Dr Hrekima titi (Sept. 2, 2018)

Drug addict puihna hi a awm tha maw le, nghei tum tak tak tan chuan.
&&&&

OST

Drugs nghei dan tur kha khaikhawm zuai teh ang. Drugs nghei dawn chuan a hmasa berah nghei duhna thinlung put phawt a ngai. Drugs eng pawh hi a ngawl vei tawh chuan nghei thut nghawng nei an ni vek mai. A lanchhuah dan erawh a inang lo hlawm. Nghei dawn chuan nghei thut nghawng enkawl zui (detox) turin daktawr pan tur. Chumi zawhah chuan nghei zui dan tur kan sawi tawh ang khan nun hman zui a ngai a. Mi thenkhat chu ‘detox’ zawh hian an nghei zui mai thei a, thenkhat erawhin an thei lo.

 

Nghei zui mai thei lo, damdawi thlah hleithei lote chu an tihlai tlansan theihna turin damdawi danga puih an ngai fo. Ruihtheih thil zawng zawng ‘tih tawh lohna tur’ damdawi chikhat a awm lo. Ruihtheih thil tih azirin chi dang dang a awm ve.

 

Drugs kan hriat lar deuh ber Number Four (Heroin) hi sawi zui deuh ang. Heroin ang chi hi ruihtheih dang a awm nual. Hmar lama kan ruih lar vak loh, chhim lama lar deuh zawk Opium an tih te, mi thenkhatin langsar mang loa an tih ruk ve fo, ‘cool’ an tih mai, codein telna khuh damdawi te, daktawr pawhin na chhawkna atana kan chawh fo thin damdawi thenkhatte leh, tun hma deuha lar, kan intawnbuak harhsan tawh Proxyvon leh Parvon te pawh kha Heroin chhungkuaa mi an ni hlawm. Chungho tih ngai loa damdawi hmanga inpuihna lar tak chu OST an tih hi a ni.

 

OST chu Oral substitution treatment/therapy tihna a ni. Khitiang drugs-a inchiu thinte khi an inchiu zel chuan chhiatna nasa zawk a thleng thei si a, vung leh pan bakah infection dang an kai thei a, hri tha lo, Hepatitis B leh C te, HIV te an kai a hlauhawm bawk si a, inchiu loin an awm thei bawk si lo! Chutiang chhiatna nasa zawk a thlen loh nan leh na tuar loa an awm theihna tura drugs dang hmanga an mamawh phuhruk nana ei tur (oral) damdawi pek chu OST an tih chu a ni. A hmingin a sawi ang hian ‘thlakna’ a ni mai. OST hi ruihtheih thil dang nghei tum nana hman ve chi a ni lo. A bik takin Number four (Heroin) addict nghet tawh, vawi tam tak nghei tum tawh a, hlawhchham zel si ho tan a ni bik. Natna tha lo dang an kai loh nana inchiu lo tura siam paha an na chhawk thei tur pek kha a thupui ber a ni. Inchiu ve tan tir, ti ve tan tir tan pawh a ni hek lo a, zu leh drugs dang tana hman ve tur pawh a ni hek lo.

 

OST tha taka ei pawh hi drug addict an la ni reng. Drugs tel loin awm thei miau hek lo. OST hi drugs a la nih tho avangin ei tawp thut chuan nghei nghawng (suffer) a awm tho tih hriat tur. Chatuana ei tur a ni lem lo a, rei tak ei tur pawh a ni lo. Daktawr rawn chunga zawi zawia ei tlem zel a, tihhniam hret hret a, a tawpa ei loh theih tum tur a ni. Heroin nghei aiin OST atanga nghei hi a awlsam zawk avangin kawng zawh tur tha ve tak a ni. Tichuan drug addict nih loh, drug tel miah loa nun kha tum ber tur a ni. Mi tam takin an lo hlawhtlinpui tawh a ni.

 

Miin OST a lak chuan na loin, inchiu atanga thil tha lo zawk thlen thei pumpelh siin, nun tangkai leh hlawk zawk an hman theih beiseina a ni. Thil tha tak a ni. A thlawna sem a nih avangin drug lei nana sum tam tak senral kha a awm tawh lo hi a hlawkna lian tak a ni. Ni tin lak tur a ni a, an lakna hmunah ei nghal tur a ni. Inchiu ngai lo, ruih phut lo, mutchhuak loin nilengin nun tangkai leh hlawk zawk an hman theih phah a. A nihna ang taka hmang tan chuan thil tha tak a ni. Thenkhat erawh chuan an titha duh lem lo a, ruih theih thil dang nente an pawlh a, an rui phut tho a, nilengin an zelthel tho a, A HO TLAT!!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?