Editorial (Feb 18, 2018)

Lei chim thin hiLei chim thin hi Tunhnai kum reilote chhungin Mizoramah lei chim engemaw zat a thleng a, hmun thenkhatah phei chuan mihring nunna hlu tak chan a ni bawk a, a pawi hle a ni.

Kum 2014 atanga 2018 inkar chhungin Sihhmui bulah Tlawng lei, Tuipui D, Bairabi bula Tlawng lei leh tunhnaiah Tuirini lei dawh mek te a chim a. Thenkhat te phei hi chu chim nawn a ni. Lei chim chhan hi engpawh ni ta se heti tak maia a chim ngun hian ngaihtuah a ti thui a, a chhan dik tak hriatchhuah ngei a ngai a ni.

Tunhnai February ni 13,2018 zingah pawh Tuirini lei dawh mek chu chimin vanduaithlak takin mi 1 a boral a, mi 1 in hliam a tuar bawk a ni.  Lei chim chungchangah hian PWD chuan thuchhuah siam nghalin lei dawh lai chu kum 1973-a BRTF lei dawh hlui leh chhe tawh thlakna tura PWD Highway Division II-in a dawh lai a ni a, he thir lei, ‘triple double re-inforced’ hi 30R loading class, ton 38 dawl zo tura ngaih a ni a, lui kam tawn tawna a innghahna turah pawh lei hmawr chu innghah tir a ni tawh a, lei hlui ruhrel zawng zawng pawh thiah vek a ni tawh a, hetihlai hian a chim ta mai a, a chim chhan hi chhui chian a nih phawt loh chuan tun dinhmunah sawifiah theih a la ni rih lo niin an sawi a ni.

Tuirini lei chim chungchang hi political party hrang hrangte chuan ngaihvenin eptu lam party te phei chuan PWD Minister Lal Thanzara chu a mawhphurtu ah puhin bang turin an phut nghe nghe. PWD Minister pawh hian a department chhunga thilthleng a ni tih hriain ban a hrehloh thu leh ban chungchangah hian party thuneitute a biak thu Zirtawpni khan Congress Bhavan-ah a sawi a, party thuneitu lamin bang lo tura an tih avanga bang lo niin a insawi bawk a ni.

PWD Minister in a mawhphurhnaa ngaia ban a tum hi thiltih awm tak a niin a department chhiat thatah mawh a phurh miau avangin hetianga ngaihtuahna a seng hi a tih tur dik tak a ni. Chutih rual chuan Minister te chu policy siamtu leh kengkawhtu an ni a, a tak taka hna thawktu chu sawrkar hnathawkte an nih miau avangin a mawhphurtu dik tak chu Department lam ni zawkin a lang.

Engpawhnise tunhnaiah lei dawh tum engemaw zat a chim hi a dik lo hrim hrim mai a, engemaw thil fello chu a awm tih chiang takin a lang a ni. Chuvangin sawrkar hian lei chim fo chhan hi uluk takin chhui sela, a chhan dik tak hi huaisen takin tarlang teh se. Thil ti diklo an awm anih chuan a hrem ngam ngei tur a ni a, hei hian nakin zelah thil tha zawk a hring dawn a ni. Chuti ni lova a intuamdam zawnga kan kal zel chuan hei aia chhiatna nsa zawk hi a thleng lovang tih sawi theih a ni lo. Sawrkar hmalakna hi mipuiin an thlir reng e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?