Editorial (June 17, 2018) : Thawh hreh nei lo ngaihsanThawh hreh nei lo ngaihsan

YMA Day kan hmang zo chiah a, mi pawimawh tak tak te’n hmanpuiin thu tha tak tak an sawi chhuak a. Zuangtui lamah Deputy Speaker R.Lalrinawma chuan hmanpuiin thalaite tan Central service lama tan lak a ngaih thu leh thawh hreh neih loh chu a pawimawh a tih thu a sawi chhuak a ni.

Tunlai khawvela vei hlawh berte chu thalai te an ni a, vei an hlawh nachhan pawh engdang niloin an hma hun veisaktu an pun zel vang a ni a. Sawrkar, thalai pawl leh khawtlang ang tein thalai te hmakhua hi sawi nasat a ni a, hmalakna pawh hmuh tur a awm nual tawh a. YMA leh pawl dang ang pawhin cement mistiri ‘masonry’, thing mistiri leh thiam thil nei dangah training te pek a ni thin a, kan hlawkpui pawhin a lang khawp mai. Hemi bakah hian tunhma deuha kan hriat mang loh career awareness te chu tawngkam tlang lawn a ni ta der mai.

Tunlai thalai te hi an vannei hle a, hetianga an hma hun veisaktu hi kan hnam chhuan kal tawhah chuan a la ngah ber an ni hial ang. Thalaite pawhin hei hi hriain remchanna hi theihtawpin ban ve se a tha khawp mai.

Thalai leh an eizawnna tur kan buaipui hi a thaa kan tihtur pawh a ni a, chutih rualin kan vei hi a changkang hrih deuh em? Kan kawng inkawhhmuh dan hian a tak ram a la pha lo deuh em? tiin ngaihtuahnaah a awm a ni. Career awareness lamah pawh consultant (rawn tur) kan awm thluah tawh a sawrkar hnathawh leh entrepreneur lo lam hi kan sawi tam ngai lai chu niin a lang a ni. Tuna kan dinhmun en hian thalai zingah hian lehkhathiam kan tih ang ai hian zirsang lem lo ziak leh chhiar thiam an tam zawk a, heng rual ho kalna kawhhmuh tur hian tan lak a ngai nasa hlein a lang a ni. A tak ramah chuan central service leh civil service a inziak tling turte hi mi tlemte chauh an ni a, sawrkar hna nghet nei thei tur pawh tlemte chauh an ni. Thalaite hmakhua kawhhmuh tura pen chhuak te pawh hian a tam zawkin an phak tur ang hi an sawi tama, chumi lama hnuh luh chu an tum a hun tawh khawpin a lang tawh a ni.

Tuna kan hna sawi ang thawk tur hian nitinin kan ramah hnam dang an rawn lut renga, chutih laiin thalai tih tur hre lo kan nei an phu suau suau a.  Kan enhniam hna te chu min laksak zel a, hna thenkhatte phei chu kan hnam zia nen a inmil loh avanga thawh theih lohah te kan ngai tan tawh hial emaw ni? Hei hi a dik a nih chuan a tam zawk phak tawk eizawn kawngah ‘revival’ kan mamawh a ni hial tawh ang. Kan vei changkan lutuk chuan kan thawh thiam tur hi hnam dangin an nei reng dawn tihna a ni a. Hna hniama kan ngaih te hi thla khata sing tel hlawh theihna an ni hlawma;  chuti chunga hna thawh duh chin kan nei zel a nih chuan kan hnam hi a dam ngai lo ang tih intuh hi kan mamawh ber chu niin a lang. Thawh phak tawk ang thawh hi kan ngaihsan tak tak a va hun tawh em.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?