Editorial : Sikul naupangte drug hlauhawmna thanhnantir ngai

Chief Minister chuan  International Day Against Drug Abuse and Illicit Trafficking Day-ah heroin man khawm cheng Nuai 84 man chuang a halral a. CM chuan ruihhlo chu ram hmasawnna tithuanawptu a nih thu leh khawtlang tibawlhhlawhtu a nih thu a sawi a. Ruihhlo do chu mi tin mawhphurhna a nih thu sawiin Sawrkar pawh a do nan sum a seng nasa a tawhin a tul chuan sen belh zel a inhuam thu a sawi bawk a ni. Education Minister chuan zirlaite chu ruihhloa an fihlim theihna turin education lamah hmalak a nih tur thu a sawichhuak bawk a ni.

Mizoramin ruihhlo a buaipuina hi a rei tawh hle a, a do kawngah pawh tha leh sum nasa takin kan seng tawh a ni. Hemi kawnga tha thawh hlawk ber pawla ngaih CYMA hmanni lawk khan Myanmar ramriah ruihhlo zuarte han kokhawmin an thil chinin mi tam tak a tihchhiat vangin ruihhlo zawrh chu bansan turin an han ngen tawh a. Hetiang anga hmalakna hi a tam lo khawpin a hriat a, kan tlawmngai pawlte an fakawm khawp mai. CYMA hmalakna hi bul tanna chauhah ngai ila.

Kum eng emaw zat proxyvon-in min chenchilh hnuin Danpui hmanga siam chhuah khap a ni ta hial a, a rem dawn emaw tih laiin kum 2/3 kalta atang khan khawchhak lam atangin  heroin hi a rawn lut nasa hle a, tam tak chu a bawihah an tang mek a ni.  Ruihhlo zuarte chuan an thi lo tih chu sumdawnna anga an ngaih tlat vangin anmahni dawrtute an thih rem pawha a dang an awm zel nan ruihhlo man hi a tir lamah chuan tlawm têin an nawr liam thin a, ‘demand’ a awm hnuah a man an tisang leh ta thin a ni. Hemi atanga chiang ta em em chu ruihhlo hi chi khat tirem mah ila a thlaktu tur a dang a awm zel dawn tihna a ni a; chuvangin, ruihhlo bawiha mi an luh hmain ruihhlo hlauhawmna hi a chinchhuakin naupan lai atanga inzirtir a pawimawh ber a tih ngam mai awm e.

Zirchiannain a tarlan dan phei chuan  kum 15 atangin atangin ruihhlo tihchingte hian an ti tan tawh a, mi 1460 laiin nunna an chân tawh a, nikum chhung ringawt khan mi 65 lai chu rihhlo vangin an thi hman a ni. Ruihhlo vangin mi tam tak hnathawk thei lovin an awm a, thalai sangrual dam chhung thawh chhuah chu tam tham tak a ni ang a, ram ang pawhin channa a ni pha hial ang.

Kan ram hruaitute sawi ang khian tuna kan mamawh tak ber chu ruihhlo do hi sikul dawnkan atanga tan a ngai tih a chiang ta khawp mai a, zirlaite naupang an nih atangin zirtir an ngai a, an rilruah hian ruihhlo hlauhawmna nghet taka  tuh a tul a, an thanhnan a pawimawh hle a ni. Hemi tihlawhtling tur hian sawrkar pawhin theihtawp chhuah sela, khawtlang leh kohhran pawhin he hmalakna hi a hlawhtlin ngei theih nan sawrkar pawh nawrin theihtawp chhuah a hun khawp ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?