False Affidavit ChungchangFalse Affidavit Chungchang

Tunlai chu ‘Affidavit’ tih hi a lar hle mai. Affidavit tih hi dan lam tawngkam a ni a, miin court-ah pawh an dinpui ngam tur, ziaka an puan chhuah tihna a ni mai awm e. Miin a nihna leh a thil neih a dik ngei tih chhechhama a ziah chhuah, magistrate emaw danin thuneihna a pek (Notary public or oath officer) in a nemngheh a nih avangin court-ah pawh thu tling a ni. Stamp paper a ziah a ni thin a, mahni inpuanna a ni ber. Mahse, Indian Evidence Act 1872 ah ziah lan a ni lo a, chuvang chuan Court-in a tul a tih hunah chauh lek chhuah tur a ni thung. Affidavit siam hi a tulna chhan hrang hrang a awm thei a, mawlmang te a sawi dawn chuan theh lut tura an tih changin a siam a tul thin.

India ram politician-te zingah hian hlemhletna thila inhnamhnawih, thubuai nei an awm nual a. An sum lak luhna hriat chian sa in a daih baka hausa, mipui nawlpui hriat phak loh sum hnar dang nei, eiruk ching leh thamna la thin politician-te hi mipui leh ram hmelma an ni a. A ruka an thiltih hi an in leh lo din danah te, an ram neih danah te, an khawsak danah te a lang leh zel tho a, khua reiah chuan mipuiin an hmusit zui leh nge nge thin. Chutiang politician pamham leh depde, puan hnuai thil tih chingte venna atan leh man chhuah a hrem an nih theih nan Election Commission-in MLA leh MP inthlan an chuh tumte chu an thil neih, an nihna leh an dinhmun tarlanna affidavit a siamtir thin a ni.

Mahse, vanduaithlak takin ram hruaitu nih tum te zingah a tir atanga rinawm lo, affidavit a thu dik lo tarlang thin te, an thil neih leh an hausakna zep then thin te an awm leh thin a. A then chuan an zep then lo a, an phuah belh zawk bawk. Hetiang a nih avang hian Election Commission hian affidavit dik lo (False affidavit) siam a inpuhna an dawng tam hle a. Candidate zingah chutianga affidavit dik lo siamtu leh zep then nei te chu man chhuah an nih chuan (RP Act a Section 125A angin) thla ruk chhung lung in tantir leh pawisa chawitir theih an ni a. Supreme Court thuchhuak angin affidavit dik loa siamte chu inthlanna chuh thei lo a paih tur an ni bawk.

Tunhma chuan affidavit dik lo siama puh an awm chuan inthlan buaipuitu (Returning officer) hnenah thlen phawt tur a ni a, ani chuan a tul angin court-ah a thlen thin a. A kual thui viau thin a. Mahse, April 2014 khan Election Commission-in a kalphung a thlak danglam a, tu pawhin affidavit dik lo siama puhte chu court-ah an khing thei ta a, returning officer/ECI kaltlanga tih kher a ngai tawh lo a. Prime minister Modi-a pawh hi a nupui lo neih tawh chungchangah false affidavit a siama puh a lo ni tawh nghe nghe.

Tunlaiin chief minister-in kum 2013 MLA inthlan a chuh tum a a affidavit chungchang sawi a tam hle a. Newtown, Kolkata-a a in hmun a ziah lan loh avangin dan hmanga hrem theih a ni ti a ngai an awm a. He a in hmun hi khatih lai khan a neitu nihna pumhlum a la neih loh avangin a ziak lang lo kha a tidik ti a ngai an awm bawk. Hemi chungchang rawn tichhuaktu Pu Hriata Chhangte hian ram hruaitu lu berin thil dik lo a ti a ngaiin, Pu Hawla ram neih thu leh affidavit a a ziah lan loh chungchang chu mipuiin hria se a duh vangin facebook ah a rawn pholang a. A hnuah Election Commission-ah a thlen nghal bawk. Thil tha duh vang liau liaua hetianga rawn ti hi ni ngeiin a lang, a huaisenna hi a fakawm letling phian a ni. Mimal thahnemngai hmalakna hi a nghawng a lian hluai dawn tih kha a lang reng a, mahse, media thenkhat phei chuan a tirah a chhuah nghal lo a nih kha. A boruak a lian ta zel si a, ZONET TV phei chuan Kolkata-ah kalin an zu chhui zui ta a, mipui hmuh leh ngaihthlak theih turin party lian pahnih MNF leh Congress hruaitute nena sawihona buatsaih an tum mek laiin heng party pahnih hian mak tak maiin an thulh thut a. An duh leh loh chhan hi ngaihtuah tham a tling.

Kan ram politician zawng zawng hi an rinawm lo vek a, kuttlingloa hausa vek an ni tihna ni loin an zingah hian sum leh paia rinawm lo, thuneihna an chan chhunga insiam lian chak em em, term hnih khat chhung lek a hausa hman em em an awm, zep thu a cheng lo. Chief minister kan neih tawh zingah hian Brig. Thenphunga kha hlemhletna lamah a hminghliau lo viau a, a la dam lai ngeiin politician eiru lo chawimawina leh Mizo Award a dawng nghe nghe. Zep loah chuan a hnua mite hi chu an hun laia sum leh pai lama sawi kai an ni hlawm. Dan hmanga hremna tawh loh vang ngawt a eirukna laka fihlima inngaih ngawt pawh hi mipui rinhlawhna a ni kher lo.

Affidavit chungchangah kher hi chuan MLA ding thinte zingah hian chhui leh chip dawl an vang pharh maithei. An sum leh pai neih zat te, ram leh in, lirthei, lung man tam, etc., an neih zat te, an thil neih hlut zawng an tarlan te hi court hmaa huai taka an dinpui tak tak ngam loh tur a ni fur. Party president te hi an lo hausak zia te, an thil neih lo ropui zia te hi mipuiin hria se a mak an ti ngawt ang. Affidavit a nih tawh chuan fimkhur a ngai hle a, kum zat ziah te, education qualification ziah te hi fimkhur a ngai khawp. Entirnan, MLA inthlan hnuhnung pathum – 2003, 2008 leh 2013 a CM affidavit a a kum a ziah kha han chhut chuan a pian kum a inang thei lo tlat. Hetiang thil lian tham ni lem lo a ngaih hi chu mi dangah pawh a awm nual ang.

Tunah hian Pu Hawla hi chief minister a nih vangin a langsar a ni mai a, MLA dang te pawh hi an affidavit han ching let kual peih awm ta se, insawifiah zawh loh tur an lo ziak furin a rinawm. Lehlam zawng chuan false affidavit chungchang hi assembly session a inhnialna atana sawi chhuah a ni lo te kha a mak ngawt, politician lawk zingah huai taka dem ngam emaw tan ngam emaw an awm lo a ni maithei, an tawngkam kan la hre lo tlat. ZNP president tawngkam, ‘Zawlbuka e tang theuh theuh’ ang deuhin an ziah dik loh an inhriat thum avangin an pawr tak tak ngam lo te hi a lo ni maithei. Kan politician-te hi pawn lamah chuan na tak takin inbei thin mahse an dik lohna leh an tana pawi thei turah chuan an tangrual fo mai. Dawt bill laa puh chungchangah pawh khan an fihlim vek a nih kha.

Rinawmna te, dikna te, huaisenna te hi Mizo zia a ni a, chu zepui chu kan hloh nasa tawh viau a, a pawi hle a ni. Kan ram hruaitute hian rinawmna te, dikna te hi an nunah lantir se, inthlannaa an affidavit-ahte hian thil dik tak chauh tarlang se la, an hausak leh retheih te hi zep a tul lo. Tun hnuah chuan fimkhur luat a awm thei lo tih hriat nan tunlai thil hi hmang ta se la. A hma kha chuan fimkhur loh vang leh a pawi ang tih ngaihtuah lo a tih a awm thei ang, entirnan, kan CM hian 2013 inthlan a a affidavit-ah khan Falkland a a ram hi a tarlang a, (Agricultural land tiin a tarlang nghe nghe). A rochun (Inherited) ni a ziak si hian hemi hma 2003 leh 2008 khan a tarlang miah lo a. Hetiang anga fimkhur loh vang leh a pawi ang tih ngaihtuah loh vang liau liau pawh hi, ching kual peih ila chuan hmuh tur a tam ang.  Engpawhnise, politician-te hi sorkar thuneitu an nih bakah mipui aiawhtu, mipui hruaitu an nih avangin dikna leh rinawmna nena inthlan atanga bul tan a, taimakna leh inpekna tak tak nena hmala thin turin mipuiin kan beisei a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?