‘escape engmoia’ east india fashion week 2018-ah

East India Fashion Week 2018 chu hlawhtling takin neih zawh a ni ta a. He Fashion Week-ah hian Mizo designer pahnih, performer leh model te an che tha a, fak pawh an hlawh hle.East India Fashion Week 2018 chu hlawhtling takin neih zawh a ni ta a. He Fashion Week-ah hian Mizo designer pahnih, performer leh model te an che tha a, fak pawh an hlawh hle.

Lakme Fashion Week leh International Fashioner Week (IFW) tangkawpin Taj Hotel Vivanta, Guwahati-a ni hnih (2) awh (January 11&12, 2018)-ah chuan Mizo designer pahnih — Engmawia leh Cherlee Mathlena te chuan an collection an pho chhuak a, runway zawhin Mizo model Emily Chenkual a inlan bakah, Feli Fanai chuan tha takin a perform thei bawk.

India ram hmun hrang hrang — Delhi, Mumbai, Kolkata, Bihar leh adt. — atanga designer 24 te’n an collection an pho chhuak a. January ni 11 khan ‘Day One’ ah designer 12 te’n an collection te an pho chhuak a, a tuk January ni 12 khan ‘Day Two’ neih leh niin, Engmawia chhiar telin designer 12 in collection an pho chhuak leh a ni. Show hi chawhnu dar 2:30 atanga tan thin niin, zan dar 10-ah show neih zawh a ni thin a.

East India Fashion Week 2018-ah hian ‘Escape Engmoia’ label neitu Engmawia chuan ‘vintage formal’ collection a pho chhuak a, model mipa 11 leh hmeichhia 11 te’n inbelin ramp an zawh a. A collection phochhuah zawng zawng belhkhawm hi 22 a tling a. ‘ESCAPE ENGMOIA’ collection pho chhuah zingah hian floral print lam hmuh tur a tam zawk a, hmeichhe model ho pawhin kekawr leh coat lam an ha deuh vek bawk.

Mizo designer, ‘Heritage Mizoram’ neitu Charlee Mathlena pawhin ‘Desert Nomads’ collection a pho chhuak a. Cotton Handloom-Puantah hmanga nipui (summer) thuamhnaw design te an ni a. Hnangtah ‘bag’ leh eri Silk Stole te pawh a pho chhuak bawk a. Mathlena hi handloom leh silk lamah chuan India rama hriat hlawh pawl tak a ni nghe nghe.

Mizorama kan fashion show tam zawk kalpui dan nen a inang lo hle. East India Fashion Week 2018-ah hi chuan show neih zawhah ‘buyers’ ho an kal khawm a, collection an duhzawng a awm chuan ‘indawrna (deal)’ te an neihpui nghal thin a. ‘Escape Engmoia’ pawh a collection te a pho chhuah hnu, show neih zawh veleh ‘buyers’ eng emaw zatin ‘indawrna’ an neihpui nghal a ni.
Designer Engmawia leh ‘Escape Engmoia’ ambassador Feli Fanai te thawhhona a tha hle a, tun thla tawpa Bangkok-a show neih turah pawh sawmna an dawng zui nghal bawk.

Feli Fanai hian Engmawia collection pho chhuah anih lai, model-in ramp an zawh laiin a perform a. Camila Cabello hit ‘Havana’ rawn cover-in bul a tan a. Chumi hnuah a hla hit — Pheichhehmawi — hmangin a perform chhunzawm leh nghal a ni.
“Mi kha an tam ve angreng a; ka perform tur kha chu tlem chuan ka huphurh ve lutuk a; mahse, ka zam duh bik lo a,” tiin Feli Fanai chuan a performance chungchang chu Thalaite Khawvel a hrilh.

He Fashion Week-ah hian India rama model 65 in ramp an zawh a. He’ng model zingah hian Mizo model pakhat pawh sawm tel ve niin, kum 2015-a Sunsilk Mega Miss Northeast-a 2nd runner up dinhmun lo luah tawhtu — Emily Chenkual — hi a ni.
East India Fashion Week 2018-ah hian India ram hmun hrang hrang atangin designer hmingthang tak tak an kalkhawm a, designer sawm bik mi 24 te chuan an collection-te an pho chhuak a. He show-ah hian Choreographer chu Kaushik Ghosh a ni a. Bollywood Fashion Show Director hmingthang tak niin, khawvel hmun hrang hrangah fashion show 2500 chuang zet chu a choreograph tawh nghe nghe.

Kum 2014 khan Engmawia hian ama pualin Vairengte-ah ‘ESCAPE Fashion Show and Red Carpet’ a buatsaih tawh a. Tunah hian Aizawl-ah inbun fel tawhin, Chanmari, Ramhlun Road (IDBI Bank opposite)-ah showroom leh hnathawhna hmun, fashion designing zirna a hawng mek a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?