Engati nge revolution a thlen thin? Engati nge revolution a thlen thin?

– Rualkhuma Hmar

Revolution kan tih fo thin hi a thlen dan te, a hun te, a chhan te inang thap lo mah se a chhanpui ber chu mi lian leh thiltitheiten mipui an rahbeh nasat lutukna hi a bul a ni fo. French Revolution-ah khan mi lian hoten thuneihna an hman uchuak avangin mi hnuaihnung zawkte dinhmun a chep em em a. Mipuiiin an chanvo an chan loh nasat lutuk chuan tharum thawha buaina a chhuak nge nge thin. Thu leh hla-a inngenna, innawrnain awmzia a neih loh chuan tharum thawhna, thisen chhuah hial khawpa inbeihna a thleng thin.

Sakhuana avanga inbeihna hi a kal reng a, ei leh bar dinhmun inthat hleih lutuk avangin helna a chhuak bawk thin. Lal leh thuneituten mahni nawmchenna chauh ngaihtuah a, thuneituten Lalna an kalpui chuan mipui lungawi lo tawpkhawk  chuan tharum an thawh ngei ngei a ni. Thu-in a daih loh chinah chuan tharuma innawrna a thleg thin a ni. China ramah te, Russia ramah te Revolution hi a thleng tawh thin a, loneitute, kut hnathawktute helna a thleng thin.

German writer, Juda thlah Karl Marx-a chuan khawvela buaina bulpui ber chu ei leh bar dinhmun (Economics) atana inbeihna a ni a ti tawp mai a. Mi hausa leh mirethei , sal leh a Pu, a nei leh neilo, dinhmun tha leh tha lo inbeihna (Class Struggle)-in khawvel hi a khat a ni ber mai a ti. Ram pum huapa mipui helna a nih em loh pawhin mi malah pawh mi tuin emaw mi dang lakah tihâwm loh tak a ti emaw, tih tur ngawih ngawih a ti duh lo a nih chuan an inkarah buaina a chhuak thin.

Hitler-a’n Juda suatpui a neih khan nuai 60 vel an thi niin sawi a ni a, kha kha chu Theologian thenkhat chan Juda hoten Isua an khenbeh dawna, “A thisen mawh chu keini leh kan thlahte chungah thleng rawh se,” an tih vanga a hnam anga tuar ta anni an ti a. Cambodia rama Pol Pot-a hun laia an tuarna kha Pol Pot-a nunrawn vang a ni deuh ber a.

Aurangzeb-a pawh a unaute that a, lalna a chan avangin a hun tawpah Moghul Lal ram chu ding chhuak leh tur awm lovin a kehchhe ta tih kan hria a. Tunlai India ram Politics boruakah pawh hian in thah buaih buaihna thleng lo mah se Lal ngai an lal rei lutuk a, chhe thei lo ang ziazanga an awm chinah chuan nasa taka tlakchhiat a hnai a lo ni thin, Irag-ah Sadam Hussain-a chuan kum 20 lai dictator-in ro a rel a, a fate lah chuan nula hmeltha an duhzawng chu an pawngsual hmiah hmiah mai a. Libya ramah Colonel Gadafi pawh a hunlai chuan Lal tak a ni. Saddam te, Gadafi-a te tawpna kha a chhuanawm loh hle a ni.

India ramah pawh chhungkua rule-in kan awm rei lutuk a, vaiho ngiang pawhin an lo kham ta hle rih mai. Hengte hi Zoram politiciam hruaitute hian inenfiah nana hmang duh chuang lova ka lal nak, sum kan ngah em.. In leh lo kan nei tha em kan ti a nih vaih chuan rin aiin a sawp chu a na viau ang. Nimin lawka CADC-a thil thleng, Governor rule awm hma lawka nuaih sang tel sum tuten emaw an la chhuak a, 60% vel an hmanna hriat loh ang chi te, MLA 34 tan bika nuaih 400 duh duha hman tur han siam tak ringawt mai te hi. Engtizia nge ni ta ang le? Democracy ramah rorelna dik a ni thei ang em? MLA 40-te hian inang tlangin sum sem tur nei tal sela, chuti ni mai lova, ka theih nak, ka Lal aliamah ti ang ziazanga thil kan kal pui chuan eng Revolution emaw chu kan cho chhuak palh mai ang, a Mizo leh Mizo, Kohhran mi theuh theuh, Biak In khata lawi theuh hi kan indo ru reng kumkhua ang tih hlauhawm tak a ni. I fimkhur teh ang u. Ram rorelna kalpui dan dik lo hian ringtute thlarau nun a hliam nasa duh em em a, ram tana rorelna tha hlen tum si lo va, Lalna leh sum ringawt sema kan ram hruaitute an in tlan siak huai huai rinngawt chuan kan Hnam hi kan boral ngei ngei ang. Kohhran lam pawh hian ala tuar chho zel ang tih a hlauhawm hle a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?