Feature : Eizawnna tlak pangpar


Pangpar hian nun a tihlim a, a mawi bawk avangin hnam tinin an uar chho zel a. Mizoramah pawh pangpar ching engemaw zat an awm a, a mawina mai bakah tunah chuan mi tam takin ei hmuhna atan an hmang ta hial mai.
Pangpar chinga eizawng Thangduli, Kulikawn leh C.Thanzuali, Mission Venglai te chuan pangpar an zawrhna atang hian hlawkna tam tak hmuin building in an sa hial niin Zalen an hrilh. Kan palaiin a biaknaah pangpar chu kum 20 chuang an lo buaipui tawh nia sawiin an dam phawt chuan Inrinni tukah Thakthing bazarah an thutpui thin tih an sawi a, pangpar chu Mizote tan eizawnna tlak niin an sawi bawk.
Pangpar chinga eizawng pawl Mizoram Florists Association President Lalropari chuan pangpar chu eizawnna tlak a ni tih a sawi a. “Mizote hi eizawnna ti deuh dem dum mai kan ni a, tuna pangpar chingte pawh hian tam tham tak tak an ching lo a, tam tham deuh ching se chuan tun ai hian kan hlawkpui zawk dawn a ni,” a ti.
Mizoram Florists’ Association President chuan Mizorama pangpar tharchhuah zingah Anthurium par tih loh chu state pawn leh khawvel ram dangah thawnchhuah a la awm lo tih sawiin hei hi a chhan ber chu a thar a tam tawk loh vang leh tualchhungah tihralna a la awm vang niin a sawi bawk.
Tun dinhmuna pangpar chingtuten harsatna an tawh len ber chu a zawrhna hmun tur an nei tha lo hi niin an sawi. Pangpar chingte sawi danin Mizoram hi a leilung bakah sik leh sa a that avangin eng pangpar pawhin a ngeih a. Mizorama awm lo, hmundang atanga lakluhte pawh thiam thil hmangin a rawng bakah a variety-te an tipung thin bawk.
Mizoram Florists’ Association hruaitute sawi danin tun dinhmunah Mizoramah pangpar ching mi 3000 chuang an awm a, branch 30 chuang an nei niin an sawi a. Pangpar chingtute tan an inzawrhna tur hun ‘Fair’ an buatsaih thin tih sawiin nikuma fair an buatsaihah pawh nuai 26 chuang an lei chhuak niin Zalen an hrilh bawk.
%%%%

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?