawi tak tak a thleng zui thei. Mualpho vek tawha inhriatna avang te, miin an that dawn tho thoa an inhriat avangtea mahni lo inthah tum ta maite an awm a, aw-in titura a tih ang zawma maksak tak leh hlauhawm taka chet chiamte a awm fo. Nupuite uire thawm an hriat miau avanga nupuite hlap ta maite pawh an awm thin. Anmahni pawhin an kawchhungah ramhuai lut niin an hre fo a, an kezungpui atangtea rawn be zuah zuahte an hre thei!
Hmuh sual leh hriat sual an nei thin a. Mi dang hmuh ve hauh si loh ramhuai niawm tak tak, te reuh te te te, lian pui puite an hmu a, pindan kilah leh inchungahte ramsa an hmu thul! An nupuite leh tlangval tu emaw sex hmangte an hmuh tlat phei chuan manganthlak tak a ni! Ramhuai maksak tak tak an hmu a, midangin hmu ve lo mahse an tan chuan ‘a tak’ a nih avangin an buai hle thin.
An taksa chu samzaiin zem angin an hria a, rannungin bawma inhriain an inthian a, rulin zem tlata inhria te, an vun karah vangvat te, rulhut te, fanghmir leh vaihmitete lut leh chhuakin an hria a, an leiahte eng emaw awmin an hriaa, an pawt chhuak zuah zuahten an hria a, an invai buai hle thin.
He hriatna buai leh atna hi a hlauhawm thei hle. A tak emaw an tih avanga an thil hriat azira che ta chiam te, tlanchhe vak te, mangang leh hlau em ema biruhrukna zawng ruaite an awm fo.
Hun leh hmun leh mihring an hai a, chhungte leh thiante pawh an hre lo fo. An a riai a, an buai chuk a, an tal buan buan fo. Zu seh chak tawh lo tak e ti loin hetianga an awm hian an chak leh viau thin lawi a! An chak tak viau avanga ‘chakna pek belhtu ramhuai puitu’ pai ngeia ngaite an awm fo! Tibuaitu ramhuai aw an hriat avang te, ramhuai an hmuh avang te, anmahniin an kawchhunga ramhuai awma an sawi avangtea chei ‘ramhuai pai’ ta vakte pawh ka hria a a, ramhuai hnawhchhuah tum a, damlo chaklo puma lo nem nghek nghek tawk lah bo lo!
Hei hi ramhuai dang ni lo, zu ramhuai mai a ni e! Zuin thluaka tihbuai avanga awm mai a ni. Damdawi lam thiam enkawl tur a ni. A chang chuan damdawi pawhin a hneh har fu a, phuar beh hialte pawh an ngai fo!
Zu in rei tawh, taksa chak lo, natna dang nei zingah hetiang hi a tam zual avangin enkawlna pawh uluk hle tur a ni. Zu nghei buai nasa ‘delirium tremens’ phei hi chu zu nghei atanga kar khat chhungin engtik hunah pawh a lang thei a. Zan hnih khat an buai loh avangin an tha dawn tihna a nih loh fo avangin zu nghei tur hi uluk taka daktawr rawn chunga inenkawl tur a ni. Daktawrin an enkawl mek lai pawhin a rawn lang fo thin. Enkawl that loh chuan thih mai theih a ni ve!
Zu ‘ramhuai’ hi hnawhchhuah tuma beih vak aiin thlarau mi dan tha zawk, damdawi leh tawngtaina hmang kawpa enkawl a him ngai e!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?