Dr. Hrekima titi (Sept. 17, 2017)

Nilenga rim taka hna thawka inhlawh, lei lai leh cement chawka thlantui luang zawih zawiha nitla vanvuaia thawkte an nuih uar uar lai khan anmahni ruaitu nu ber, daihlima thu chunga lo viltu chu a nui ve thei mang tlat lo!
&&&&&&

PA REMHRE LO, PA TAL HAH
Rim taka thawka ei zawng tura Eden huan atanga hnawhchhuah hnu kan nih miau avangin faisa a rin theih tawh lo va. Kan zavaiin kan phak tawk theuha kan thawh a ngai tlat. Kan dam chhung hian hna kan thawh a ngai a, tuk tin mai hi thawhtanni a ni reng kumkhua dawn zawng a nih hi. Hah a sawi theih loh a, peih loh a sawi theih loh. Thawk peih lo chuan ei pawh ei suh se an ti miau si.
Thawhrim luat avanga chau leh hah, nun hlim hleithei lo ka hmu nual. Zirlai thawkrim, ekzam dawna buai phili pawh ka hmu thin. Hahdam zawk leh hlim zawka hnathawh dan hi a awm. Thatchhiat hi hahdamna a ni lo. Zelthel hi hlimna a ni si lo. Taima tak leh rim tak sia hahdam zawk leh hlim zawka thawh dan a awm.
‘Pa remhre lo, pa tal hah’ tih tawngkam hi i ngaihtuah chiang ngai em? Thawk tam apiang an hah hauh loh hi!
Thlan tla bawrh bawrh leh taksa chau hnawpa hnathawh hi a hahthlak ber a ni lo. A hahthlak leh kan chauhpui thin ber zawk chu rilru hah leh pik taka kan awm tel thin hi a ni. Rilru thawl leh hahdam taka thawh chuan taksa lam hi hah mahse a hlim theih tho. Nitla vanvuaia leilaite aiin an hlawh tur ngaihtuahtu nu a chau zawk mah thin alawm.
Lehkha i zir dawn a ni emaw, hna thawh tur i ngah hle emaw a nih si chuan hahdam zawk leh hlim zawka i thawh theih nan hetiang hian aw:
(1) I tihtur pawimawh indawt dan thliar fel phawt la, a pawimawh dan indawtin thawk rawh. Mi tam tak chuan a pawimawh hmasa lo zawk kan khawih a, a pawimawh zawk thawh dawnah hunin min nek chep leh si. Chu thinlung phili chuan rilru a tihah a, chauh a na thin. Naktuka i tihtur pawimawhte chu a hma zanah ziak chhuakin a indawtin aw.
(2) I thawh nghal ngai tur ni lo kha chu dah bo vek la, i hmaah chuan i thawh tur chauh awm rawh se. Hmuh phaka thawh tur hlir inchap darh nuaih hian min tihah thei. Science i zir dawn chuan subject dang zawng kha khung bo vek rawh tihna a nih chu.
(3) Harsatna leh rilru kaptu bik i neih chuan chingfel phawt la. Vei dang nei tun chunga hnathawh hian hna a tisawt lo a, a hahthlak bik.
(4) Vawiina tih tur naktuka tih-ah khek suh. Hna chhekkhawl chin hi a hrisel lo. Naktuk chuan thawh tur dang a rawn ken belh leh dawn si a. Chauhpui tham inchhekkhawl hman loin a tul hmasa apiang lo thawk fel zel teh.
(5) Mi dang ring thiam ve la. Hna zawng zawng i thawk hman lo. Lo ti ve rawh se. An thiam loh bik ring suh. I tel lo hian miin thil an lo tihnem tawh em! I tel lo hian khawvel hi a vir dawn tho.
(6) Hnathawh kar lakah rei lo te te thawk lain chawl zeuh zeuh thin la. I hnathawh thlir let fo la, i thawh that viau leh mahniin han infak la, han inlawmpui ve la. Mi dang hna enfel pui thiam la, fak la, lawmpui ve thin bawk ang che.
(7) Eng hna pawh thawk dawn la, ruahmanna fel tak siam zir ang che. A rem hre lo apiang an buai a, rem hria apiang an hahdam a, an thawk hlawk zawk bawk si.
I thawk tam ang a, i hah a dam si ang. I thawk rim ang a, i hlim si ang. Hun i hmang tlem ang a, i thawk hlawk si ang. ‘Pa remhre lo, pa tal hah’ tih i hlawh ngai dawn lo zu nia!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?